1 Na yɛse kyɛ sɛ bɛsɛkye yɛ aseɛ he aso tɛnt, bɔ ɔte y'awuro ne a, yekonya awuro yɛkofi Nyameɛ berɛ. Sɔ sua ne de, nná sona yeɛ osili ɔ, na ɔwɔ berɛ daa wɔ anwuro. 2 Na tɛnt bɔ yɛte nu ne de, yɛsu yɛgua yɛ nu, ofikyɛ yɛ nye aboro paa bɔ yɛpena kyɛ yɛwura yɛ deɛ bɔ ɔwɔ anwuro ne, 3 ofikyɛ, sɛ yɛfa ɛhene yɛwura a, yɛ nwo ngɔla so. 4 Bɔ ɔte yeɛ ole kyɛ, yɛ bɔ yɛte sɔ tɛnt he anu ne de, yɛsu yɛgua yɛ nu, ná nningyein hyɛ yɛ so, nná kyɛ yɛpena kyɛ bɛye bɔ owura yɛ ne oo, mmom yɛpena kyɛ yɛwura ɛhene yɛgua so, kyɛbɔ ɔkɔyɛ a, ngoa kɔme bɔ owu ne. 5 Na Nyameɛ yeɛ wasiesie yɛ wama sɔ nhyehyɛɛ ne ɔ. Ye yeɛ wafa ye honhom ne wama yɛ wafa wali ɛhe anwo agyinam.

6 Yeti daa biala yɛle akukuduro paa, na yɛsekyɛ, mmerɛ bɔ nipadua he te y'awuro ne de, yɛnne Awurade nwo dɔ. 7 Ofikyɛ yɛnate gyidie nu, nná bɔ yɛ nye nwu ye nu. 8 Nakoso yɛle akukuduro, na yɛnyane ye a, ahaa yafi nipadua he anu yaatena Awurade nwo dɔ. 9 Yeti, sɛ yɛne ye yeɛ ɛte oo, sɛ yate yɛ nwo oo, bɔ ogyi yɛ nye so yeɛ ole kyɛ, yɛkɔyɛ bɔ ɔsɔ ye nye. 10 Yeti, odikyɛ yɛ mukoraati yɛgyina Kristo atemmuo bia ne nyunu, na bɔ ebiala yɛle mmerɛ bɔ né ɔwɔ nipadua nanu ne, pa oo, tɛɛ oo, onya ye nwo akatua.

11 Na ɔnate kyɛ yɛse Awurade suronyi nati, yɛne mmenia dwudwo maa bedɛ yɛ bɛdi, Nyameɛ se kyɛbɔ yɛte deinn, na medɛ́ medi kyɛ ɛmɔ ahonim koso se kyɛbɔ yɛte ɔ. 12 Nná kyɛ yesa yɛkamvo yɛ nwo yɛkyire ɛmɔ, mmom yɛmaa ɛmɔnya bɔ ɛmɔ kogyina so bɛkɔfa yɛ bɛkɔhoɔhoa ɛmɔ nwo, kyɛbɔ ɔkɔyɛ a ɛmɔ konya mmuayɛ bɛkɔma mmenia bɔ bɛfa bɔ anyeɛ nwu ye bɛhoɔhoa bɛ nwo, ná ɔtte bɔ ɔwɔ ahone nu ne. 13 Na sɛ yabɔ laen a, yabɔ yama Nyameɛ; na sɛ yɛse nworɛ a, yɛse yɛma ɛmɔ. 14 Na Kristo dɔ né hyɛ yɛ, ofikyɛ yanwu ye kyɛ, sona-horɛ wu mane ebiala, yeti ebiala awu. 15 Owu mane ebiala, kyɛbɔ ɔkɔyɛ a, bɛ bɔ bɛte ase ne ngɔtena ase ngɔma bɛ nwo kõ, mmom bɛkɔtena ase bɛkɔma bɔ owu mane bɛ ne.

16 Yeti, ofi ɛnɛ bɔ ɔkɔ ne, yɛnze ebiala wɔ anwoɔnaen nu kõ. Sɛ ne yɛse Kristo wɔ anwoɔnaen nu a, kesaalae de, yɛnze ye sɔ kõ. 17 Yeti, ebiala bɔ ɔne Kristo ayɛ kõ ne, wayɛ abɔdeɛ foforɛ. Nningyein daa ne apɛ nu; ɛmɔnea, nningyein foforɛ yeɛ wawa ɔ. 18 Nikye biala fi Nyameɛ berɛ, ye yeɛ ɔnate Kristo so asiesie yɛne ye afia, na ɔsom adwuma bɔ ɔfa siesie ɔne afoforɛ afia ne, wafa wawura yɛ sa; 19 yeɛ ole kyɛ, Nyameɛ nate Kristo so yeɛ osiesie ɔne wiase né afia ɔ, na wabu ye nye wagua bɛ mvomsoɛ so.* Na yɛ, yeɛ wafa wawura yɛsa kyɛ, yɛha edwirɛ bɔ ɔfa siesie ɔne mmenia afia ne ɔ. 20 Yeti, yɛgyi Kristo gya nu wɔ aseɛ he aso, ná waayɛ kyɛ Nyameɛ nate yɛ so ɔsrɛ mmenia. Yeti, yɛgyi Kristo gya nu yɛsrɛ ɛmɔ kyɛ: Ɛmɔma bɛsiesie ɛmɔ ne Nyameɛ afia. 21 Ye bɔ né ɔnze bɔne ne, yɛ ti, Nyameɛ fale ye kyɛ ɔte bɔne, kyɛbɔ ɔkɔyɛ a, yɛkɔyɛ ateneneefoɛ wɔ Nyameɛ nyunu.