1 Bekye bɔ yɛhyɛ yebo yɛkamvo yɛ nwo yɛkyire bieku anaa? Anaa kyɛbɔ ebiemɔ yɛ ne, odikyɛ yɛfa krataa bɔ odi yɛ nwo adanzeɛ yɛbakyire ɛmɔ, anaa yedɛ bie yɛfi ɛmɔ berɛ hɔ? 2 Ɛmɔ yeɛ ɛmɔte yɛ krataa bɔ bahworɔ ye wɔ y'ahone so, bɔ ebiala nwu ye, ná ɔkenga ɔ. 3 Na nikye biala kyire kyɛ ɛmɔte Kristo krataa, na yɛ yeɛ yɛte asomvoɛ bɔ yɛ hworɔle ɔ, ɛhe de nná pɛn yeɛ bɛfa bɛhworɔle ɔ, mmom Nyameɛ bɔ ɔte ase ne honhom. Bandworɔ ye wɔ nyɔboɛ so, mmom bɛhworɔle ye wɔ anwoɔnaen so, ahone so.

4 Sɔ ahotɔsoɛ ne yeɛ yɛnate Kristo so anya ye wɔ Nyameɛ nu ɔ. 5 Nná bɔ yɛka yeɛ ole kyɛ, yɛ mmɔdemmɔ yeɛ wamaa yafata kyɛ yɛyɛ nikye* bie ɔ, mmom Nyameɛ yeɛ ɔmaa yɛfata ɔ, 6 ye yeɛ wamaa yafata paa kyɛ yɛyɛ apam foforɛ nanwo asomvoɛ. Yɛtte mmeraa bɔ bahworɔ nanwo asomvoɛ, mmom yɛte honhom ne deɛ, ofikyɛ mmeraa bɔ bahworɔ ne fa sona kɔ ewue nu, nakoso honhom ne de, ɔma ngoa.

7 Mmeraa bɔ ɔfa ewue ba, bɔ bɛhworɔ bɛguale nyɔboɛ so ne wale wɔ anuonyam nu, na ye anuonyam nati Israel mmaa nemɔ angora annea Mose nyunu. Ná sɛ né sɔ anuonyam ne kɔpɛ nu a, 8 nzuati yeɛ honhom bɔ bɛfa bɛma né anuonyam ne ngɔsone ngɔtra ɛhene ɔ? 9 Na sɛ mmeraa bɔ obu kumfɔ ne le anuonyam a, ye de bɔ ɔfa tenenee ba ne konya anuonyam bɔ ɔtra sɔ koraa. 10 Bɔ ɔte yeɛ ole kyɛ, bɔ mmerɛ bie ne ole anuonyam ne po, baye ye anuonyam ne bafi berɛ, ɔnate anuonyam bɔ ɔbo ye deɛ naso nati. 11 Sɛ bɔ né ɔkɔpɛ nu ne le anuonyam a, ye de, bɔ ɔkɔtena berɛ daa ne anuonyam ne kɔbo so koraa.

12 Ɔnate kyɛ yɛle sɔ anidasoɛ nati, yɛfa akukuduro yɛdwudwo, 13 na yɛtte kyɛ Mose bɔ ɔfale nikye katale ye nyunu, kyɛbɔ ɔkɔyɛ a Israel mmaa nemɔ ngonwu bɔ ɔkɔpɛ nu né awieɛ ne. 14 Mmom b'adwene wuli,* na ɛnɛ ne ɛnɛ po, sɛ bɛkenga apam daa ne a, sɔ nikye ne tɛ́ kata bɛ nyunu, ofikyɛ Kristo ngome yeɛ ɔkɔhora kɔye kofi berɛ ɔ. 15 Bɔ ɔte yeɛ ole kyɛ, ɔbaadwu ɛnɛ, sɛ bɛkenga Mose dwirɛ ne a, sɔ nikye ne tɛ́ kata b'ahone so. 16 Nakoso sɛ ebie kakyi ye nwo ba Awurade berɛ a, Awurade ye sɔ nikye bɔ ɔkata ye nyunu ne fi berɛ. 17 Awurade yeɛ ɔte honhom ne, na nekaa biala bɔ Awurade honhom wɔ ne, ahofadie wɔ berɛ. 18 Yeti yɛ mukoraati, mmerɛ bɔ yɛfa yɛ nyunu bɔ yɛkatalle ne yɛda Awurade anuonyam ali kyɛ ahwehwɛ ne, né yɛsesa yɛkɔ suban kõ nala nu fi anuonyam kõ nu kɔ anuonyam bɔ ɔtra sɔ nu, kyɛbɔ Awurade bɔ ɔte honhom ne yɛ ye pɛpɛɛpɛ ne.