1 Meyɛ me nikye te kyɛ ebie bɔ ɔnze nworɛ ne, nakoso mesrɛ ɛmɔ, ɛmɔte me bo. Na ɛmɔ ate me bo po dada. 2 Metwe ɛmɔ nwo kora te kyɛ Nyameɛ, ofikyɛ mahyɛ bɔ kyɛ ngɔfa ɛmɔ ngɔma biaa komapɛ agyaa; sɔ biaa ne yeɛ ole Kristo, na ngɔfa ɛmɔ ngɔma ye kyɛ ababunu* bɔ ɛfiɛ nne ye nwo. 3 Nakoso mesuro kyɛ annea yé a, kyɛbɔ ɛwoo ne fale anyeteɛ laka-lakale Hawa ne, sɔ ala yeɛ ɛmɔ koso, bɛkɔsɛkye ɛmɔ adwene wɔ nahorɛ ne ahoteɛ bɔ odikyɛ ɛmɔfa bɛma Kristo nanwo. 4 Ofikyɛ sɛ ebie ba ɛmɔ berɛ baka Yesu foforɛ nwo dwirɛ, bɔ ɔte sorongo fi bɔ yɛhane nanwo, anaa sɛ ɛmɔnya honhom foforɛ wɔ bɔ ɛmɔli moa benyane ye ne si, anaa nzɛmba bɔ ɔte sorongo fi bɔ ɛmɔ tele nanwo a, ɛberɛ nala, né ɛmɔ alɛ́ bato nu. 5 Nakoso nikye biala nne berɛ bɔ sɔ asomafoɛ atitire nemɔ fa tra me ɔ. 6 Na sɛ me noa yeɛ ɔttele po a, nimdeɛ de nne bie; na yamaa ɛmɔ anwu ɛhe wɔ nikye biala nu, ne atee biala so.

7 Anaa me nwo bɔ mmrɛle ye ase, kyɛbɔ ɔkɔyɛ a bɛkɔma ɛmɔ so ne, ɔte bɔne? Ná anigye bɔ mva ngane Nyameɛ nzɛmba ne ngyirele ɛmɔ, bɔ manne ɛmɔ hwee ne, mayɛ bɔne anaa? 8 Asafo biemɔ nningyein yeɛ nwiale, kyire kyɛ nnɛle, kyɛbɔ ɔkɔyɛ a ngɔsõ ɛmɔ ɔ. 9 Na mmerɛ bɔ nwɔ ɛmɔ berɛ bɔ me nwo hyerele me ne, mamva me haw mando ebiala so, ofikyɛ aliemaa mɔ bɔ bɛfi Makedonia bɛwale ne, bɛfale bɔ mehia biala bɛbrɛle me. Yeti nikye biala nu, mmɔle mmɔden kyɛ mengɔfa me haw mengɔgua ɛmɔ so, na ngɔhɔ so ala ngɔyɛ sɔ. 10 Na mmerɛ bɔ Kristo nwo nahorɛ ne wɔ me nu ne, me nwo bɔ mehoɔhoa wɔ Akaia mandam nanu ne, mengɔyakyi ye lle. 11 Nzuati ɔ? Mennɔ ɛmɔ ti ahɔ anaa? Nyameɛ se kyɛ medɔ ɛmɔ!

12 Na ngɔhɔ so ngɔyɛ bɔ meyɛ nala, kyɛbɔ ɔkɔyɛ a, bɛ bɔ bɛpena nikye bie begyina so, ná bɛne yɛ ayɛ pɛ ne, bɛngonya nikye biala bɛngɔ gyina so, ná bafa bahoɔhoa bɛ nwo. 13 Ofikyɛ sɔ mmenia ne te asomafoɛ ngondombofoɛ, adwumayɛfoɛ bɔ bɛnga nahorɛ, na bayɛ bɛ nwo kyɛ bɛte Kristo asomafoɛ. 14 Ná ɔnyɛ nwanwa, ofikyɛ Satan po kɔ so ala yɛ ye nwo kyɛ ɔte ɔbɔfo pa. 15 Yeti, sɛ ye asomvoɛ yɛ bɛ nwo tenenee asomvoɛ a, ɔnyɛ nwanwa. Nakoso kyɛbɔ bɛ nneyɛɛ te ne, sɔ ala yeɛ bɛ awieɛ kɔyɛ ɔ.

16 Meka ye bieku, nnɛmaa ebiala adwene yɛ ye kyɛ nnne adwene. Nakoso sɛ ɛmɔ adwene yɛ ɛmɔ sɔ po a, ɛmɔfa me sɔ ala, ná wamaa me koso mahoɔhoa me nwo kaa. 17 Bɔ meka ye kesaalae ne, nná Awurade yeɛ mesuesua ye ɔ, mmon meka ye kyɛ ebie bɔ olle adwene bɔ ɔhoɔhoa ye nwo, ná odɛ ye nwo di ɔ. 18 Ɔnate kyɛ mmeni pee hoɔhoa bɛ nwo wɔ anwoɔnaen nu nati, me koso ngɔhoɔhoa me nwo bie. 19 Na ɔnate kyɛ ɛmɔse nworɛ nati, ɛmɔnya bɛ bɔ bɛnze nworɛ nanwo aboterɛ. 20 Na ebiala bɔ ɔfa ɛmɔ yɛ ngoaa, odidi ɛmɔ nwo, osisi ɛmɔ, ɔma ye nwo so wɔ ɛmɔ so, ná ɔbɔ ɛmɔ nye so po ne, ɛmɔnya ye nwo aboterɛ. 21 Ɔyɛ me fɛle paa kyɛ meka ɛhe ɔ, ofikyɛ yɛ de, né yɛyɛ mmerɛ soma.

Nakoso, sɛ bɛkora bɛfa nikye bie bɛhoɔhoa bɛ nwo a, meka ye kyɛ ebie bɔ olle adwene ne, me koso mekora mefa bie mehoɔhoa me nwo. 22 Bɛte Hebrifoɛ anaa? Me koso sɔ ala. Bɛte Israelfoɛ? Me koso sɔ ala. Bɛte Abraham bosofoɛ? Me koso sɔ ala. 23 Anaa bɛte Kristo asomvoɛ? Meye ye noa kyɛ ebie bɔ wabɔ laen ne, me koso nde Kristo somvoɛ paa: Mayɛ adwuma pee matra bɛ, mala prizin pee matra bɛ, bagwa me pee, na mmerɛ pee yeɛ mene ewue bɔle mbu-ne-mbu ɔ. 24 Yudafoɛ agwa me pɛn nnu, na enu biala ne, ɔhale kõ, ahaa bɛgwale me 40, 25 bafa mmakaa babo* me pɛn nza, basi me nyɔboɛ kõ, matena hyep nu maa wabutu me pɛn nza, na mali ɛpo kunu eyia ne kɔngɔen le. 26 Matu atee pee, na asane pee ato me wɔ nzue so, awiefoɛ sanu, me bɔbɔ me mmenia sanu, maen-maen nanufoɛ sanu, kuro nu, eburo, ɛpo so, aliemaa ngondombofoɛ sanu. 27 Adwuma bɔ ɔyɛ se ne ɛfɛɛ, nnaa po ne menna bie, ɛhɔen ne nzuhɔen, mmerɛ pee né mennya aleɛ menni, ayirɛ huni me, na né menya atadeɛ menwura. 28 Ɛhemɔ la ahameɛ a, daa biala, ne nikye foforɛ hyɛ me so, na ɛhene yeɛ ole asafo namukoraati nwo dadwene. 29 Nwa yeɛ ɔyɛ mmerɛ a, me koso menyɛ mmerɛ ɔ? Nwa yeɛ bɛto ye sintidua a, ɔnha* me ɔ?

30 Sɛ ngɔhoɔhoa me nwo a, nningyein bɔ okyire kyɛ meyɛ mmerɛ ne, ɛhene yeɛ ngɔfa ngɔhoahoa me nwo ɔ. 31 Edwirɛ bɔ meka ne, Nyameɛ bɔ ɔte y'Awurade Yesu Kristo Baba, bɔ odikyɛ yɛye Ye ayɛ daa ne, ɔse kyɛ me nnaka. 32 Mmerɛ bɔ nwɔ Damasko ne, né amrado bɔ owura Ɔhene Areta bo ne sisa kuro ne pena me kye me, 33 nakoso, bɛfale me bɛsiele kɛndɛn nu, na bɛdwurale me bɛfale bɔen bie bɔ ɔla fasue nanwo nanu maa nwatili, yeti wannya me.