1 Afei aliemaa mɔ, yɛpena kyɛ ɛmɔnwu adom bɔ Nyameɛ afa alo asafo ahoroɛ bɔ ɔwɔ Makedonia ne. 2 Amaneɛ nwora bɔ bɛnwu ye wɔ nzɔhwɛ pirikua he anu, bɛ anigye mmorosoɛ, ɔne bɛ hiaa buburoo ne amaa bɛ adɔyɛ ne abo so. 3 Ofikyɛ bɛyɛle bɔ bɛkɔhora biala, na medi bɛ nwo adanzeɛ kyɛ bɛyɛle bɔ ɔbo bɛ anwoserɛ so po, 4 ofikyɛ bɛsrɛle yɛ alaa kyɛ yɛma bɛ atee ma bɛfa bɔ bɛle ye ne bɛbra, kyɛbɔ ɔkɔyɛ a, adwuma* bɔ yɛyɛ yɛfa yɛboka akrongronfoɛ bɔ bɛ nwo ahyere bɛ ne, bɛ konya ye nwo atee bɛkɔyɛ bie. 5 Bɔ ne yɛnea atee ne po de, bɛyɛle maa ɔtrale sɔ, ofikyɛ Nyameɛ pɛ ti, bɛli moa bɛfale bɛ nwo bɛmane Awurade, afei bɛfale bɛ nwo bɛmane yɛ. 6 Yeti, yasrɛ Tito kyɛ adwuma bɔ ɔhyɛle yebo wɔ ɛmɔ nu ne, ɔɔtoa so, na odidɛ bɔ ɛmɔfi ɛmɔ ahone nu ɛmɔfa bɛma ne. 7 Afei koso, nikye biala abu ɛmɔ so: gyidie, dwudwolɛ, nimdeɛ, mmɔdemmɔ, ne ɔdɔ bɔ yɛdɔ ɛmɔ ne. Yeti bɔ ɛmɔfi ɛmɔ ahone nu bɛfa bɛma ne, ɛmɔyɛ ma ɔbo so. 8 Ɔtte kyɛ mehyɛ ɛmɔ, mmom mepena kyɛ ɛmɔnwu mmɔden bɔ ebiemɔ bɔ ne, né wamaa manwu ɔdɔ kaenn bɔ ɛmɔle ye ne. 9 Nnaa ɛmɔse adom bɔ ne y’Awurade Yesu Kristo le ye ne. Ɔwɔ nu kyɛ ne wanya ye nwo, nakoso ɛmɔ ti ɔɔyɛle hianiɛ, kyɛbɔ ɔkɔyɛ a, ɛmɔ nate ye hiaa naso konya ɛmɔ nwo. 10 M’adwene bɔ mekyire ye wɔ ɛhe anwo yeɛ ole kyɛ: Sɛ ɛmɔyɛ bɔ meka ne a, ɔkɔboka ɛmɔ. Ofikyɛ afoɛ hene yeɛ ɛmɔ hyɛle yebo kyɛ ɛmɔyɛ ɛhe, na ne ɛmɔ nye aboro paa kyɛ ɛmɔ kɔyɛ. 11 Yeti kesaalae, ɛmɔyie bɔ ɛmɔ hyɛle yebo ne. Na kyɛbɔ ne ɛmɔ nye aboro kyɛ ɛmɔ kɔyɛ ne, ɛmɔnea bɔ ɛmɔle ye naso, na ɛmɔfa sɔ ahokeka ne bɛyie. 12 Ofikyɛ sɛ ebie le ɔpɛ kyɛ ɔkɔboka a, bɔ ole ye ne yeɛ ɔsɔ anyeɛ ɔ, na ɔtte bɔ olle ye ne. 13 Ɔtte kyɛ mepena kyɛ ɔyɛ mmerɛ ma ebiemɔ, na ɛmɔ de ɔyɛ se ma ɛmɔ, mmom mepena kyɛ nikye biala kyɛ pɛpɛɛpɛ, 14 na bɔ wabo ɛmɔ so kesaalae ne amaa banya bɔ behia ɔ, na bɔ wabo bɛ so ne amaa ɛmɔ anya bɔ ɛmɔ hia ɔ, na nikye biala ahyɛ pɛpɛɛpɛ. 15 Ofikyɛ, kyɛbɔ bahworɔ ne:

"Bɔ ɔsesale pee ne, ye deɛ ne ammo so,

na bɔ ɔsesale kaa ne, ye deɛ ne anyɛ kaa soma."

16 Yɛda Nyameɛ ase paa kyɛ wafa wawura Tito ahone nu kyɛ ɔdwene ɛmɔ nwo, kyɛbɔ yɛdwene ɛmɔ nwo nala, 17 ofikyɛ adesrɛdeɛ bɔ yɛfa yɛtole ye nyunu ne, wale wato nu. Na ɔnate kyɛ ye nye gye ye nwo kyɛ ɔkɔyɛ nati, ye bɔbɔ yenwa ɔba ɛmɔ berɛ. 18 Nakoso yɛsoma aliemaa bɔ nzɛmba nati, asafo namukoraati kamvo ye ne maa ɔne ye ba. 19 Nná ɛhene angome, mmom asafo ahoroɛ ne aye ye kyɛ ɔboka yɛ so, mmerɛ bɔ yɛfa sɔ akyɛdeɛ he yɛkɔ nekaa ahoroɛ yɛfa yɛhyɛ Awurade anuonyam, na yɛfa yɛkyire kyɛ yɛpena kyɛ yɛboka ne. 20 Kyɛbɔ ɔkɔyɛ a, ɛhe nngɔma ebiala ngɔkeka ye nwo dwirɛ tɛɛ, mmerɛ bɔ yɛkyekyɛ nningyein bɔ bafia bɛ kunu bafa bawa ne. 21 Na yɛbɔ mmɔden kyɛ yɛkɔyɛ nikye biala pɛpɛɛpɛ, nná Awurade nyunu ngome, mmom kuro sona koso nyunu.

22 Yesa yɛsoma yɛliema kõ yɛboka bɛ so. Ye de, yasɔ ye yanea, na yanwu ye kyɛ ɔbɔ mmɔden wɔ nningyein pee nu, na kesaalae po de, ɔnate ahotɔsoɛ bɔ wanya ye wɔ ɛmɔ nu nati, ye mmɔdemmɔ ne ayɛ piri paa. 23 Sɛ ɛmɔpena kyɛ ɛmɔnwu Tito nwo dwirɛ pee a, ɔboka me so, na mene ye yeɛ yɛyɛ adwuma yɛboka ɛmɔ ɔ, na yɛliema nemɔ koso, bɛte asafo ahoroɛ nemɔ asomafoɛ, ɔne Kristo anuonyam. 24 Yeti ɛmɔla ɔdɔ ali behyire bɛ, na ɛmɔma asafo nemɔ nwu bɔ yeti yeɛ yɛfale ɛmɔ yɛhoɔhoale yɛ nwo ne.