1 Na adwuma* bɔ yɛfa yɛboka akrongronfoɛ ne de, ye nwo nhia kyɛ metworɔ ye nwo krataa mebrɛ ɛmɔ, 2 ofikyɛ, mese kyɛ ɛmɔ ayɛ krado kyɛ ɛmɔ kɔboka, na mefa ɛmɔ mehoɔhoa me nwo mekyire Makedoniafoɛ ne kyɛ, afoɛ hene yeɛ Akaiafoɛ nemɔ boɔboale bɛ nwo kyɛ bɛkɔboka ɔ. Ná ɛmɔ mmɔdemmɔ ne akanyan bɛ nu pee. 3 Nakoso mesoma aliemaa hemɔ, kyɛbɔ ɔkɔyɛ a, yɛ nwo bɔ yɛfale ɛmɔ yɛhoɔhoale ne, ɔngɔyɛ mbaen, na wamaa ɛmɔ ayɛ krado kyɛ ɛmɔ kɔboka, kyɛbɔ ngane nala. 4 Wanyɛ sɔ, ná Makedoniafoɛ nemɔ ne me ba, na bɛ banwu kyɛ ɛmɔyɛlle ye nwo hwee a, nná yɛ ngome yeɛ yɛ nyunu kogua ase kyɛ yɛfale yɛ nwo yɛtole ɛmɔ so ɔ, ɛmɔ koso, ɛmɔ kɔfɛle paa. 5 Yeti, menwu ye kyɛ ye nwo hia kyɛ mesrɛ aliemaa nemɔ maa bɛdi moa bɛba ɛmɔ berɛ, ná wamaa ɛmɔ apena akyɛdeɛ bɔ ɛmɔ hyɛle ye nwo bɔ ne bato berɛ. Ɛhene kohyire kyɛ ɛmɔ bɔbɔ yeɛ ɛmɔfi ɛmɔ ahone nu bɛfa bɛma ɔ, na ɔtte kyɛ yɛhyɛ ɛmɔ.

6 Na odikyɛ ɛmɔnwu ye kyɛ, bɔ odua kaa bie ne kɔpɛ kaa bie,* na bɔ odua pee ne kɔpɛ pee. 7 Bɔ ebiala asusu ye nwo wɔ ye ahone nu ne, ɛhene yeɛ ɔyɛ ɔ, nnɛmɔ maa ɔyɛ amemenenfi anaa ɔhyɛ, ofikyɛ bɔ ofi ye ahone nu kyɛ nikye ne yeɛ Nyameɛ kuro ye dwirɛ ɔ. 8 Afei koso, Nyameɛ kɔhora kɔmaa ye adom ne kobu ɛmɔ so, kyɛbɔ ɔkɔyɛ a mmerɛ biala, ɛmɔ konya bɔ ɔkɔso ɛmɔ wɔ nikye biala nu, na ɛmɔ anya pee bafa baboka adwuma pa biala. 9 Na kyɛbɔ bahworɔ ne:

"Wafia ye kunu wahyɛ nningyein,* wahyɛ ahiafoɛ nikye.

Ye tenenee wɔ berɛ afebɔɔ."

10 Ye bɔ ɔmaa kuaniɛ nya mmaa dua, ná ɔma mmenia aleɛ maa bɛdi ne, ɔkɔmaa mmaa bɔ ɛmɔ dua ne kɔsone, na ɔkɔmaa ɛmɔ kɔpɛ ɛmɔ tenenee so mmaa pee. 11 Ɛmɔ konya ɛmɔ nwo wɔ nikye biala nu, na ɛmɔ afa bie bayɛ adɔyɛ, na ɔnate yɛ so, mmenia kɔla Nyameɛ ase. 12 Ná adwuma* bɔ yɛfa yɛboka mmenia ne, nná akrongronfoɛ ne ngome yeɛ wamaa banya bɔ behia ɔ, mmom ɔmaa mmenia nya nningyein pee bɔ bɛkogyina so, na bafa asennaa pee bama Nyameɛ. 13 Adwuma* bɔ yɛyɛ yɛboka bɛ bɔ bɛ nwo ahyere bɛ ne maa benya adanzeɛ bɛhyɛ Nyameɛ anuonyam. Ofikyɛ bɔ ɛmɔyɛ ne kyire kyɛ, ɛmɔ bɔbɔ ɛmɔfa Kristo nwo nzɛmba bɔ ɛmɔka bɛkyire mmenia ne bɛbɔ ɛmɔ bra. Nná ɛhene ngome, ɛmɔfi ɛmɔ ahone nu bɛfa ɛmɔ ndoboa bɛma bɛ ne ebiala. 14 Na bɛsrɛ* bɛma ɛmɔ bɛfa bɛkyire kyɛ bɛkuro ɛmɔ dwirɛ, ɔnate Nyameɛ adom bɔ wabo ɛmɔ so nati. 15 Asennaa ha Nyameɛ wɔ ye akyɛdeɛ bɔ olle ye noa nanwo.