1 Ɛmɔhɔ so bɛdodɔ ɛmɔ nwo kyɛ aliemaa mɔ. 2 Nnɛmɔbu ɛmɔ nye bɛgua ɛwɔfoɛ bɔ ɛmɔkole bɛ naso, ofikyɛ ebiemɔ nate sɔ atee he aso lɛle abɔfo wale b’awuro bɔ né bɛnze ɔ. 3 Bɛ bɔ bɛla prizin ne, ɛmɔkaye bɛ te kyɛ ɛmɔ ne bɛ yeɛ bɛla berɛ ɔ; na bɛ bɔ bɛteetee bɛ ne, ɛmɔkaye bɛ te kyɛ ɛmɔ ne bɛ yeɛ bɛnwu amaneɛ ɔ. 4 Ɛmɔ mukoraati, ɛmɔli agyaa ni, ná nnɛmɔ gua agyaa mba nwo fiɛ, ofikyɛ Nyameɛ kobu adwamammɔfoɛ ne bɛ bɔ bɛsɛkye agyaa ne atɛn. 5 Nnɛmɔ maa ɛmɔ nye boro sikaa wɔ ɛmɔ abrabɔ nu lle, mmom ɛmɔma ɛmɔ nye sɔ bɔ ɛmɔle ye nala, ofikyɛ Nyameɛ aha kyɛ:

"Mengɔyakyi wɔ,

na mengɔ ye me nye mengɔma wɔ lle."

6 Yeti, yɛkora yɛfa akukuduro yɛka kyɛ:

"Awurade te me bokafoɛ, menzuro.

Nzu yeɛ dasaniɛ kɔhora kɔyɛ me ɔ?"

7 Ɛmɔkaye bɛ bɔ bɛli ɛmɔ nyunu, bɔ bɛhane Nyameɛ dwirɛ bɛhyirele ɛmɔ ne. Ɛmɔnea kyɛbɔ b’abrabɔ koyie bɛ, na ɛmɔsuesua bɛ gyidie. 8 Kyɛbɔ ne Yesu Kristo te anoma ne, sɔ ala yeɛ ɔte ɛnɛ, ɔne daa ɔ. 9 Nnɛmɔ maa ngyerɛkyerɛ foforɛ biala twe ɛmɔ fi atee paa naso, ofikyɛ ɔte pa kyɛ adom kɔhyɛ ahone né nguraen tra kyɛ aleɛ* kɔhyɛ ye nguraen; ofikyɛ bɛ bɔ bamaa aleɛ* alɛ́ b’adwene ne, bennya mvasoɛ biala wɔ so.

10 Afɔleɛ bokyea bɔ yɛle ye ne de, bɛ bɔ bɛyɛ adwuma wɔ tɛnt nanu ne, belle ye nwo atee kyɛ bɛdi nikye bɔ ɔwɔ so ne bie. 11 Ngaka bɔ né sɔfo panyi ne fa bɛ mogya kɔ krongron nu krongron berɛ kɔbɔ bɔne nwo afɔleɛ ne, né bɛyera bɛ fuin ne wɔ nekaa bɔ basikye ne si. 12 Ɛhe ati, Yesu koso nwuni amaneɛ wɔ kuro ne anoa ne si, kyɛbɔ ɔkɔyɛ a, ɔkɔfa ye bɔbɔ ye mogya kɔte mmenia nanwo. 13 Yeti, ɛmɔma yɛhɔ ye berɛ wɔ nekaa bɔ basikye ne si, na yɛɛsoa ye animguaseɛ ne bie. 14 Ofikyɛ ɛwa de, yɛlle kuro biala bɔ ɔwɔ berɛ daa, mmom yɛnea kuro bɔ ɔba né atee paa. 15 Yeti, ɛmɔma yɛfa ye so yɛbɔ ayɛyie afɔleɛ yɛma Nyameɛ daa, na ɛhene yeɛ ole yɛ noa bɔ yɛkɔfa yɛkɔbɔ ye dumaa wɔ mmenia nu ne. 16 Nnɛmɔ maa ɛmɔ wora fi kyɛ ɛmɔ kɔyɛ mmenia pa, na ɛmɔ ne bɛ ahyɛ nningyein bɔ ɛmɔle ye ne, ofikyɛ Nyameɛ nye sɔ afɔleɛ bɔ ɔte sɔ ne paa.

17 Ɛmɔyɛ sotie bɛma bɛ bɔ bɛli ɛmɔ nyunu ne, na ɛmɔbrɛ ɛmɔ nwo ase bɛma bɛ, ofikyɛ bɛ yeɛ bɛnea ɛmɔ kra so ɔ, na bɛkobu ye nwo ngondaa. Yeti, ɛmɔma bɛfa anigye bɛyɛ adwuma ne, nnɛmɔ maa bɛfa aworaborɛ bɛyɛ, wanyɛ sɔ a, ongosi ɛmɔ yé.

18 Ɛmɔbɔ mbaeɛ bɛma yɛ, ofikyɛ yedɛ yɛdi kyɛ yɛle ahonim pa, na yɛpena kyɛ yɛdi nahorɛ wɔ nikye biala nu. 19 Na bɔ mesrɛ ɛmɔ paa yeɛ ole kyɛ, ɛmɔbɔ mbaeɛ kyɛbɔ ɔkɔyɛ a, bɛkɔyakyi me bɛkɔma ɛmɔ ndɛ ɔ.

20 Afei asomdwie Nyameɛ bɔ ɔnate apam bɔ ɔwɔ berɛ daa ne mogya naso tingyele y’Awurade Yesu, bɔ ɔte mmoan-nneafoɛ panyi ne fili awufo nu ne, 21 ɔma ɛmɔ nikye pa biala bɔ ɔkɔmaa ɛmɔ kɔyɛ ye apɛdeɛ. Na ɔfa Yesu Kristo so yɛ yɛnu adwuma ma yɛyɛ bɔ ɔkuro ɔ, ye yeɛ anuonyam ha ye daa daa. Amen.

22 Aliemaa mɔ, mesrɛ ɛmɔ, ɛmɔnya aboterɛ betie me afutuo he, ofikyɛ me krataa ne, ɔnwale.

23 Mepena kyɛ ɛmɔnwu ye kyɛ, bayakyi yɛliema Timoteo. Na sɛ ɔba ndɛ a, mene ye kɔɔnea ɛmɔ boso.

24 Ɛmɔhyea bɛ bɔ bɛli ɛmɔ nyunu ne akrongronfoɛ namukoraati bɛma me.

Bɛ bɔ bɛwɔ Italy ne nwa bɛkyea ɛmɔ.

25 Adom ha mɔ mukoraati.