1 Yeti, ɔnate kyɛ bɔhyɛ tɛ́ wɔ berɛ kyɛ yɛkɔhora yɛkowura ye nwomeɛ nu nati, ɛmɔma yɛnea yé, wanyɛ sɔ a, ɛmɔ nu biemɔ sa ngɔha bɔhyɛ ne. 2 Ofikyɛ yɛ koso, baha nzɛmba ne bahyire yɛ, kyɛbɔ bɛha bɛhyirele bɛ nala; nakoso, mvasoɛ biala amma so amma bɛ, ofikyɛ banne banni. 3 Yɛ bɔ yale yali ne de, yahɔ sɔ nwomeɛ nanu kyɛbɔ ɔhane nala; ɔhane kyɛ:

"Mvɛle yaa ngane ndaen kyɛ:

‘Bengowura me nwomeɛ nu lle.’ "

Ɔwɔ nu, mmerɛ bɔ bɛhyɛle ewiase nabo ne, né wayie ye adwuma. 4 Ofikyɛ ɔhane kyẽa bɔ ɔtɔ so nzoo nanwo dwirɛ wɔ nekaa bie kyɛ: "Na kyẽa bɔ ɔtɔ so nzoo ne, Nyameɛ lɛle ye nwomeɛ fili ye adwuma mukoraati nwo," 5 yeɛ osa hane ye wɔ ɛwa kyɛ:

"Bengowura me nwomeɛ nu lle."

6 Yeti, ɔnate kyɛ ebiemɔ le ye nwo atee kyɛ bɛwura ye nwomeɛ nu, nakoso bɛ bɔ bɛli moa bɛhane nzɛmba ne bɛhyirele bɛ ne de, asoserɛ ti banwura nu ne, 7 Nyameɛ sa hyɛle kyẽa foforɛ tole berɛ kyɛ "Ɛnɛ," na afoɛ pee si ne, ɔhane ye nwo dwirɛ mmerɛ bɔ ɔhane edwirɛ bɔ yali moa yaha ye wɔ David dwein nanu kyɛ:

"Ɛnɛ, sɛ ɛmɔte ye konvi a, nnɛmɔyɛ asoserɛ."

8 Sɛ Yosua fale bɛ hɔle nekaa bɔ bɛkole bɛ nwomeɛ a, ahaa ye si ne, Nyameɛ ngɔha kyẽa foforɛ nwo dwirɛ. 9 Yeti, Nyameɛ mmenia tɛ́ le Homeda bie. 10 Ofikyɛ sona bɔ wawura Nyameɛ nwomeɛ nu ne, ye koso wale ye nwomeɛ wafi ye bɔbɔ ye adwuma nwo, kyɛbɔ Nyameɛ lɛle ye nwomeɛ wɔ ye deɛ nwo ne. 11 Ɛhene ati, ɛmɔma yɛyɛ bɔ yɛkɔhora biala yɛwura sɔ nwomeɛ nanu, ná wamma yɛ nu biala annyɛ asoserɛ bɔ bɛyɛle ne bie.

12 Ofikyɛ Nyameɛ dwirɛ ne te ase, na tumi wɔ nu, na ye noa yɛ nná tra dadeɛ biala bɔ ye nyunu ne ye si pɛ, na ɔkora wura nu tonn kɔpakye-pakye ɔkra ne honhom ne bowue ne fonyi nu, na ɔkora nwu adwene ne nzusuyɛɛ bɔ ɔwɔ ebie ahone nu. 13 Na abɔdeɛ biala nne berɛ bɔ wafea wɔ nyunu ɔ, mmom nikye biala nwo la berɛ, na ɛso abukye pefee wɔ bɔ yɛkobu ngondaa yɛkohyire ye ne nyunu.

14 Yeti, ɔnate kyɛ yɛle sɔfo panyi paa, Nyameɛ awa Yesu bɔ wahɔ anwuro nati, ɛmɔma yɛhɔ so yɛha ye nwo dwirɛ ne yɛhyire mmenia. 15 Ofikyɛ sɔfo panyi bɔ yɛle ye ne, ɔtte ebie bɔ ɔnde yɛ mmerɛyɛ bo, mmom ɔte ebie bɔ basɔ ye banea wɔ nikye biala nu te kyɛ yala, nakoso bɔne nne ye nwo. 16 Yeti, ɛmɔma yɛfa ahotɔsoɛ paa yɛhɔ adom ahennie bia ne nyunu, kyɛbɔ ɔkɔyɛ a, bɛkonwu yɛ anwunvo, na yanya adom bɔ ɔkɔboka yɛ wɔ mmerɛ bɔ ɔsɛ nu.