1 Né sɔ Melkisedek ne te Salem hene, na ne osa te Anwuro-Anwuro Nyameɛ ne sɔfo. Mmerɛ bɔ Abraham huni ahemvo nemɔ, na ɔba ne, ooyiale ye, na ohyirale ye, 2 na Abraham hyɛle nikye biala nu buru mane ye kõ. Bɔ oli moa ne, ye dumaa ne bo kyire "Tenenee Hene," afei ɔte Salem hene, bɔ okyire "Asomdwie Hene." 3 Olle maame, olle baba, na olle abusua biala. Olle ahyɛaseɛ, na olle awieɛ koso, ɔte kyɛ Nyameɛ awa ne, yeti ɔte sɔfo daa.

4 Ɛmɔnea kyɛbɔ osi te sona titire ɔ; nningyein pa bɔ Abusua-panyin Abraham nyane ye wɔ koɛ nanu ne, ɔhyɛle nu buru mane ye kõ. 5 Bɔ ɔte yeɛ ole kyɛ, mmeraa ne ama Lewi mmaa mmrienzua bɔ bɛte asɔfo ne ahyɛdeɛ kyɛ, bɛle taet bɛfi bɛ liema Israelfoɛ nemɔ berɛ; ɔwɔ nu, bɛ koso bɛte Abraham bosofoɛ. 6 Nakoso sɔ biaa he bɔ ɔtte b’abusuaniɛ né lɛle taet fili Abraham berɛ, na ohyirale bɔ bahyɛ ye bɔ ne. 7 Na aporowaa biala nne ye nwo kyɛ, bɔ ɔte piri ne yeɛ ohyira bɔ ɔte kaa ne ɔ. 8 Lewifoɛ nemɔ afa nu de, bɛ bɔ bedɛ taet ne, né bɛte mmenia bɔ bewu, nakoso Melkisedek deɛ ne de, ebie bɔ bali ye nwo adanzeɛ kyɛ ɔte ase daa yeɛ odɛ́ taet ne ɔ. 9 Na sɛ yɛkɔha a, Lewi bɔ odɛ́ taet ne po, ɔnate Abraham so tuale taet. 10 Ofikyɛ mmerɛ bɔ Melkisedek yiale Abraham ne, ne ɔwɔ ye nana ne mogya nu.

11 Bɛnate Lewi asɔfodie naso yeɛ bɛfale mmeraa ne bɛmane Israelfoɛ ne ɔ. Na sɛ Lewi asɔfodie ne maa sona yɛle pɛ a, ye de, nzuati yeɛ ne ye nwo hia kyɛ benya sɔfo foforɛ te kyɛ Melkisedek, na mmom ɔtte kyɛ Aaron ɔ? 12 Na ɔnate kyɛ bɛsesã asɔfodie nati, odikyɛ bɛsesã Mmeraa ne koso. 13 Na sona bɔ sɔ dwirɛ he fa ye nwo ne, ofi abusuakue foforɛ ne, na sɔ abusua ne, bɛ nu biala anyɛ adwuma wɔ afɔleɛ bokyea nanwo lle. 14 Ebiala se ye pefee kyɛ y’Awurade fi Yuda abusua nu, na Mose koso anga ye lle kyɛ, ebie kofi sɔ abusua nanu kɔɔyɛ sɔfo.

15 Bɔ ɔma edwirɛ nanu da berɛ paa yeɛ ole kyɛ, sɔfo foforɛ adwɔso bɔ ɔte kyɛ Melkisedek. 16 Ye de, nná abusua bɔ ofi nu yeɛ ɔmaa ɔbayɛ sɔfo kyɛbɔ bahyehyɛ ye wɔ mmeraa nanu ne, na mmom ɔnate ngoa bɔ ɔnzɛkye ne tumi so. 17 Ofikyɛ bali ye nwo adanzeɛ kyɛ:

"Ɛte sɔfo daa

te kyɛ Melkisedek."

18 Yeti, bafa mmeraa daa ne bato nekaa bie, ofikyɛ ɔtɔ si, na mvasoɛ nne so. 19 Ofikyɛ mmeraa ne amma nikye fee anni mu, na mmom anidasoɛ pa bɔ ɔwale ne yeɛ ɔmaa nikye biala lili mu ɔ, na yɛnate ɛhene aso yeɛ yɛpingye Nyameɛ ɔ.

20 Na ɛhe anu biala ne, né ndaen boka so. 21 (Bɔ ɔte yeɛ ole kyɛ, ebiemɔ yɛle sɔfo bɔ banga bɛ nwo ndaen, nakoso ɛhe de, bɛhane ye nwo ndaen kora yeɛ ɔbaayɛ sɔfo ɔ, na bɔ ɔhane ndaen ne hane kyɛ:

"Awurade ata ndaen, na ɔngɔsesa ye adwene. Ɔhane kyɛ:

‘Ɛte sɔfo daa.’ ")

22 Sɔ ndaen he ti, bafa Yesu bali agyinam bama apam bɔ odi mu tra ɛhene ne. 23 Afei koso, mmeni pee yeɛ ne odikyɛ bɛdi sɔfo ɔ, ofikyɛ ne ewue mma bɛngora bɛndoa so benni sɔfo ne daa, 24 nakoso Yesu de, ɔnate kyɛ ɔte ase daa nati, ebiala ngoli ye bia kyɛ sɔfo. 25 Na bɛ bɔ bɛfa ye so bɛba Nyameɛ berɛ ne, ɔkora dɛ́ bɛ koraa, ofikyɛ ɔte ase daa, na ɔsrɛ ma bɛ.

26 Sɛ yɛnya sɔfo panyi bie sɔa a, ɔte kama paa; ofikyɛ ye de, ɔte krongron, edwirɛ nne ye nwo, ɛfiɛ nne ye nwo, baye ye bafi abɔnefoɛ nu, na bama ye so batra anwuro po. 27 Ye de, ɔtte kyɛ sɔ sɔfo mbanyi bɔ ne odikyɛ daa biala bɛbɔ afɔleɛ bɛpata bɛ bɔne kora ne babɔ bie bama maen ne, ofikyɛ ye de ɔbɔle afɔleɛ ne komapɛ mmerɛ bɔ ɔfale ye nwo bɔle afɔleɛ ne. 28 Afei, mmenia bɔ bɛyɛ mmerɛ yeɛ ne mmeraa ne ye bɛ maa bɛbayɛ sɔfo ɔ, nakoso ndaen bɔ ɔwale mmeraa ne si ne de, ɔyele Baa bɔ bamaa wayɛ pɛ koraa.