1 Yesu hane edwirɛ hemɔ yiele ne, ɔmane ye ti so neane anwuro, na ɔhane kyɛ: "Baba, mmerɛ ne aso. Hyɛ ɛwa ne anuonyam, ná wamaa ɛwa ne koso ahyɛ wɔ anuonyam, 2 ofikyɛ ama ye tumi wɔ mmenia mukoraati so, kyɛ ɔma bɛ bɔ afa bɛ ama ye namukoraati daa ngoa. 3 Sɛ ebie konya daa ngoa a, sana onwu wɔ bɔ ɛte nahorɛ Nyameɛ komapɛ ne, na onwu Yesu Kristo bɔ ɛsomane ye ne koso. 4 Mahyɛ wɔ anuonyam wɔ aseɛ he aso, na mayie adwuma bɔ ɛfa wurale me sa ne. 5 Yeti Baba, anuonyam bɔ ne nne ye wɔ wɔ berɛ kora yeɛ bɛbɔ wiase ne, fa sɔ anuonyam ne ma me wɔ wɔ berɛ.

6 "Mmenia bɔ ɛyele bɛ fili wiase mane me ne, mamaa banwu wɔ dumaa. Né bɛte wɔ deɛ yeɛ ɛfale bɛ mane me ɔ, na bali wɔ dwirɛ so. 7 Kesaalae de banwu kyɛ, nikye biala bɔ afa ama me ne, sãa ofi wɔ berɛ; 8 ofikyɛ edwirɛ bɔ ɛfa mane me ne, mafa mama bɛ, na balɛ́ bato nu, na banwu ye kyɛ, amba mvi wɔ berɛ yeɛ mmale* ɔ; na balɛ́ bali kyɛ wɔ yeɛ ɛsomane me ɔ. 9 Na mesrɛ mema bɛ, menzrɛ memma wiase ne, mesrɛ mema bɛ bɔ ɛfale bɛ mane me ne, ofikyɛ bɛte wɔ deɛ. 10 Nikye biala bɔ nne ye ne te wɔ deɛ, na wɔ deɛ koso te me deɛ, na manya anuonyam wɔ bɛ nu. 11 Me de, nne wiase kõ, nakoso bɛ de, bɛwɔ wiase, na meba wɔ berɛ. Baba bɔ ɛte Krongron, wɔ dumaa bɔ afa ama me nati, nea bɛ so, kyɛbɔ ɔkɔyɛ a bɛkɔyɛ kõ, kyɛbɔ yɛte kõ ne. 12 Mmerɛ bɔ mene bɛ wɔ berɛ ne, wɔ bɔbɔ wɔ dumaa bɔ afa ama me nati, nneane bɛ so; na mmɔle bɛ nwo waen, yeti bɛ nu komapɛ po anzɛkye, sana bɔ ne ɔkɔsɛkye* ne, ná ɔmaa tworɔnzɛm ne wale nu. 13 Kesaalae de meba wɔ berɛ, na meka sɔ dwirɛ hemɔ wɔ wiase nanu, ná wamaa m'anigye ali mu wɔ bɛ nu. 14 Mafa wɔ dwirɛ mama bɛ, nakoso wiase ne kyi bɛ, ofikyɛ bɛ bokka wiase naso, kyɛbɔ me koso mmoka wiase naso ne. 15 Nná bɔ mesrɛ yeɛ ole kyɛ, ye bɛ fi wiase, mmom ɔbɔnefoɛ nati, mesrɛ wɔ, bɔ bɛ nwo waen.* 16 Bɛ bokka wiase naso, kyɛbɔ me koso mmoka wiase naso ne. 17 Fa nahorɛ ne te bɛ nwo; wɔ dwirɛ ne te nahorɛ. 18 Kyɛbɔ ɛsomane me wale wiase ne, sɔ ala yeɛ me koso mesoma bɛ wɔ wiase ɔ. 19 Meyɛ me nwo krongron* mema bɛ, kyɛbɔ ɔkɔyɛ a nahorɛ ne kɔmaa bɛkɔyɛ krongron.*

20 "Menzrɛ memma bɛ ngome, mmom mesrɛ mema bɛ bɔ ɔnate bɛ dwirɛ naso, bɛkole me bɛkoli ne koso, 21 né wamaa bɛ mukoraati bayɛ kõ, kyɛbɔ Baba, ɛwɔ me nu, na me koso nwɔ wɔ nu ne, ná bɛ koso bɛne yɛ ayɛ kõ, kyɛbɔ ɔkɔyɛ a wiase ne kole koli kyɛ wɔ yeɛ ɛsomane me ɔ. 22 Anuonyam bɔ ɛfa mane me ne, mafa mama bɛ, na wamaa bayɛ kõ, kyɛbɔ yɛte kõ ne. 23 Nwɔ bɛ nu, na wɔ koso ɛwɔ me nu, ná wamaa bɛ koso bayɛ kõ paa, kyɛbɔ ɔkɔyɛ a wiase ne konwu kyɛ wɔ yeɛ ɛsomane me ɔ, na kyɛbɔ ɛdɔ me ne, sɔ ala yeɛ ɛdɔ bɛ ɔ. 24 Baba, bɛ bɔ afa bɛ ama me ne, mepena kyɛ bɛba boka me so wɔ nekaa bɔ nwɔ ne, né wamaa banwu anuonyam bɔ afa ama me ne, ofikyɛ ne ɛdɔ me kora yeɛ bɛhyɛ wiase bo ɔ.

25 "Tenenee Baba, ɔwɔ nu kyɛ wiase ne nze wɔ, nakoso me de, mese wɔ, na ɛhemɔ anwu ye kyɛ wɔ yeɛ ɛsomane me ɔ. 26 Mamaa banwu wɔ dumaa, na ngɔhɔ so ngɔmaa bɛkonwu ye, ná wamaa ɔdɔ bɔ ɛle ye ma me né atena bɛ nu, na me koso matena bɛ nu."*