1 Afei Pilato maa bɛgwale Yesu. 2 Na sogyafoɛ nemɔ fale mmowie yɛle abotire, na bɛfa bɛwurale ye ti, yeɛ bɛfale atadeɛ bɔ ye kɔla te valent* bɛwurale ye. 3 Na bɛwale ye nwo berɛ bɛɛhane kyɛ: "Yudafoɛ hene, wɔ ngoa so oo!" Na bɛbobɔle ye nye so. 4 Pilato sa hɔle aluo dɔ, na ɔha hyirele bɛ kyɛ: "Ɛmɔnea! Mefa ye mebrɛ ɛmɔ, ne wamaa ɛmɔ anwu kyɛ, menwu mvomsoɛ biala wɔ ye nwo." 5 Yeti Yesu fitele, né owura mmowie abotire ne, ɔne atadeɛ valent ne. Yeɛ Pilato hane kyɛ: "Ɛmɔnea! Brienzua ne ɛhe!" 6 Nakoso, mmerɛ bɔ sɔfo mbanyi ne asomvoɛ nemɔ nwuni ye, bɛteɛteane nu kyɛ: "Bɔ ye asɛnnua nu! Bɔ ye asɛnnua nu!" Pilato hane kyɛ: "Ɛmɔ bɔbɔ ɛmɔɔbɔ ye asɛnnua nu, ofikyɛ me de, mennwu mvomsoɛ biala wɔ ye nwo." 7 Yudafoɛ nemɔ hane kyɛ: "Yɛle mmeraa, na ɛnea yɛ mmeraa nanu a, ɔfata ewue, ofikyɛ wayɛ ye nwo kyɛ ɔte Nyameɛ awa." 8 Mmerɛ bɔ Pilato tele bɔ bɛka ne, esuronyi hane ye paa, 9 Yeti owurale sua nanu bieku, na obisale Yesu kyɛ: "Nisua yeɛ efi ɔ?" Nakoso Yesu amma ye mmuayɛ biala. 10 Yeti Pilato hane kyɛ: "Ɛngɔtɛ me so? Ɛnze kyɛ nne tumi kyɛ meyakyi wɔ, na nne tumi kyɛ me maa bɛbɔ wɔ asɛnnua nu?" 11 Yesu yele ye noa kyɛ: "Sɛ bamva bamvi anwuro bamma wɔ a, ahaa ɛngonya tumi biala wɔ me so. Yeti yeɛ bɔ ɔyele me mane wɔ ne, ye bɔne te piri paa ne."

12 Ɛhe ati, né Pilato pena kyɛ ɔfa atee bie so yakyi ye, nakoso Yudafoɛ nemɔ hane kyɛ: "Sɛ ɛyakyi biaa he a, né Kaesare tte wɔ damvo. Ebiala bɔ ɔyɛ ye nwo kyɛ ɔte ɔhene ne, né odwɔso tia Kaesare." 13 Mmerɛ bɔ Pilato tele sɔ ne, ɔfale Yesu fitele, na ɔtenane atemmuo bia sɔ wɔ nekaa bɔ bɛfrɛ berɛ Nyɔboɛ Pato ne, Hebri nu de, bɛfrɛ berɛ Gabata. 14 Né sɔ kyẽa ne te Pɛnu né Anwoboaboa kyẽa, na né wabɔ kɔyɛ eyia 12:00.* Na Pilato ha hyirele Yudafoɛ nemɔ kyɛ: "Ɛmɔnea, ɛmɔ Hene ne ɛhe!" 15 Nakoso bɛteɛteane nu kyɛ: "Fa ye kɔ! Fa ye kɔ! Bɔ ye asɛnnua nu!" Pilato bisale bɛ kyɛ: "Mmɔ ɛmɔ hene ne asɛnnua nu?" Sɔfo mbanyi nemɔ hane kyɛ: "Ɔhene bɔ yele ye ala yeɛ ole Kaesare!" 16 Na ɔfale ye mane bɛ kyɛ bɛɛbɔ ye asɛnnua nu. Yeti bɛfale Yesu bɛhɔle. 17 Na ɔsoale ye asɛnnua ne fili berɛ hɔle nekaa bɔ bɛfrɛ berɛ "Tire Kokuroka" ne; Hebri nu ne, bɛfrɛ ɛberɛ Golgota. 18 Ɛberɛ yeɛ bɛbɔle Yesu ne mmrienzua nyɔ bie asɛnnua nu ne. Né kõ wɔ ye bɛen, yeɛ ne kõ wɔ ye famaa, na né Yesu wɔ bɛ afia. 19 Pilato hworɔle edwirɛ bie bɔle asɛnnua ne tiafia kyɛ:

"NAZERƐTNIƐ YESU,

YUDAFOƐ HENE NE."

20 Yudafoɛ pee kengale sɔ dwirɛ ne, ofikyɛ nekaa bɔ bɛbɔle Yesu asɛnnua nu ne, né opingye kuro ne, na bɛhworɔle ye wɔ Hebri, Latin ne Greek nu. 21 Nakoso Yudafoɛ sɔfo mbanyi ne ha hyirele Pilato kyɛ: "Nnɛtworɔ ye kyɛ ‘Yudafoɛ Hene ne,’ mmom ‘Ne ɔka kyɛ, Nde Yudafoɛ Hene.’ " 22 Pilato ha hyirele bɛ kyɛ: "Bɔ mahworɔ ala yeɛ mahworɔ ɔ."

23 Sogyafoɛ nemɔ bɔle Yesu asɛnnua nu bɛyiele ne, bɛfale ye atadeɛ bɔ ɔfa gua ye so ne, na bɛhyɛle nu nná maa ebiala fale kõ. Na besa bɛfale ye atadeɛ bɔ owura yebo ne, nakoso ɛhene de, né banwo ye mukoraati bafi anwuro baadwu ase, na nekafee nne berɛ bɔ ne bapa ɔ. 24 Yeti, bɛha bɛhyirele bɛ nwo kyɛ: "Nnɛmɔ maa yɛtete nu, mmom ɛmɔma yɛtɔɔso* na yɛnea bɔ ɔkɔyɛ ye deɛ ɔ." Ɛhe maa tworɔnzɛm ne wale nu kyɛ,

"Bɛhyɛle me tena ne bɛfale,

na m'atadeɛ ne koso, bɛbɔle so ndondo."

Sogyafoɛ nemɔ yeɛ bɛyɛle sɔ ne.

25 Né Yesu maame, ye maame aliema brasua, Klopa aye Mary, ne Mary Magdalene gyi asɛnnua ne bo berɛ. 26 Yeti mmerɛ bɔ Yesu nwuni ye maame ne suaniɛ bɔ okuro ye dwirɛ ne kyɛ bɛgyi berɛ ne, ɔha hyirele ye maame kyɛ: "Maame, nea, ɛwa brienzua ɛhe!" 27 Yeɛ ɔha hyirele suaniɛ ne kyɛ: "Nea, wɔ maame ɛhe!" Na ofi sɔ mmerɛ ne, suaniɛ ne fale ye hɔle ye awuro.

28 Ɛhemɔ si ne, mmerɛ bɔ Yesu nwuni kyɛ nikye biala awa awieɛ ne, bɔ ɔkɔyɛ ne tworɔnzɛm ne awa nu ne, ɔhane kyɛ: "Nzuhɔen ku me." 29 Ne bua bie gyi berɛ, na ne nzãa bɔ enu ka ayi ye dɛen. Yeti, bɛfale eminaen bɛbɔle nzãa nanu, na bɛfa bɛtuale bakaa bie so, yeɛ bɛfa bɛhɔle ye noa. 30 Nzãa bɔ enu ka ne hane Yesu noa ne, ɔhane kyɛ: "Wayie!" Na osili ye ti ase, yeɛ owuli ɔ.

31 Né sɔ kyẽa ne te Anwoboaboa kyẽa, na né kyẽa bɔ oli berɛ ne te Homeda piri, yeti bɔ ɔkɔyɛ ne fuin nemɔ anga asɛnnua naso Homeda ne, Yudafoɛ nemɔ ha hyirele Pilato kyɛ, ɔma bɛbubu bɛ gya nanu, na bɛye fuin nemɔ bɛfi berɛ. 32 Yeti sogyafoɛ nemɔ wale, na bɛ bubuli abrandeɛ bɔ oli moa ne gya nu. Afei kõ bɔ bɛbɔle ye asɛnnua nu bɛbokale ye so ne koso, bɛ bubuli ye gya nanu. 33 Nakoso bɛwale Yesu nwo berɛ ne, bɛnwuni kyɛ wawu dada, yeti bammubu ye gya nu. 34 Nakoso, sogyafoɛ nanu kõ fale pea wɔle ye mvenu, na ɛberɛ ala, mogya ne nzue fili ye nu wale. 35 Na sona bɔ onwuni ɛhe ne, olili ye nwo adanzeɛ, na ye adanzeɛ ne te nahorɛ; na ye de, ɔse kyɛ bɔ ɔka ne te nahorɛ, kyɛbɔ ɔkɔyɛ a, ɛmɔ koso, ɛmɔkole bɛkoli ɔ. 36 Bɔ ɔte yeɛ ole kyɛ, sɔ dwirɛ hemɔ wale nu, ná wamaa tworɔnzɛm ne awa nu kyɛ: "Bɛngɔbu ye bowue komapɛ po nu." 37 Na tworɔnzɛm foforɛ koso ka kyɛ: "Bɛkɔnea bɔ bɛfale pea bɛwɔle ye ne."

38 Ye si ne, Yosef bɔ ofi Arimatea ne, Yesu suaniɛ bɔ Yudafoɛ nanwo suronyi ti wangora wanye ye nyunu ne srɛle Pilato kyɛ, ɔpena kyɛ ɔfa Yesu fuin ne. Na Pilato mane ye atee, yeti ɔɔfale fuin ne hɔle. 39 Na Nikodemo, bɔ mmerɛ bie ɔwale Yesu berɛ kɔngɔen ne wale, na ɔfale kurobo ne pɛprɛ bɔ bafa bafra wale. Ne enu nnunɛ te kɔyɛ kilo 33. 40 Yeti, bɛfale Yesu fuin ne, na bɛfale ayire né bɛguale nwera nanu, yeɛ bɛfale nwera ne bɛkyekyele ye nwo kyɛbɔ Yudafoɛ sie bɛ fuin ne. 41 Na nekaa bɔ bɛbɔle Yesu asɛnnua nu ne, né turo bie wɔ berɛ, na ne asieleɛ foforɛ bie wɔ turo nanu bɔ bɛfalle ebiala bɛtolle nu lle. 42 Na ɔnate kyɛ ne ɔte Yudafoɛ Anwoboaboa Kyẽa nati, bɛfale Yesu bɛɛtole asieleɛ bɔ opingye berɛ nanu.