1 Yesu hane edwirɛ hemɔ yiele ne, ɔne ye asuafoɛ nemɔ fitele, na bɛɛfale Kidron Bɔnza nanu bɛhɔle nekaa bɔ turo ne wɔ ne, na bɛhɔle turo nanu. 2 Né Yuda bɔ ɔkɔye ye kɔma ne koso se berɛ, ofikyɛ né Yesu taa ne ye asuafoɛ nemɔ yianu berɛ. 3 Yeti, Yuda fale sogyafoɛ pee ne asomvoɛ bɔ bɛfi sɔfo mbanyi ne Farisifoɛ nemɔ berɛ wale nekaa bɔ bɛwɔ ne, ne bɛtire-tira tɛen, kanea, ne akodeɛ. 4 Yesu de, né ɔse bɔ ɔkɔto ye biala, yeti, ɔwale bɛ nyunu berɛ, yeɛ obisale bɛ kyɛ: "Nwa yeɛ ɛmɔpena ye ne?" 5 Bɛhane kyɛ: "Yesu, Nazerɛtniɛ ne." Yeɛ ɔha hyirele bɛ kyɛ: "Me ɛhe." Sɔ mmerɛ ne, né Yuda bɔ ɔbaaye ye ma ne koso gyi berɛ bie. 6 Mmerɛ bɔ Yesu hane kyɛ, "Me ɛhe" ne, bɛhɔle bɛ si, na bɛte bɛguale. 7 Yeti osa bisale bɛ kyɛ: "Ɛmɔpena nwa?" Bɛhane kyɛ: "Yesu, Nazerɛtniɛ ne." 8 Yeɛ Yesu hane kyɛ: "Maha mahyire ɛmɔ kyɛ me ane. Yeti sɛ me yeɛ ɛmɔpena me a, ɛmɔma ɛhemɔ hɔ." 9 Ɛhe maa edwirɛ bɔ ɔhane ne wale nu kyɛ: "Bɛ bɔ ɛfale bɛ mane me ne, mamma bɛ nu komapɛ po ammini." 10 Né Simon Petro le dadeɛ wura ye nwo, yeti ɔhwene, na ɔfa pɛle sɔfo panyi ne akoaa ne so famaa tole. Né akoaa ne dumaa li Malkus.* 11 Nakoso Yesu ha hyirele Petro kyɛ: "Fa wɔ dadeɛ ne wura ye bɔha nanu. Kwangoa bɔ Baba ne afa me ne, nnɛmaa meno anaa?"

12 Yeɛ sogyafoɛ nemɔ, bɛ sahene ne, ɔne Yudafoɛ polisifoɛ nemɔ hyele Yesu, na bɛkyekyele ye. 13 Bɛli moa bɛfale ye bɛhɔle Annas berɛ, ofikyɛ né ye sia yeɛ ole Kaiafa bɔ sɔ afoɛ ne, né ɔte sɔfo panyi ne. 14 Kaiafa yeɛ otule Yudafoɛ nemɔ fo kyɛ, ɔte pa kyɛ sona kõ kowu kɔma maen ne.

15 Né Simon Petro ne asuafoɛ nanu kõ li Yesu si. Sɔ suaniɛ ne de, né sɔfo panyi ne se ye, yeti olili Yesu si hɔle sɔfo panyi ne aluo berɛ, 16 nakoso, né Petro gyi anoa ne si dɔ. Yeti suaniɛ bɔ sɔfo panyi ne se ye ne hɔle sona bɔ ogyi anoa nanwo ne berɛ, na ɔne ye dwudwole maa Petro wale nu. 17 Yeɛ afaneɛ bɔ ogyi anoa nanwo ne bisale Petro kyɛ: "Wɔ koso, nnaa ɛboka sɔ bia he asuafoɛ naso?" Nakoso ɔhane kyɛ: "Mmmoka so." 18 Né ayirɛ wɔ nu paa, yeti ne asomvoɛ ne né sogyafoɛ nemɔ afa ɛbunaen asɔ see, bɔ bɛto. Na ne Petro koso gyi berɛ ɔto see ne bie.

19 Na sɔfo panyi ne bisale Yesu ye asuafoɛ nemɔ ne ye ngyerɛkyerɛ nanwo dwirɛ. 20 Yesu yele ye noa kyɛ: "Né medwudwo mekyire wiase ne wɔ badwanu. Né metaa mekyirekyire wɔ asɔre awuro berɛ, ɔne sua bɔ Yudafoɛ yia nu nanu, manga hwee mvealeɛ nu. 21 Ye de, nzuati yeɛ ebisa me ɔ? Bisa bɛ bɔ bɛtele bɔ ngane ne. Nea, ɛhemɔ se bɔ ngane ne." 22 Yesu noa pene nala pɛ, sogyaniɛ bɔ ogyi ye nwo berɛ ne bɔle ye nye so, na ɔha hyirele ye kyɛ: "Sɔfo panyi yeɛ edwudwo kyire ye sɔ ne?" 23 Yesu hane kyɛ: "Sɛ ngane edwirɛ tɛɛ bie a, ka ma ebiala te, nakoso sɛ bɔ ngane ne te nahorɛ a, nzuati yeɛ abɔ me ne?" 24 Yeti, Annas maa bɛkyekyele ye, na bɛfale ye bɛhɔle sɔfo panyi Kaiafa berɛ.

25 Né Simon Petro gyi berɛ ɔto see, yeɛ bɛha bɛhyirele ye kyɛ: "Wɔ koso, nnaa ɛboka ye asuafoɛ naso?" Na ɔsale ye wɔ berɛ kyɛ: "Daabi! Mmmoka so!" 26 Sɔfo panyi ne akoaa bɔ ye nwo niɛ yeɛ ole abrandeɛ bɔ Petro pɛle ye so ne bisale ye kyɛ: "Nwuni kyɛ né ɛboka ye so wɔ turo nanu dɔ, melaka?" 27 Nakoso, Petro sa hane ye bieku kyɛ, ɔtte nahorɛ, na ɛberɛ ala, akɔ bɔle.

28 Na ngyerɛmɔ tutuutu ne, bɛfale Yesu bɛfili Kaiafa berɛ bɛhɔle Amrado né awuro berɛ. Nakoso bɛ bɔbɔ de, banwura awuro berɛ bie, ne bɛmbena kyɛ bɛ nwo gua fiɛ, kyɛbɔ ɔkɔyɛ a bɛkɔhora bɛkoli Pɛnu ne bie. 29 Yeti Pilato fite wale berɛ, na obisale bɛ kyɛ: "Kwaadu beni yeɛ ɛmɔfa bɛbɔ sɔ biaa he ɔ?" 30 Bɛha bɛhyirele ye kyɛ: "Sɛ biaa he yɛlle bɔne* a, ahaa yɛngɔfa ye yɛngɔwa wɔ wa." 31 Yeti Pilato ha hyirele bɛ kyɛ: "Ɛmɔ bɔbɔ ɛmɔfa ye bɛhɔ, ná ɛmɔgyina ɛmɔ mmeraa naso bɛbu ye atɛn." Yudafoɛ nemɔ hane kyɛ: "Yɛ de, mmeraa mma yɛ atee kyɛ yɛhu ebie." 32 Né ɛhe kɔmaa ewue horɛ bɔ Yesu hane kyɛ ɔbaawu ne kɔwa nu.

33 Yeti Pilato sa wurale sua nanu, na ɔfrɛle Yesu bisale ye kyɛ: "Wɔ yeɛ ele Yudafoɛ hene ne?" 34 Yesu koso bisale ye kyɛ: "Wɔ bɔbɔ yeɛ ɛka ɔ, anaa ebiemɔ yeɛ bɛha bɛhyirele wɔ ɔ?" 35 Pilato yele ye noa kyɛ: "Nnaa nnde Yudaniɛ? Wɔ bɔbɔ wɔ mmenia ne, ɔne sɔfo mbanyi nemɔ yeɛ bɛfale wɔ bɛbrɛle me ɔ. Nzu yeɛ ayɛ ɔ?" 36 Yesu hane kyɛ: "M'Ahennie ne, offi wiase. Sɛ m'Ahennie ne fi wiase a, ahaa m'asomvoɛ kɔhõ, ná ahaa bɛngɔpene maa bɛngɔfa me bɛngɔma Yudafoɛ nemɔ. Nakoso kyɛbɔ ɔte ne, m'Ahennie ne, offi wiase." 37 Yeti, Pilato ha hyirele ye kyɛ: "Ye de, nnaa ɛte ɔhene?" Yesu ha hyirele ye kyɛ: "Wɔ bɔbɔ yeɛ ɛka kyɛ nde ɛhene ɔ. Me de, ɛhe ati yeɛ bɛwole me ɔ, na ɛhe ati yeɛ mmale wiase ɔ, kyɛ mebaali nahorɛ ne nwo adanzeɛ. Na ebiala bɔ ɔta nahorɛ ne si ne tie me dwirɛ." 38 Pilato bisale ye kyɛ: "Nzu yeɛ ole nahorɛ?"

Ɔhane ɛhe yiele ne, osa hɔle aluo dɔ, na ɔha hyirele Yudafoɛ ne kyɛ: "Mennwu mvomsoɛ biala wɔ ye nwo. 39 Nakoso ɛmɔle amammerɛ bie kyɛ, sɛ bɛdi Pɛnu biala a, odikyɛ meyakyi sona kõ mema ɛmɔ. Yeti ɛmɔpena kyɛ meyakyi Yudafoɛ hene ne mema ɛmɔ anaa?" 40 Na besa bɛteɛteane nu bieku kyɛ: "Yɛnguro ɛhe, yɛkuro Barabas!" Né Barabas te awieniɛ.