1 "Me yeɛ nne nahorɛ bobe ne, na me Baba yeɛ ole kuaniɛ ne. 2 Asaa* biala bɔ ɔwɔ me nwo, bɔ onzu mmaa ne, ɔpɛ to; na asaa biala bɔ osu mmaa ne de, ɔyeye ye nwo, ná wamaa wasu mmaa pee. 3 Edwirɛ bɔ maha mahyire ɛmɔ nati, ɛmɔ nwo ate dada. 4 Ɛmɔtena me nu, ná me koso ngɔtena ɛmɔ nu. Kyɛbɔ asaa ne bɔbɔ ngora nzu mmaa, sana otua bobe ne nwo ne, sɔ ala yeɛ ɛmɔ koso ɛmɔ ngɔhora bɛngɔsu mmaa, sana ɛmɔ tena me nu. 5 Me yeɛ nde bobe ne, na ɛmɔ yeɛ ɛmɔte asaa ne. Ebiala bɔ ɔkɔtena me nu, na me koso ngɔtena ye nu ne, ye yeɛ osu mmaa pee ɔ; ofikyɛ nne nu a, ɛmɔ ngɔhora hwee yɛ. 6 Sɛ ebie andena me nu a, bɛpɛ ye bɛto te kyɛ bakaa ne sa ne maa owu. Na mmenia sesa sɔ asaa nemɔ, na begyi bɛgua see nu maa ɔyera. 7 Sɛ ɛmɔtena me nu, na me dwirɛ ne tena ɛmɔ nu a, ɛmɔ bisa bɔ ɛmɔ kuro biala, na ɛmɔ sa kɔha ye. 8 Bɔ ɔhyɛ me Baba anuonyam yeɛ ole kyɛ, ɛmɔ kosu mmaa pee, na ɛmɔ ahyire kyɛ ɛmɔte m'asuafoɛ. 9 Kyɛbɔ Baba ne dɔ me ne, sɔ ala yeɛ medɔ ɛmɔ ɔ; ɛmɔhɔ so bɛtena medɔ nu. 10 Sɛ ɛmɔdi m'ahyɛdeɛ so a, ɛmɔ kɔtena medɔ nu, kyɛbɔ mali Baba ne ahyɛdeɛ so, na nde ye dɔ nu ne. 11 Maha ɛhemɔ mahyire ɛmɔ, na wamaa ɛmɔ anya m'anigye ne bie, na ɛmɔ anigye ne ali mu.

12 "Me ahyɛdeɛ yeɛ ole kyɛ, ɛmɔdodɔ ɛmɔ nwo kyɛbɔ medɔ ɛmɔ nala. 13 Ebiala nne berɛ bɔ ole ɔdɔ bɔ ɔtra ɛhe ɔ, kyɛ ebie kɔfa ye ngoa kɔto berɛ kɔma ye nnamvo mɔ. 14 Sɛ ɛmɔdi ahyɛdeɛ bɔ mafa mema ɛmɔ naso a, né ɛmɔte me nnamvo. 15 Mengɔfrɛ ɛmɔ ngoaa kõ, ofikyɛ akoaa nze bɔ ye wura yɛ ɔ; mmom mefrɛ ɛmɔ nnamvo, ofikyɛ bɔ mate mafi me Baba berɛ biala, mamaa ɛmɔ anwu ye. 16 Nná ɛmɔ yeɛ ɛmɔ yele me ɔ, me mmom yeɛ nyele ɛmɔ ɔ. Na nyele ɛmɔ kyɛ, ɛmɔhɔ, na ɛmɔɔsu mmaa, ná ɛmɔ mmaa ne tena berɛ, kyɛbɔ ɔkɔyɛ a, nikye biala bɔ ɛmɔ kobisa Baba ne wɔ me dumaa nu ne, ɔkɔfa kɔma ɛmɔ. 17 Ahyɛdeɛ hemɔ yeɛ mefa mema ɛmɔ ɔ, na wamaa ɛmɔ adodɔ ɛmɔ nwo.

18 "Sɛ wiase tane ɛmɔ a, ɛmɔnwu ye kyɛ wali moa watane me kora yeɛ ɔbaatane ɛmɔ ɔ. 19 Sɛ ɛmɔboka wiase naso a, ahaa wiase ne kohuro bɔ ɔte ye deɛ ne dwirɛ. Nakoso ɔnate kyɛ ɛmɔ bokka wiase naso, na maye ɛmɔ mafi wiase nati, wiase ne tane ɛmɔ. 20 Ɛmɔkaye edwirɛ bɔ nga ngyirele ɛmɔ ne: ‘Akoaa ndra ye wura.’ Sɛ né bɛtane me nye a, ɛmɔ koso bɛkɔtane ɛmɔ nye; sɛ bɛlili me dwirɛ so a, bɛkoli ɛmɔ deɛ so. 21 Na me dumaa ti, bɛkɔfa ɛhe amukoraati bɛkɔyɛ ɛmɔ, ofikyɛ bɛnze bɔ ɔsomane me ne. 22 Sɛ mamma andwudwo angyire bɛ a, ahaa benni bɔne nwo fɔ. Nakoso kesaalae de, bɛlle hwee bɔ bɛfa bɛye bɛ nwo noa ɔ. 23 Ebiala bɔ ɔtane me ne, ɔtane me Baba koso. 24 Sɛ manyɛ nyumaa bɔ ebiala yɛlle bie lle wɔ bɛ nu a, ahaa benni bɔne nwo fɔ; na afei de, banwu me, nakoso bɛtane me ne me Baba. 25 Na ɛhe ama edwirɛ bɔ bahworɔ ye wɔ bɛ Mmeraa ne anu ne awa nu kyɛ: ‘Bɛ tane me mbaen.’ 26 Bokafoɛ bɔ ngɔsoma ye ngofi Baba ne dɔ ne, nahorɛ honhom bɔ ofi Baba ne berɛ ne, sɛ ɔba a, ye yeɛ okoli me nwo adanzeɛ ɔ. 27 Na ɛmɔ koso ɛmɔ koli adanzeɛ, ofikyɛ ofi ahyɛaseɛ ne, mene ɛmɔ yeɛ yɛwɔ berɛ ɔ."