1 Ɛhe si ne, Yesu pɛle Galilea Po (anaa Tiberia Po) ne hɔle ye si dɔ. 2 Né mmeni pee li ye si, ofikyɛ bɛnwuni nzɛngyerɛneɛ bɔ ɔyɛ fa sa mmenia anwonyerɛ ne. 3 Yeti, Yesu hɔle bokaa bie so, na ɔne ye asuafoɛ nemɔ tenane berɛ. 4 Sɔ mmerɛ ne, né Yudafoɛ Pɛnu afahyɛ ne apingye. 5 Mmerɛ bɔ Yesu tole ye nye, ná onwuni kyɛ mmeni pee ba ye berɛ ne, obisale Filipo kyɛ: "Nisua yeɛ yekonya paanoo yɛkɔtɔ yɛkɔma mmenia hemɔ ɔ?" 6 Né ɔka ɛhe fa sɔ ye nea, ofikyɛ né ɔse bɔ ɔbaayɛ ɔ. 7 Filipo hane kyɛ: "Sɛ yɛtɔ paanoo dɛnare 200 po a, ebiala ngonya kaala po ngoli." 8 Asuafoɛ nanu kõ bɔ bɛfrɛ ye Andrea, Simon Petro aliema ne hane kyɛ: 9 "Abɛɛmaa bie wɔ wa bɔ ole ayuo* paanoo nnu, ne egyein nyɔ; nakoso ɛhe de, aso ɔkɔso mmenia nwora he?" 10 Yesu hane kyɛ: "Ɛmɔma mmenia nemɔ tena ase." Né nzenzaen pee wɔ berɛ, yeti mmenia ne tenane ase, né bɛ te kɔyɛ 5,000. 11 Yesu fale paanoo ne, na ɔlale ase yiele ne, ɔhyɛ mane bɛ bɔ bɛte berɛ ne; sɔ ala yeɛ ɔyɛle egyein ne ɔ. Na ebiala nyane bɔ ɔkɔso ye. 12 Na bɛ ko yili ne, ɔha hyirele ye asuafoɛ nemɔ kyɛ: "Ɛmɔboɔboa mbo-poro-ka ne noa, nná nikye fee anzɛkye." 13 Yeti, ayuo paanoo nnu bɔ mmenia nemɔ lili ne, yebo mbo-poro-ka bɔ bɛboɔboale ye noa ne, benyane ngɛndɛn 12 tɛkyɛ. 14 Mmerɛ bɔ mmenia ne nwuni nzɛngyerɛneɛ bɔ wayɛ ne, bɛhane kyɛ: "Amba, ɛhe yeɛ ole diifoɛ bɔ ɔba wiase ne."

15 Yesu nwuni kyɛ, bɛpena kyɛ bɛkye ye maa okodi hene, yeti ɔhwene ye nwo, na ye ngome, osa hɔle bokaa naso dɔ bieku.

16 Odwuli nnɔsoa ne, ye asuafoɛ nemɔ hɔle ɛpo ne noa dɔ, 17 na bɛtenane ɛlɛen nu kyɛ bɛpɛ ɛpo ne bɛkɔ Kapernaum. Ne aleɛ asa, na ne Yesu nya walle bɛ nwo berɛ. 18 Né mvrama kandinga bie tu, yeti né ɛpo naso ayɛ bagya-bagya. 19 Nakoso, mmerɛ bɔ bɛpɛle kɔyɛ kwanzii nza anaa nná ne, bɛnwuni kyɛ Yesu nate ɛpo naso ɔba ɛleɛn nanwo berɛ; ná esuronyi hane bɛ. 20 Nakoso ɔha hyire bɛ kyɛ: "Me ane, nnɛmɔ suro!" 21 Na bɛle anigye bɛmaa ɔɔtenane ɛlɛen nanu, wangyɛ biala, ɛlɛen ne dwuli ɛpo ne noa, nekaa bɔ bɛkɔ ne.

22 Aleɛ hene ne, bɛ bɔ bɛhale ɛpo ne si dɔ ne nwuni kyɛ né ɛlɛen biala nne berɛ. Ɛleɛn kamba bɔ ne ɔwɔ berɛ, Yesu amvo bie, ofikyɛ asuafoɛ nemɔ ngome yeɛ bɛfo bɛhɔle ɔ. 23 Ná ɛlɛen biemɔ fili Tiberia wale nekaa bɔ Awurade lale ase maa belili paanoo ne. 24 Yeti, mmerɛ bɔ ɛlɔen ne nwuni kyɛ, Yesu nne berɛ, na ye asuafoɛ nemɔ koso nne berɛ ne, bɛfole ɛlɛen bɛwale Kapernaum kyɛ bɛ baapena ye. 25 Mmerɛ bɔ bɛnwuni ye wɔ ɛpo ne si dɔ ne, bɛbisale ye kyɛ: "Rabi, mmerɛ beni yeɛ ɛwale wa ɔ?" 26 Yesu ha hyirele bɛ kyɛ: "Nahorɛ paa bɔ meka mekyire ɛmɔ yeɛ ole kyɛ, nná nzɛngyerɛneɛ bɔ ɛmɔ nwuni ye nati yeɛ ɛmɔpena me ne, mmom paanoo bɔ ɛmɔ lili maa ɛmɔ ko yili nati ɔ. 27 Nnɛmɔyɛ aleɛ bɔ ɔsɛkye nwo adwuma, mmom ɛmɔyɛ aleɛ bɔ ɔtena berɛ kɔ daa ngoa nu nwo adwuma, ɛhene yeɛ Sona Awa ne kɔfa kɔma ɛmɔ ne. Ofikyɛ ye yeɛ Baba ne, Nyameɛ bɔbɔ ahyɛ ye nzorɛ afa ahyire kyɛ wale ye wato nu ɔ." 28 Yeti bɛbisale ye kyɛ: "Nzu yeɛ yɛyɛ a, né yɛ yɛ Nyameɛ adwuma ɔ?" 29 Yesu yele bɛ noa kyɛ: "Nyameɛ adwuma yeɛ ole kyɛ, ɛmɔkole bɔ ɔsomane ye ne bɛkoli." 30 Yeɛ bɛbisale ye kyɛ: "Nzɛngyerɛneɛ beni yeɛ ɛkɔyɛ maa yekonwu ye, na yale wɔ yali ɔ? Nzu yeɛ ɛkɔyɛ ɔ? 31 Yɛ nana mɔ lili mana wɔ ɛserɛ naso, na kyɛbɔ bahworɔ ne: ‘Ɔmane bɛ paanoo bɔ ofi anwuro maa bɛlili.’ " 32 Yesu koso ha hyirele bɛ kyɛ: "Nahorɛ paa bɔ meka mekyire ɛmɔ yeɛ ole kyɛ, nná Mose yeɛ ɔmane ɛmɔ paanoo bɔ ofi anwuro ne, me Baba mmom yeɛ ɔmane ɛmɔ nahorɛ paanoo bɔ ofi anwuro ne. 33 Ofikyɛ Nyameɛ paanoo yeɛ ole bɔ ofi anwuro ba ase, ná ɔma wiase ne ngoa ne." 34 Yeti bɛhane kyɛ: "Awurade, ma yɛ paanoo daa."

35 Yesu hane kyɛ: "Me yeɛ nne ngoa paanoo ne. Ebiala bɔ ɔba me berɛ ne, ɛhɔen nngohu ye lle, na ebiala bɔ onya gyidie wɔ me nu ne, nzuhɔen nngohu ye lle. 36 Na kyɛbɔ nga ngyirele ɛmɔ ne, ɔwɔ nu kyɛ ɛmɔ anwu me, nakoso, ɛmɔnne me benni. 37 Bɛ bɔ Baba ne afa bɛ ama me ne, bɛ mukoraati bɛkɔwa me berɛ; na ebiala bɔ ɔba me berɛ ne, mengɔfoa ye lle; 38 ofikyɛ mvili anwuro mmale kyɛ, mebaayɛ bɔ ɔsomane me ne apɛdeɛ, nná me bɔbɔ m’apɛdeɛ. 39 Na bɔ ɔsomane me ne apɛdeɛ yeɛ ole kyɛ, bɔ wafa wama me namukoraati, ngɔnea kyɛ komapɛ po ngomini, mmom kyẽa bɔ oli siɛ ne, ngotingye bɛ. 40 Na bɔ me Baba kuro yeɛ ole kyɛ, ebiala bɔ okonwu Baa ne, na okonya gyidie wɔ ye nu ne, okonya daa ngoa. Na kyẽa bɔ oli siɛ ne, ngotingye ye."

41 Ɔnate kyɛ Yesu hane kyɛ: "Me yeɛ nne paanoo bɔ ofi anwuro" nati, Yudafoɛ nemɔ hyɛle yebo kyɛ bɛdwudwo. 42 Na bɛhane kyɛ: "Nná Yosef awa Yesu, bɔ yɛse ye baba ne ye maame ne ɛhe? Ye de, ɔwale ye sɛ yeɛ kesaalae de ɔka kyɛ, ‘Mvili anwuro mmale’ ne?" 43 Yesu yele bɛ noa kyɛ: "Ɛmɔyakyi anwii-nwii ne. 44 Ebiala ngɔhora ngɔwa me berɛ, sana Baba bɔ ɔsomane me ne twe ye, na kyẽa bɔ ɔpɛ yebo ne, ngotingye ye. 45 Bahworɔ ye wɔ adiifoɛ nemɔ nu kyɛ: ‘Nyameɛ kohyirehyire bɛ mu.’ Na ebiala bɔ watie Baba ne, na wasua nikye wafi ye berɛ ne, ɔba me berɛ. 46 Nná kyɛ ebie anwu Baba ne; bɔ ofi Nyameɛ berɛ ne ngome yeɛ wanwu Baba ne ɔ. 47 Nahorɛ paa bɔ meka mekyire ɛmɔ yeɛ ole kyɛ, ebiala bɔ okole koli ne, ole daa ngoa. 48 Me yeɛ nne ngoa paanoo ne. 49 Ɛmɔ nana mɔ lili mana wɔ ɛserɛ naso, nakoso bɛwuli. 50 Ɛhe yeɛ ole paanoo bɔ ofi anwuro wale kyɛ ebiala li, na wannwu ne. 51 Me yeɛ nne ngoa paanoo bɔ ofi anwuro wale ne, sɛ ebie di sɔ paanoo he a, ɔkɔtena ase daa. Na bɔ ɔte yeɛ ole kyɛ, paanoo bɔ ngɔfa ngɔma ye ne yeɛ ole me nwonaen, bɔ ngɔfa ngɔma ngole wiase ne ngoa ne."

52 Ɛhe maa Yudafoɛ nemɔ suli bɛ nwo aporowaa, na bɛhane kyɛ: "Ɔkɔyɛ sɛɛ né akoaa he ahora afa ye nwonaen ama yɛ kyɛ yɛli?" 53 Yeti Yesu ha hyirele bɛ kyɛ: "Nahorɛ bɔ meka mekyire ɛmɔ yeɛ ole kyɛ, sɛ ɛmɔ anni Sona Awa ne nwonaen, ná ɛmɔ anno ye mogya a, ɛmɔlle ngoa wɔ ɛmɔ nu. 54 Ebiala bɔ okoli me nwonaen na ɔkɔno me mogya ne, ole daa ngoa, na kyẽa bɔ ɔpɛ yebo ne, ngotingye ye; 55 ofikyɛ me nwonaen ne te aleɛ bɔ bɛdi ɔ, na me mogya te anonneɛ bɔ bɛno ɔ. 56 Ebiala bɔ odi me nwonaen na ɔno me mogya ne, ɔne me ayɛ kõ, na me koso, mene ye ayɛ kõ. 57 Na kyɛbɔ Baba bɔ ɔte ase ne somane me, na yeti nde ase ne, sɔ ala yeɛ bɔ odi me nwonaen ne koso, me ti ɔkɔtena ase ɔ. 58 Ɛhe yeɛ ole paanoo bɔ ofi anwuro wale ne. Ɔtte kyɛ bɔ ɛmɔ nana mɔ lili, nakoso bɛwuli ne. Ebiala bɔ okoli paanoo he ne, ɔkɔtena ase daa." 59 Ɔhane sɔ dwirɛ he, mmerɛ bɔ ne ɔyɛ ngyerɛkyerɛ wɔ sua bɔ beyia nu nanu wɔ Kapernaum ne.

60 Mmerɛ bɔ bɛtele sɔ dwirɛ ne, ye asuafoɛ nanu pee hane kyɛ: "Sɔ dwirɛ he de, yenoa yɛ hye, nwa yeɛ ɔkɔhora kotie ɔ?" 61 Nakoso, né Yesu anwu kyɛ ɛhe ati, ye asuafoɛ nemɔ nwiinwii, yeti obisale bɛ kyɛ: "Ɛhe ato ɛmɔ sintidua hɔ? 62 Na sɛ ɛmɔnwu kyɛ Sona Awa ne fo kɔ nekaa bɔ ofi wale ne koso ɛ? 63 Honhom ne yeɛ ɔma ngoa ɔ; na anwoɔnaen ne de, ɔtte hwee. Edwirɛ bɔ maha mahyire ɛmɔ ne te honhom, na ɔte ngoa. 64 Nakoso, ɛmɔ nu biemɔ nne nni." Ná ahyɛaseɛ pɛɛ ne, né Yesu se bɛ bɔ benne benni, ɔne bɔ ɔkɔye ye kɔma ne. 65 Ɔtoale so kyɛ: "Ɛhe ati yeɛ nga ngyirele ɛmɔ kyɛ, ebiala ngɔhora ngɔwa me berɛ, sana Baba ne ama ye atee ne."

66 Ɛhe ati, ye asuafoɛ nanu pee sa hɔle nningyein bɔ bɛyakyile ye bɛ si nanwo, na bɛne ye annate kõ. 67 Yeti, Yesu bisale buru-ne-nyɔ ne kyɛ: "Ɛmɔ koso, ɛmɔpena kyɛ ɛmɔkɔ anaa?" 68 Simon Petro yele ye noa kyɛ: "Awurade, nwa berɛ yeɛ yɛhɔ ɔ? Wɔ yeɛ ɛle edwirɛ bɔ ɔma daa ngoa ɔ. 69 Yale yali, ná yanwu ye kyɛ, wɔ yeɛ ɛle Krongroniɛ bɔ ofi Nyameɛ berɛ ne." 70 Yesu ha hyirele bɛ kyɛ: "Nnaa me yeɛ nyele ɛmɔ buru-ne-nyɔ he ɔ? Nakoso ɛmɔ nu kõ te abɔnzam."* 71 Simon Iskariot awa Yuda yeɛ ne ɔka ye nwo dwirɛ ne, ɔwɔ nu kyɛ né ɔboka buru-ne-nyɔ naso, nakoso né ɔkɔye ye kɔma.