1 Nakoso Yesu hɔle Olive Bokaa naso. 2 Na ngyerɛmɔ tutuutu ne, osa wale asɔre awuro berɛ. Mmenia namukoraati wale ye nwo berɛ, yeti ɔtenane ase, na ɔhyɛle yebo kyɛ okyirekyire bɛ. 3 Afei, atwerɛfoɛ ne Farisifoɛ nemɔ fale maame bie wale ye berɛ, né baahye ye kyɛ ɔbɔ adwaman; na bɛmaa ogyinane mmenia nemɔ afia, 4 yeɛ bɛha bɛhyirele ye kyɛ: "Kyerɛkyerɛniɛ, yaahye maame he kyɛ ɔbɔ adwaman. 5 Sɛ ɛnea mmeraa nanu a, Mose hane kyɛ, yɛsi ebie bɔ ɔte sɔ ne nyɔboɛ; na wɔ koso, ɛnwu ye sɛ?" 6 Bɔ ɔte yeɛ ole kyɛ, né bɛka ɛhe bɛfa bɛsɔ ye bɛnea, kyɛbɔ ɔkɔyɛ a bekonya nikye bie bɛkogyina so bɛkɔbɔ ye kwaadu. Yesu kunduni berɛ, na ɔfale ye sa hworɔ-hworɔle aseɛ nwo berɛ. 7 Na mmerɛ bɔ bɛgu ye so wɔ edwirɛ nanwo ne, ɔtengyɛle ye nu, yeɛ ɔha hyirele bɛ kyɛ: "Ɛmɔ nu biala bɔ ɔyɛlle bɔne lle ne, oli moa to nyɔboɛ ne bɔ ye." 8 Osa kunduni berɛ, na ɔfale ye sa hworɔ-hworɔle aseɛ nwo berɛ. 9 Bɛtele sɔ dwirɛ ne, bɛfili berɛ ngoko-ngoko maa ɔhale maame ne ngome; mbanyi nemɔ yeɛ bɛli moa bɛhɔle ɔ, na ɔhale maame ne ngome wɔ Yesu nwo berɛ. 10 Yesu tengyɛle ye nu, na ɔha hyirele maame ne kyɛ: "Maame, bɛwɔ nisua? Ebiala ammu wɔ fɔ kõ?" 11 Ɔyele ye noa kyɛ: "Me wura, ebiala ammu me fɔ." Yesu hane kyɛ: "Ye de, me koso, mengɔbu wɔ fɔ. Kɔ, ofi ɛnɛ bɔ ɔkɔ ne, nnɛyɛ bɔne kõ."

12 Yesu sa ha hyirele bɛ bieku kyɛ: "Me yeɛ nne wiase kanea. Ebiala bɔ okoli me si ne, ɔngɔnate awosii nu lle, mmom okonya ngoa kanea." 13 Yeti Farisifoɛ nemɔ ha hyirele ye kyɛ: "Wɔ bɔbɔ yeɛ ɛdi wɔ nwo adanzeɛ ɔ, wɔ adanzeɛ ne, ɔtte nahorɛ." 14 Yesu koso buale bɛ kyɛ: "Sɛ me bɔbɔ medi me nwo adanzeɛ po a, m’adanzeɛ ne te nahorɛ; ofikyɛ mese nekaa bɔ mvi ɔ, na mese nekaa bɔ mekɔ ɔ. Na ɛmɔ de, ɛmɔnze nekaa bɔ mvi, ne nekaa bɔ mekɔ ɔ. 15 Sona adwene yeɛ ɛmɔfa bɛbu atɛn ɔ, na me de memmu ebiala atɛn. 16 Na sɛ mebu atɛn po a, m’atemmuo ne te nahorɛ, ofikyɛ ɔhalle me ngome, Baba bɔ ɔsomane me ne boka me so. 17 Afei, bahworɔ ye wɔ ɛmɔ bɔbɔ ɛmɔ mmeraa nanu kyɛ: ‘Mmenia nyɔ adanzeɛ te nahorɛ.’ 18 Me bɔbɔ medi me nwo adanzeɛ, na Baba bɔ ɔsomane me ne koso di me nwo adanzeɛ." 19 Yeɛ bɛbisale ye kyɛ: "Wɔ Baba ne wɔ nisua?" Yesu ha hyirele bɛ kyɛ: "Kyɛbɔ ɛmɔnze me ne, sɔ ala yeɛ ɛmɔnze me Baba ne ɔ. Sɛ ɛmɔse me a, ahaa ɛmɔ konwu me Baba ne koso." 20 Ɔhane sɔ dwirɛ ne, mmerɛ bɔ ne okyirekyire wɔ asɔre awuro berɛ ne, na né ogyi nekaa bɔ bɛye ndoboa ne. Nakoso ebiala angye ye, ofikyɛ né ye mmerɛ nya sonne.

21 Yeti osa ha hyirele bɛ kyɛ: "Me de mekɔ, na ɛmɔ kɔpena me, nakoso ɛmɔ kowu ɛmɔ bɔne nu. Nekaa bɔ mekɔ ne, ɛmɔ ngɔhora berɛ ba." 22 Yeti, Yudafoɛ nemɔ hyɛle yebo hane kyɛ: "Ɔkwaahu ye nwo hɔ? Ofikyɛ yenwa, ‘Nekaa bɔ mekɔ ne, ɛmɔ ngɔhora berɛ ba.’ " 23 Yesu toale so ha hyirele bɛ kyɛ: "Ɛmɔfi ase, na me de, mvi anwuro. Ɛmɔfi wiase he anu; na me de mmvi wiase he anu. 24 Ɛhene ati yeɛ nga ngyirele ɛmɔ kyɛ, ‘Ɛmɔ kowu ɛmɔ bɔne nu’ ne. Na sɛ ɛmɔ anne banni kyɛ me yeɛ nne ye a, ɛmɔ kowu ɛmɔ bɔne nu." 25 Yeti, bɛhyɛle yebo bɛha bɛhyirele ye kyɛ: "Wɔ yeɛ ɛle nwa?" Yesu ha hyirele bɛ kyɛ: "Bɔ ahyɛaseɛ ne, nga ngyirele ɛmɔ nala.* 26 Nne edwirɛ pee bɔ odikyɛ meka mefa ɛmɔ nwo ɔ, na nne nningyein pee bɔ odikyɛ mebu ye nwo atɛn ɔ. Nakoso bɔ ɔsomane me ne te ebie bɔ odi nahorɛ, na bɔ mete mefi ye berɛ ne, ɛhene ala yeɛ meka ye wɔ wiase ɔ." 27 Bannwu ye kyɛ, ye Baba nwo dwirɛ yeɛ né ɔka kyire bɛ ne. 28 Yeti, Yesu ha hyirele bɛ kyɛ: "Ɛmɔnya bɛma Sona Awa naso a, ɛberɛ yeɛ ɛmɔ konwu ye kyɛ me yeɛ nne ye, na nná me bɔbɔ mepɛ yeɛ mefa meyɛ nikye bie ɔ, mmom bɔ Baba ne hyirele me ne, ɛhene ala yeɛ meka ɔ. 29 Na bɔ ɔsomane me ne boka me so, wanyakyi me ngome, ofikyɛ daa biala, meyɛ bɔ ɔsɔ ye nye." 30 Ogu so ɔka sɔ dwirɛ hemɔ ne, mmeni pee nyane gyidie wɔ ye nu.

31 Yeti, Yudafoɛ bɔ banya gyidie wɔ Yesu nu ne, ɔha hyirele bɛ kyɛ: "Sɛ ɛmɔfa me dwirɛ bɛyɛ adwuma* a, né ɔte amba kyɛ ɛmɔte m’asuafoɛ, 32 na ɛmɔ konwu nahorɛ ne, na nahorɛ ne kɔmaa ɛmɔkole ɛmɔ nwo."* 33 Yeti bɛbisale ye kyɛ: "Yɛte Abraham bosofoɛ, na yɛyɛlle ngoaa yɛmanne ebiala lle. Ye de nzuati yeɛ ɛka kyire yɛ kyɛ ‘Yɛkole yɛ nwo’ ne?"

34 Yesu yele bɛ noa kyɛ: "Nahorɛ paa bɔ meka mekyire ɛmɔ yeɛ ole kyɛ, ebiala bɔ ɔyɛ bɔne ne, ɔte bɔne akoaa. 35 Afei, akoaa ndena awuro berɛ daa, baa yeɛ ɔtena berɛ daa ɔ. 36 Yeti sɛ Baa ne maa ɛmɔdɛ ɛmɔ nwo a, afei de né ɛmɔtte ngoaa kõ.* 37 Mese kyɛ ɛmɔte Abraham bosofoɛ, nakoso, ɛmɔpena me bɛku me, ofikyɛ ɛmɔnne edwirɛ bɔ meka ne bɛndonu. 38 Bɔ nwuni ye wɔ me Baba berɛ ne, ɛhene yeɛ meka ɔ; na ɛmɔ de, bɔ ɛmɔ ate bafi ɛmɔ baba berɛ yeɛ ɛmɔyɛ ɔ."

39 Bɛyele yenoa kyɛ: "Yɛ Baba yeɛ ole Abraham." Yesu ha hyirele bɛ kyɛ: "Sɛ ɛmɔte Abraham mmaa mɔ a, ahaa ɛmɔ kɔyɛ bɔ Abraham yɛle ne bie. 40 Nakoso kesaalae de, ɛmɔpena kyɛ ɛmɔ ku me, sona bɔ maha nahorɛ bɔ mate mafi Nyameɛ berɛ ne mahyire ɛmɔ ne. Abraham de, wanyɛ sɔ. 41 Bɔ ɛmɔ Baba yɛ ne, ɛhene biala yeɛ ɛmɔyɛ ɔ." Bɛha bɛhyirele ye kyɛ: "Yɛ de, yɛtte adwaman mmaa, yɛ Baba te komapɛ, yeɛ ole Nyameɛ." 42 Yesu ha hyirele bɛ kyɛ: "Sɛ ɛmɔ Baba yeɛ ole Nyameɛ a, ahaa ɛmɔdɔ me, ofikyɛ Nyameɛ berɛ yeɛ mvi mmale wa ɔ. Nná me bɔbɔ mepɛ yeɛ mva mmale ɔ, mmom Ye yeɛ ɔsomane me ɔ. 43 Nzuati yeɛ ɛmɔnde bɔ meka nabo ne? Ɔnate kyɛ, ɛmɔngora bɛndie me dwirɛ. 44 Ɛmɔfi ɛmɔ Baba Abɔnzam berɛ, na ɛmɔ kuro kyɛ ɛmɔyɛ bɔ ɛmɔ baba ne kuro ɔ. Ye de, ɔte wudiniɛ fi ahyɛaseɛ, na wangyina nahorɛ nanu, ofikyɛ nahorɛ ne nne ye nu. Sɛ ɔpɛ anoanu a, ye bɔbɔ ye suban yeɛ wamaa wayɛ sɔ ɔ, ofikyɛ ɔte ngondomboniɛ, ne ngondombo baba. 45 Na ɔnate kyɛ me de, meka nahorɛ nati, ɛmɔnne me benni. 46 Ɛmɔ nu nwa yeɛ ɔkɔhora kobu me fɔ kyɛ mayɛ bɔne ɔ? Na sɛ nahorɛ yeɛ meka a, nzuati yeɛ ɛmɔnne me benni ɔ? 47 Ebiala bɔ ofi Nyameɛ berɛ ne, otie Nyameɛ dwirɛ. Na ɛhene ati yeɛ ɛmɔ ndie me ne, ofikyɛ nná Nyameɛ berɛ yeɛ ɛmɔfi ɔ."

48 Yeɛ Yudafoɛ nemɔ ha hyirele Yesu kyɛ: "Yɛhane kyɛ ɛte Samarianiɛ, na ɛle sunzummɔne, nnaa anwu ye kyɛ ɔte nahorɛ ne?" 49 Yesu yele bɛ noa kyɛ: "Nnne sunzummɔne, mmom me Baba yeɛ medi ye ni ɔ, na ɛmɔ de, ɛmɔgua me nyunu ase. 50 Afei, membena anuonyam memma me nwo, Ebie wɔ berɛ bɔ ɔpena anuonyam ma me ɔ, na ye yeɛ obu atɛn ɔ. 51 Nahorɛ paa bɔ meka mekyire ɛmɔ yeɛ ole kyɛ, ebiala bɔ okoli me dwirɛ so ne, ongowu koraa." 52 Yeɛ Yudafoɛ nemɔ ha hyirele ye kyɛ: "Bekye bɔ yanwu kyɛ sãa ɛle sunzummɔne ɔ. Abraham wuli, na adiifoɛ nemɔ koso wuli, nakoso wɔ de ɛnwa, ‘ebiala bɔ okoli me dwirɛ so ne, ongowu koraa.’ 53 Ɛte piri tra yɛ nana Abraham bɔ owuli ne? Adiifoɛ nemɔ koso, nnaa bɛwuli. W’adwene yɛ wɔ kyɛ ɛte nzu deinn?" 54 Yesu ha hyirele bɛ kyɛ: "Sɛ mehyɛ me nwo anuonyam a, me anuonyam ne tte hwee. Me Baba bɔ ɛmɔnwa ɔte ɛmɔ Nyameɛ ne, ye yeɛ ɔhyɛ me anuonyam ɔ. 55 Nakoso ɛmɔnze ye, me de mese ye. Sɛ meka kyɛ menze ye a, né mayɛ ngondomboniɛ te kyɛ ɛmɔ ala. Nakoso mese ye, na medi ye dwirɛ so. 56 Né ɔyɛ ɛmɔ Baba Abraham fɛ kyɛ okonwu me ngyẽa ne, onwuni ye, na olili ahurusi paa." 57 Yeɛ Yudafoɛ nemɔ ha hyirele ye kyɛ: "Afoɛ 50 po ɛnyane ye, ye de, ɔyɛle sɛɛ yeɛ ɛnwuni Abraham ɔ?" 58 Yesu ha hyirele bɛ kyɛ: "Nahorɛ paa bɔ meka mekyire ɛmɔ yeɛ ole kyɛ, kora bɔ bɛwo Abraham ne, né nwɔ berɛ." 59 Yeti, bɛfale nyɔboɛ kyɛ bɛto bɛbɔ ye, nakoso Yesu feale na ofili asɔre awuro berɛ hɔle.