1 Ɔpɛnu ne, onwuni abrandeɛ bie bɔ bɛwole ye ne, né ye nye asi. 2 Yeti, ye asuafoɛ nemɔ bisale ye kyɛ: "Rabi, nwa yeɛ ɔyɛle bɔne bɔ yeti bɛwole ye ne, né ye nye asi ne? Abrandeɛ ne, anaa ye awofo?" 3 Yesu ha hyirele bɛ kyɛ: "Biaa he yɛlle bɔne, na ye awofo koso yɛlle bɔne biala, mmom wawa ye sɔ, kyɛbɔ ɔkɔyɛ a bekonwu Nyameɛ nyumaa ɔ. 4 Aleɛ ahe ye de, odikyɛ yɛyɛ Bɔ ɔsomane me ne adwuma, aleɛ baasa bɔ ebiala ngɔhora adwuma biala yɛ ɔ. 5 Mmerɛ bɔ nwɔ wiase ne de, me yeɛ nde wiase ne kanea ɔ." 6 Ɔhane sɔ dwirɛ nemɔ yiele ne, ɔtele ngɔserɛ guale ase, na ɔfa frale nnɛterɛ, yeɛ ɔfa yɛle abrandeɛ ne nye naso ɔ, 7 na ɔha hyirele ye kyɛ: "Kɔ Siloam nzue nanwo, na kɔnwunzi," (Siloam ne bo kyire "Basoma"). Yeti ɔɔwunzini, ná ɔba ne, né onwu nikye. 8 Ɛhe ati mandanu berɛfoɛ ne bɛ bɔ bɛnwuni kyɛ né ɔsrɛ-srɛ nikye ne hyɛle yebo hane kyɛ: "Nná biaa he yeɛ né ɔtena ase srɛ-srɛ nikye ne?" 9 Ebiemɔ hane kyɛ: "Ye ane." Yeɛ ebiemɔ koso nwa: "Nná ye ɔ, mmom osoma ye." Nakoso biaa ne de, bɔ né ɔka ala yeɛ ole kyɛ: "Me ane oo." 10 Yeti bɛbisale ye kyɛ: "Ɔyɛle sɛɛ yeɛ wɔ nye tele ɔ?" 11 Yeɛ ɔhane kyɛ: "Biaa bie bɔ bɛfrɛ ye Yesu yeɛ ɔfale ngɔserɛ frale nnɛterɛ fa yɛle me nye naso ɔ, na ɔha hyirele me kyɛ, ‘Kɔnwunzi ye wɔ Siloam nu.’ Yeti ngɔnwunzini, na me nye ne tele." 12 Yeti, bɛbisale ye kyɛ: "Sɔ biaa ne wɔ ni?" Na ɔhane kyɛ: "Menze oo."

13 Na bɛfale abrandeɛ bɔ né ye nye asi ne bɛhɔle Farisifoɛ nemɔ berɛ. 14 Kyẽa bɔ Yesu fale ngɔserɛ frale nnɛterɛ fa tele abrandeɛ ne nye ne, sãa né ɔte Homeda. 15 Yeti, Farisifoɛ nemɔ koso bisale abrandeɛ ne bɔ osili, bɔ kesaalae de onwu nikye ne. Na ɔha hyirele bɛ kyɛ: "Ɔfale nnɛterɛ yɛle me nye naso, yeɛ ngɔnwunzini ɔ, ɛhene yeɛ ɔmaa nwuni nikye ne." 16 Yeti Farisifoɛ nemɔ bie hane kyɛ: "Sɔ biaa he, offi Nyameɛ berɛ, ofikyɛ onni Homeda." Yeɛ ebiemɔ koso hane kyɛ: "Ɔkɔyɛ sɛɛ, né ebie bɔ ɔte ɔbɔnefoɛ ayɛ sɔ nzɛngyerɛneɛ he?" Yeti, né bɛ nu ahyɛ. 17 Besa bɛbisale abrandeɛ bɔ né ye nye asi kyɛ: "Kesaalae bɔ wate wɔ nye ne, nzu yeɛ ɛka fa ye nwo ɔ?" Abrandeɛ ne hane kyɛ: "Ɔte diifoɛ."

18 Nakoso, Yudafoɛ nemɔ anne anni kyɛ né ye nye asi, yeɛ kesaalae de wanwu nikye oodwuli kyɛ bɛfrɛle sɔ abrandeɛ ne awofo bɛwale ɔ. 19 Yeɛ bɛbisale bɛ kyɛ: "Ɛmɔ awa he, yeɛ ɛmɔnwa bɛwole ye ne, né ye nye asi ne? Ye de, ɔwale ye sɛ yeɛ onwu nikye ne?" 20 Ye awofo nemɔ hane kyɛ: "Yɛ de yɛ se kyɛ yɛ wa ɛhe, na yɛwole ye ne, né ye nye asi. 21 Na bɔ ɔyɛle a kesaalae de onwu nikye ne de, yɛnze; na sona bɔ ɔtele ye nye ne koso, yɛnze ye. Wanyi, ɛmɔ bisa ye, ye bɔbɔ ɔkodwudwo kɔma ye nwo." 22 Né ye awofo ne suro Yudafoɛ nemɔ, yeti yeɛ bɛhane sɔ ne. Né Yudafoɛ nemɔ abɔ porɛ kyɛ, sɛ ebie nze, na ɔka kyɛ ye yeɛ ɔte Kristo ne a, odikyɛ bɛtu sɔ sona ne bɛfi sua bɔ beyia nu nanu. 23 Ɛhe ati yeɛ ye awofo ne hane kyɛ: "Wanyi, ɛmɔ bisa ye" ne.

24 Yeti, besa bɛfrɛle abrandeɛ bɔ né ye nye asi ne bieku, yeɛ bɛha bɛhyirele ye kyɛ: "Hyɛ Nyameɛ anuonyam, yɛ de yɛse kyɛ sɔ biaa he te ɔbɔnefoɛ." 25 Yeɛ ɔhane kyɛ: "Sɛ ɔte ɔbɔnefoɛ de a, menze. Nikye komapɛ yeɛ mese ɔ, yeɛ ole kyɛ, né me nye asi, nakoso kesaalae de menwu nikye." 26 Yeɛ bɛbisale ye kyɛ: "Nzu yeɛ ɔfa yɛle wɔ ɔ? Atee beni yeɛ ɔfale so tele wɔ nye ne?" 27 Ɔha hyirele bɛ kyɛ: "Maha mahyire ɛmɔ dada, nakoso ɛmɔ andie. Nzuati yeɛ ɛmɔpena kyɛ ɛmɔte ye bieku ɔ? Anaa ɛmɔ koso, ɛmɔpena kyɛ ɛmɔyɛ ye asuafoɛ?" 28 Yeti bɛpepɛle ye nzoaa, yeɛ bɛha bɛhyirele ye kyɛ: "Wɔ yeɛ ɛte sɔ biaa ne suaniɛ ɔ, yɛ de yɛte Mose asuafoɛ. 29 Yɛse kyɛ Nyameɛ adwudwo ahyire Mose, nakoso biaa he de, yɛnze nekaa bɔ ofi ɔ." 30 Yeɛ abrandeɛ ne hane kyɛ: "Ɛhe koso de ɔyɛ nwanwa oo, ɛmɔnze nekaa bɔ ofi ɔ, nakoso wate me nye. 31 Yɛse kyɛ Nyameɛ ndie abɔnefoɛ, mmom sɛ ebie suro Nyameɛ, na ɔyɛ bɔ okuro de a, otie ye. 32 Ofi teteete bɔ ɔbaadwu ɛnɛ, yɛtelle ye lle kyɛ, ebie ahora ate ebie bɔ bɛwole ye anyesiniwaa nye. 33 Sɛ nná Nyameɛ berɛ yeɛ biaa he fi a, ahaa ɔngɔhora ngɔyɛ hwee." 34 Bɛ koso bɛha bɛhyirele ye kyɛ: "Wɔ bɔ bɔne nu ngome yeɛ bɛwole wɔ ne, wɔ yeɛ ɛbaahyirehyire yɛ ɔ?" Yeti bɛfoane ye bɛfili berɛ.

35 Yesu tele kyɛ bafoa ye, na mmerɛ bɔ onwuni ye ne, obisale ye kyɛ: "Edɛ́ Sona Awa ne di?" 36 Yeɛ abrandeɛ ne ha hyirele ye kyɛ: "Me wura, yeɛ ole nwa, na nne ye nni?" 37 Yesu hane kyɛ: "Anwu ye, bɔ ɔte yeɛ ole kyɛ, ye yeɛ ɔne wɔ dwudwo ne." 38 Yeɛ ɔhane kyɛ: "Awurade, medɛ́ ye medi." Na ɔbɔle ye nu ase kotole ye. 39 Yeɛ Yesu hane kyɛ: "Atemmuo he ati yeɛ mmale wiase ɔ, kyɛbɔ ɔkɔyɛ a, bɛ bɔ bɛ nye asi ne konwu nikye, na bɛ bɔ bɛnwu nikye ne nye asi." 40 Farisifoɛ bɔ ne bɛwɔ berɛ ne bie tele sɔ dwirɛ ne, na bɛha bɛhyirele ye kyɛ: "Yɛ koso, yɛ nye asi anaa?" 41 Yesu ha hyirele bɛ kyɛ: "Sɛ ɛmɔ nye asi a, ahaa bɔne nne ɛmɔ nwo. Nakoso kesaalae, ɔnate kyɛ ɛmɔka kyɛ, ‘Yɛ nwu nikye’ nati, ɛmɔ bɔne ne aha berɛ."