1 Yesu hane edwirɛ hemɔ yiele ne, ofili Galilea, na ɔpɛle Yordan hɔle Yudea mandanu dɔ. 2 Mmeni pee lili ye si, na ɔsale bɛ mukoraati anwonyerɛ. 3 Yeɛ Farisifoɛ biemɔ wale ye berɛ, né b’adwene yeɛ ole kyɛ, bɛbaasɔ ye bɛnea, yeti bɛbisale ye kyɛ: "Mmeraa ma atee kyɛ, ɛkora gyina nikye biala so yira ɛye?" 4 Yeɛ ɔyele bɛ noa kyɛ: "Ɛmɔ kenngale kyɛ, ahyɛaseɛ pɛɛ yeɛ bɔ ɔbɔle bɛ ne yɛle bɛ brienzua ne brasua ɔ? 5 Na ɔtoale so kyɛ: ‘Ɛhe ati yeɛ brienzua kɔyakyi ye baba ne ye maame berɛ, na ɔne ɔye aha abɔnu, maa bɛ munyɔ ne ayɛ anwoɔnaen kõ.’ 6 Yeti, bɛtte mmenia nyɔ kõ, mmom anwoɔnaen kõ. Na bɔ Nyameɛ aha abɔnu ne, nnɛmaa sona biala tete nu." 7 Yeɛ bɛha bɛhyirele ye kyɛ: "Ye de, nzuati yeɛ Mose hane kyɛ, ebie kɔhora koyira ɔye, ná wama ye krataa bɔ okyire kyɛ wayira ye ne?" 8 Yesu koso ha hyirele bɛ kyɛ: "Ɛmɔ ahone bɔ ɔyɛ se nati yeɛ Mose mane ɛmɔ atee kyɛ ɛmɔyira bɛ yemɔ ne; na ahyɛaseɛ ne, né ɔtte sɔ. 9 Nakoso meka mekyire ɛmɔ kyɛ, sɛ nná adwamammɔ ti, ná ebie yira ɔye sa gya foforɛ a, wasɛkye agyaa."

10 Yeɛ asuafoɛ ne ha hyirele ye kyɛ: "Sɛ sɔ yeɛ edwirɛ ne te wɔ brienzua ne ɔye afia de a, ye de angya po a ɔte pa." 11 Yeɛ ɔha hyirele bɛ kyɛ: "Nná ebiala yeɛ ɔkɔhora kɔyɛ sɔ ɔ, sana bɛ bɔ bafa bahyɛ bɛ ne. 12 Ebiemɔ wɔ berɛ a, bɛngɔhora braa gya, ofikyɛ sɔ yeɛ bɛwole bɛ ɔ, ebiemɔ koso ngɔhora braa gya, ofikyɛ mmenia ali bɛ awue,* yeɛ ebiemɔ koso, anwuro ahennie nati bɛnwa bɛngɔgya braa. Ebiala bɔ ɔkɔhora kɔyɛ ɛhe ne, ma ɔyɛ."

13 Na bɛfale ngwalaa mmaa-mmaa bɛbrɛle Yesu kyɛ ɔfa ye sa gua bɛ so, na ɔbɔ mbaeɛ ma bɛ, nakoso asuafoɛ ne sili bɛ atee. 14 Yeɛ Yesu ha hyirele bɛ kyɛ: "Ɛmɔma ngwalaa ne bra me berɛ, nnɛmɔsi bɛ atee! Ofikyɛ bɛ yeɛ anwuro Ahennie ne te bɛ deɛ ɔ." 15 Ɔfale ye sa guale bɛ so yiele ne, ofili berɛ hɔle.

16 Afei, ebie wale ye berɛ, yeɛ ɔha hyirele ye kyɛ: "Kyerɛkyerɛniɛ, nikye pa beni yeɛ meyɛ a, ngonya daa ngoa ɔ?" 17 Yeɛ ɔha hyirele ye kyɛ: "Nzuati yeɛ ebisa me pa nwo dwirɛ ne? Nyameɛ ngome twen yeɛ ɔte pa ɔ. Nakoso sɛ ɛpena kyɛ enya ngoa a, kɔ so di mmeraa naso." 18 Yeɛ obisale ye kyɛ: "Enu beni?" Yesu yele ye noa kyɛ: "Nnɛdi awue, nnɛsɛkye agyaa, nnɛwia, nnɛdi adanzewia, 19 bu wɔ maame ne wɔ baba, na dɔ wɔ mmango kyɛ wɔ nwo." 20 Yeɛ abrandeɛ ne ha hyirele ye kyɛ: "Mali ɛhe amukoraati so, nzu bieku yeɛ waha ɔ?" 21 Yesu ha hyirele ye kyɛ: "Sɛ ɛpena kyɛ ɛyɛ ye pɛpɛɛpɛ de a, kɔtɔne wɔ nwo nningyein mukoraati, na fa ma ahiafoɛ, na ekonya agyapadeɛ wɔ anwuro; na bra bali me si." 22 Abrandeɛ ne tele edwirɛ he ne, ofili berɛ hɔle, na né ye wora abɔ paa, ofikyɛ ne ole agyapadeɛ pee.

23 Yeɛ Yesu ha hyirele ye asuafoɛ nemɔ kyɛ: "Nahorɛ meka mekyire ɛmɔ kyɛ, ɔkɔyɛ se kyɛ sikaniɛ kɔhɔ anwuro ahennie nanu. 24 Na mesa meka mekyire ɛmɔ kyɛ, ɔkɔyɛ mmerɛ kyɛ afupɔngɔ kowura paneɛ bɔen nu tra kyɛ sikaniɛ kɔhɔ Nyameɛ ahennie nanu ɔ." 25 Asuafoɛ nemɔ tele ɛhe ne, bɛ nwo dwirili bɛ, na bɛhane kyɛ: "Ye de, nwa yeɛ okonya ngoa ɔ?" 26 Yesu neane bɛ haa, na ɔhane kyɛ: "Ɔhale sona ngome a, ahaa ɔngɔyɛ yé, nakoso Nyameɛ de, ɔkora yɛ nikye biala."

27 Yeɛ Petro bisale ye kyɛ: "Nea, yayakyi nikye biala berɛ yaali wɔ si, nzu deinn yeɛ yekonya ye ɔ?" 28 Yesu ha hyirele ye kyɛ: "Nahorɛ, meka mekyire ɛmɔ kyɛ, mmerɛ bɔ bayɛ nningyein mukoraati foforɛ, bɔ sona Awa ne te ye anuonyam bia so ne, ɛmɔ bɔ ɛmɔli me si ne kɔtena ahemvo bia 12 so, na ɛmɔ abu Israel mmusuakue 12 ne atɛn. 29 Na ebiala bɔ me dumaa ti, wayakyi awuro, aliemaa mmrienzua, aliemaa mmrasua, baba mɔ, maame mɔ, mmaa, ne aseɛ berɛ ne, bɛkɔbɔ ye nwo ɛyaa bɛkɔma ye, na okonya daa ngoa koso. 30 Nakoso, bɛ bɔ bɛli moa nanu pee kɔha siɛ, ná bɛ bɔ baha siɛ ne ali moa."