1 "Ɛmɔnea yé, na ɛmɔ anyɛ ɛmɔ tenenee wɔ mmenia nyunu, kyɛbɔ bekonwu ɛmɔ ɔ. Sɛ ɛmɔyɛ sɔ a, ɛmɔngonya akatua biala nngofi ɛmɔ Baba bɔ ɔwɔ anwuro ne berɛ.
2 "Yeti, sɛ ɛmɔkwaayɛ adɔyɛ a, nnɛmɔ bɔ awɛen bɛdi ɛmɔ nyunu kyɛbɔ nyaatwomfoɛ nemɔ yɛ ye wɔ sua bɔ beyia nu nanu ne dwaaso maa mmenia kamvo bɛ ne. Nahorɛ nu, meka mekyire ɛmɔ kyɛ, banya b’akatua namukoraati bayie. 3 Nakoso wɔ de, sɛ ɛkwaayɛ adɔyɛ a, nnɛmaa wɔ sa bɛen nwu bɔ wɔ sa famaa ne yɛ ne, 4 kyɛbɔ ɔkɔyɛ a w’adɔyɛ ne kɔyɛ kokoanu deɛ. Ɛhene yeɛ wɔ Baba bɔ ɔnea kokoanu ne kotua wɔ kerɛ ɔ.
5 "Na sɛ ɛmɔ bɔ mbaeɛ a, nnɛmɔyɛ ye kyɛ nyaatwomfoɛ ne, bɛ de, bɛpena kyɛ bɛbɔ mbaeɛ wɔ sua bɔ beyia nu nanu, anaa dwaaso, nekaa bɔ mmenia konwu bɛ ɔ. Nahorɛ, meka mekyire ɛmɔ kyɛ, banya b’akatua mukoraati dada. 6 Nakoso, wɔ de, sɛ ɛbɔ mbaeɛ a, kɔ wɔ sua nu, to w’anoa nu, na bɔ wɔ Baba bɔ ɔwɔ kokoanu ne mbaeɛ. Ɛhene yeɛ wɔ Baba bɔ ɔnea kokoanu ne kotua wɔ kerɛ ɔ.
16 "Sɛ ɛmɔyɛ akɔngyere a, nnɛmɔyɛ ɛmɔ nyunu bosaa te kyɛ nyaatwomfoɛ ne, ofikyɛ bɛyɛ bɛ nyunu bosaa na wamaa mmenia anwu kyɛ bɛyɛ akɔngyere. Nahorɛ, meka mekyire ɛmɔ kyɛ, banya b’akatua mukoraati dada. 17 Nakoso, wɔ de, sɛ ɛyɛ akɔngyere a, fa sakyeɛ popa wɔ ti anu, na nwunzi wɔ nyunu, 18 kyɛbɔ ɔkɔyɛ a, mmenia ngonwu kyɛ ɛyɛ akɔngyere. Mmom wɔ Baba bɔ onwu kokoanu ne ngome yeɛ okonwu ye ɔ. Ɛhene yeɛ ɔkɔmaa wɔ Baba bɔ ɔwɔ kokoanu ne kotua wɔ kerɛ ɔ.