1 Yeti, kesaalae bɔ yɛ gyidie ti, babu yɛ bem ne, ɛmɔma yɛfa y’Awurade Yesu Kristo so, na yɛne Nyameɛ tena asomdwie nu. 2 Gyidie bɔ yɛle ye wɔ Yesu nu nati, yanya ye nwo atee yapingye Nyameɛ, na sɔ adom ne yeɛ yɛwɔ nu ne. Na Nyameɛ adom bɔ yekonya ye nanwo anidasoɛ nati, yɛdi ahurusi.* 3 Nná ɛhene angome, mmom ɛmɔma yɛli ahurusi mmerɛ bɔ yɛnwu amaneɛ ne, ofikyɛ yɛse kyɛ amanehunu fa animia ba, 4 na animia ne maa Nyameɛ dɛ́ yɛ to nu, na sɛ Nyameɛ dɛ́ yɛ to nu a, yɛnya anidasoɛ. 5 Na anidasoɛ ne de, onni hwamɔ, ofikyɛ Nyameɛ nate honhom krongron bɔ ɔfa mane yɛ naso ahwie ye dɔ agua y’ahone nu.

6 Mmerɛ bɔ ne yɛtɛ́ yɛ mmerɛ ne, Kristo wu mane abɔnefoɛ, wɔ mmerɛ bɔ ne bahyɛ nanu. 7 Ɔkɔyɛ se paa kyɛ ebie kowu kɔma teneneeniɛ; sona pa de, ebia ebie kowu kɔma ye. 8 Nakoso Nyameɛ amaa yanwu ye paa kyɛ ɔdɔ yɛ, ofikyɛ mmerɛ bɔ ne yɛtɛ́ te abɔnefoɛ ne, Kristo wu mane yɛ. 9 Ɔnate kyɛ kesaalae bɛnate ye mogya naso babu yɛ bem nati, kyɛbɔ ɔte biala ne, ɔnate ye so kole yɛ kofi ɛyaa nanu. 10 Mmerɛ bɔ ne yɛte Nyameɛ atamfo ne, ɔnate Ɔwa ne wue naso siesiele yɛne ye afia, ye de kesaalae bɔ wasiesie yɛne ye afia ne, kyɛbɔ ɔte biala ne, ɔnate ye ngoa naso kole yɛ maa ɔkɔbo so. 11 Nná ɛhe angome, mmom y’Awurade Yesu Kristo bɔ yɛnate ye so asiesie yɛ ne Nyameɛ afia nati, yɛdi ahurusi wɔ Nyameɛ nu.

12 Ná ɔnate sona-horɛ so yeɛ bɔne wale wiase ɔ, ná ewue nate bɔne so wale, maa yeti ewue atrɛ aha ebiala, ofikyɛ sona biala ayɛ bɔne. 13 Né bɔne wɔ wiase kora yeɛ mmeraa ba ɔ, nakoso sɛ mmeraa nne berɛ a, bɛmmu ebiala fɔ wɔ bɔne nwo. 14 Ɛhe mukoraati nu ne, ewue lili sona so fili Adam so tonn oodwuli Mose so, na bɛ bɔ bannyɛ bɔne bɔ Adam yɛle ne bie ne po, olili bɛ so. Né Adam te kyɛ bɔ ɔkɔwa ne.

15 Nakoso akyɛdeɛ ne de, ɔtte kyɛ bɔne ne. Ɔte nahorɛ kyɛ sona-horɛ bɔne ti yeɛ mmeni pee awu ɔ, nakoso Nyameɛ adom ne te piri paa, na sɔ ala yeɛ ye akyɛdeɛ bɔ ɔnate sona-horɛ bɔ yeɛ ole Yesu Kristo n’adom so fa ma ne, wabu so wama mmeni pee. 16 Afei, Nyameɛ akyɛdeɛ ne, ɔne sona-horɛ ne bɔne ne, ɔtte pɛ. Ofikyɛ bɔne kõ bɔ sona ne yɛle ne maa bɛbule ebiala fɔ, nakoso bɔne pee si po ne, akyɛdeɛ ne amaa babu mmeni pee kyɛ bɛte ateneneefoɛ. 17 Ɔte nahorɛ kyɛ, bɔne kõ bɔ sona-horɛ yɛle nati, ewue nate sɔ sona naso lili tumi. Nakoso bɔ ofili Yesu Kristo deɛ nanu wale ne te piri tra ɛhene koraa; ebiala bɔ onya Nyameɛ adom bɔ wabo so, ne tenenee akyɛdeɛ ne, ɔnate sona-horɛ, bɔ yeɛ ole Yesu Kristo naso koli hene wɔ ngoa nu.

18 Yeti, kyɛbɔ bɔne komapɛ ne maa bɛbule ebiala fɔ ne, sɔ ala yeɛ tenenee komapɛ ne maa bɛbu ebiala bem, kyɛbɔ ɔkɔyɛ a bekonya ngoa ɔ. 19 Na kyɛbɔ sona-horɛ ne asoserɛ ne maa mmeni pee yɛle abɔnefoɛ ne, sɔ ala yeɛ sona-horɛ ne sotie ti, mmeni pee kɔyɛ teneneefoɛ. 20 Mmeraa ne wale kyɛbɔ ɔkɔyɛ a, bɔne kɔsone. Nakoso nekaa bɔ bɔne ne sone ne, Nyameɛ adom ne sonene maa ɔbole so. 21 Na kyɛbɔ bɔne ne ewue lili hene ne, sɔ ala yeɛ adom nate tenenee so koli hene, na ɔnate y’Awurade Yesu Kristo so kɔfa yɛ kɔhɔ daa ngoa nu ɔ.