1 Nniema mɔ, gyidie bɔ ɛmɔle ye wɔ Awurade Yesu Kristo bɔ ɔte y’anuonyam nanu ne, nnɛmɔfa nyeyemuɛ bɛbata ye nwo. 2 Sɛ ebie bɔ owura sikaa kɔkorɛ kaa ne atadeɛ kama-kama ba nekaa bɔ ɛmɔyia nu ne, na hianiɛ bie bɔ owura atadeɛ fiɛ koso ba berɛ, 3 ná ɛmɔfa nidie bɛma bɔ owura atadeɛ pa ne, na ɛmɔka bɛkyire ye kyɛ: "Baatena bia pa he aso," na hianiɛ ne de, ɛmɔka bɛkyire ye kyɛ: "Gyina berɛ" anaa "tena me gya bo wa" a, 4 aso ɛhe ngyire kyɛ ɛmɔ ayɛ nyeyemuɛ, na ɛmɔ ayɛ mmenia bɔ bɛbu ndɛngyea? 5 Nniema mɔ bɔ ɛmɔla m’ahone so, ɛmɔtie. Nná bɛ bɔ wahia bɛ wɔ wiase nanu ne, yeɛ Nyameɛ aye bɛ kyɛ bɛɛyɛ asikafoɛ wɔ gyidie nanu ne? Na nná bɛ yeɛ bekonya ahennie bɔ wahyɛ bɔ kyɛ, bɛ bɔ bɛdɔ ye ne konya ye ne? 6 Nakoso ɛmɔbu ahiafoɛ animtia. Aso, nná asikafoɛ yeɛ bɛhyɛ ɛmɔ so ne, na nná bɛ yeɛ bɛtwe ɛmɔ bɛkɔ kɔɔto ne? 7 Dumaa pa bɔ Nyameɛ afa ama ɛmɔ ne, nná bɛ yeɛ bɛka mmusue dwirɛ bɛfa ye nwo ne?

8 Mmeraa bɔ ɔte piri wɔ Tworɔnzɛm nanu ne ka kyɛ: "Dɔ wɔ mmango kyɛ wɔ nwo," sɛ ɛmɔdi so a, ye de ɛmɔ ayɛ nikye. 9 Nakoso sɛ ɛmɔkɔ so bɛyɛ nyeyemuɛ a, né ɛmɔ ayɛ bɔne, na mmeraa ne bu ɛmɔ fɔ kyɛ ɛmɔte mmeratofoɛ. 10 Sona biala bɔ odi mmeraa namukoraati so, ná okobu enu komapɛ po so ne, wali ye mukoraati nwo fɔ. 11 Ofikyɛ bɔ ɔhane kyɛ, "Nnɛsɛkye agyaa" ne, ye ala yeɛ ɔhane kyɛ, "Nnɛdi Awue" ne. Yeti sɛ anzɛkye agyaa, ná edi awue a, ato mmeraa. 12 Yeti, ɛmɔma ɛmɔ dwudwolɛ ne ɛmɔ nneyɛɛ hyire kyɛ, ahofadie mmeraa yeɛ bɛkɔfa bɛkobu ɛmɔ atɛn ɔ. 13 Sona bɔ onnwu ebie anwunvoin ne, ye koso bɛbu atɛn a, bɛngonwu ye anwunvo. Anwunvoin kora di ngunim wɔ atɛmmuo nu.

14 Nniema mɔ, sɛ ebie ka kyɛ ole gyidie, ná olle nyumaa a, mvasoɛ beni yeɛ ɔwɔ so ɔ? Aso sɔ gyidie ne kɔhora kole ye ngoa? 15 Sɛ aliemaa bie nwo la so, ye noa aleɛ abɔ ye, 16 na ɛmɔ nu bie ka kyire ye kyɛ, "Fa asomdwie kɔ, wɔ nwo yɛ wɔ hye, na wɔ ko yi." Nakoso wamma ye bɔ nipadua ne hia a, mvasoɛ beni yeɛ ɔwɔ so ɔ? 17 Sɔ ala yeɛ gyidie koso, sɛ nyumaa bokka so a, né wawu.

18 Ebia ebie kɔha kyɛ, "Ɛle gyidie, yeɛ me koso nne nyumaa." Kyire me wɔ gyidie bɔ nyumaa bokka so ne, na me koso ngɔfa nyumaa ngohyire wɔ me gyidie. 19 Edɛ di kyɛ Nyameɛ komapɛ yeɛ ɔwɔ berɛ ɔ? Ayɛ nikye, sunzummɔne mɔ po de di, na bɛ nwo popo. 20 Sona bɔ elle adwene, ɛnze kyɛ gyidie bɔ nyumaa bokka so ne, wawu? 21 Nná nyumaa so yeɛ begyina bɛbule yɛ baba Abraham bem, mmerɛ bɔ ɔfale ɔwa Isaac tole afɔleɛ bokyea so kyɛ ɔfa ye bɔ afɔleɛ ne? 22 Nnaa anwu kyɛ ɔfale nyumaa bokale ye gyidie so, ɔnate nyumaa so yeɛ ye gyidie lili mu ɔ. 23 Na tworɔnzɛm ne wale nu kyɛ "Abraham nyane gyidie wɔ Nyameɛ nu, na bɛbule ye kyɛ ɔte teneneeniɛ," na bɛfrɛle ye Nyameɛ damvo. 24 Ɛhe amaa ɛmɔ anwu ye kyɛ, nyumaa yeɛ begyina so bebu ebie bem ɔ, ná ɔtte gyidie ngome. 25 Nná sɔ ala yeɛ bɛgyinane nyumaa so bɛbule Rahab bɔ ɔte tuutuuniɛ ne bem, mmerɛ bɔ olɛle mmrienzua bɔ bɛsomane bɛ ne kama, ná ɔmaa bɛfale atee foforɛ so bɛhɔle ne? 26 Na kyɛbɔ nipadua bɔ honhom* nne nu awu ne, sɔ ala yeɛ gyidie bɔ nyumaa bokka so ne, wawu ɔ.