1 Labuɛ di otu nii kamɛ nlɛ, "Wa nfɛ ninsɔ fɔ nnyu ku nkpa ole, nintofo lɛsaa le ninlɛ ni." Kafɔɔ nnitintĩ diadiki diatuo alɛ diɛbla kasakasa. 2 Labuɛ nlɛ, "Sɛma nle dibuu. Ni obe lɛsaa di nkpa ole n-ta?" 3 Labla nlɛ kɔyɔ nta nkpee suoto nii ɔmɛnɛfɛ ku abuusaa ɔbla- kafɔɔ disibu nii lakple diatɔkakatɛko mi ku ninumbe. Lamiɛ kafɔɔ nlɛ kotofo lɛsaa le niɛtɛ diefũ kɔya diɛta ni batii, alɛ baabla ni di osi kalɔ, di nkpa lɛma osiɛ di ayi asɛɛ kamɛ.

4 Labla sɛkpɛ kplɛ: Latofo ayo lata suoto nii, lakpɛ kafɔɔ nta awosobi afe. 5 Labla kɔba ku suoto lɛyɔɔ- nnyakɔ, lasɔ kafɔɔ alewosobi awoso ateate ninnya kamɛ. 6 Labla ntu apanta alɛ kakpekpete ntu di awoso ya nikɔtaka ni disi suoto. 7 Laya balanle-suɔtɔ ku balanle-sanko, lawɛ kafɔɔ balanle bamba ba baalofo ni di leyo nii. Lawɛ kafɔɔ banankyue ku babɔkɛɛ kpinwu lalenkee otii biala nitodiwɛ ni di Yereusalem fiɛ baalofo mi nii. 8 Lasiisa koto fututu, koto sɛɛle ku baka ku nsɔ lɛsaawɛ lata suoto nii. Lawɛ basuɔtɔ ku basanko sinu-basantɛ, diɛkyakaa ni di basɔnɔ kpinwu suoto- asaa ya ninta ni osuɔtɔ otu suoto lɛyɔɔ. 9 Labale otii kplɛ lalenkee otii biala nitodiwɛ ni di Yerusalem fiɛ baalofo mi nii. Kafɔɔ di n-ya mmle amuu kamɛ yi, lakple lawɛ ninumbe nii.

10 Ntasĩ lɛsaa kuninwii di anumbi nii lamiɛ nii;

ntasĩ otu nii lɛmɛnɛfɛsaa kuninwii.

Otu nii lanya suoto lɛyɔɔ di sɛkpɛ nii simuu kamɛ,

nle mmle kafɔɔ niale letota diata sɛkpɛ nii simuu nɛ.

11 Kafɔɔ latɛ anu lanyu ni asaa ya amuu di nnɛɛ nii labla ni,

ku asaa ya latufu lakpa lawɛ ni yi,

lɛsaa biala kasakasa, ɔkpɛ ɔbla owii di kɔfɛɛfɔ kamɛ diale;

ntawɛ lɛsalɛsaa di kufĩ kalɔ.

12 Ni lamunikĩi nlɛ kobu disi nii di ninumbe,

difĩibuo ku dibuu kafɔɔ nɛ.

Obe lɛsaa di otii wɔ nin-le ni ɔka asaa kamafuo ɔbla ɔkyakaa,

ninlenkee nle batɔɔbla ni?

13 Lanya nlɛ ninumbe nlɛ dilenke dibuu,

fɛ mmle okle di lɛkpa nlɛ dilenke ni ditunu.

14 Numbentɛ nkpe anumbi di disi nɔɔ kamɛ,

di obe wɔ di buutɛ nkyɛ ni di ditunu kamɛ;

kafɔɔ labatofo nlɛ

lɛsaa ninwii nwu nin-wa di akyuu lɛma nwu anyɔ suoto.

15 Ninfɛ labuɛ di otu nii kamɛ nlɛ,

"Lɛsaa le niɛwa ni di buutɛ suoto kafɔɔ kamawa di suoto nii.

Ni obe lɛsaa nfɛ lɛwɛ di ninumbe ɔwɛ kamɛ?"

Nioso labuɛ di otu nii kamɛ nlɛ,

"Nle mmle kafɔɔ lɛbla kasakasa."

16 Diekye blɔbanyuma numbentɛ ku buutɛ obe lele;

babayee akyuu lɛma nwu anyɔ di obe kakuu kamɛ.

Dikpeni numbentɛ kafɔɔ lekpi fɛle buutɛ!

17 Nioso lakyidi nkpa, diekye ɔkpɛ wɔ bɔɔbla ni di kufĩ kalɔ lale ninyinyiisaa diatɛɛ. Amuu lɛbla kasakasa, ɔkpɛ ɔbla owii di kɔfɛɛfɔ dile. 18 Lekyidi asaa ya amuu latufu lakpa ni di kufĩ kalɔ, diekye dikpeni lediɛ nya lɛtɛ otii wɔ nikɔwa ni di sɛmaa nii. 19 Owe nin-ye nse numbentɛ ee buutɛ abale? Kafɔɔ abale sɛsaate di sɛkpɛ se simuu layɔ osie ku lɛsaatofo nii labla ni suoto di kufĩ kalɔ. Nle mmle kafɔɔ lɛbla kasakasa. 20 Nioso otu nii lakyako ɔkpa di otufu-ɔkpa ɔkpɛ nii omuu di kufĩ kalɔ suoto. 21 Diekye otii kafuo ɔkpɛ nɔɔ ɔbla ku ninumbe, lɛsaatofo ku disibu. Kafɔɔ dikpeni andiɛ asaa ya amuu nikpe nwɔ ni anta otii owo wɔ ninambla ɔkpɛ ata nya nii. Nle mmle kafɔɔ lɛbla kasakasa ku disi kpile dibinte. 22 Obe lɛsaa di otii n-wɛ ankyeko otufu wɔ omuu antufu-ankpa ni ku ɔkpɛ sikitii sɛkpɛ se ambla ni di kufĩ kalɔ? 23 Ɔkpɛ nɔɔ nle dibuo ku ninyinyii di obe nɔɔ omuu kamɛ; bia kakyɛ yi, disibu nɔɔ nintɛ ɔnyɛɛ. Nle mmle kafɔɔ nle kasakasa.

24 Otii dilaafuo lɛsaa nwaa kuninwii ɔbla dilenkee alɛ aale, an-nyi, anle nkpa kafɔɔ di ɔkpɛ nɔɔ ɔbla kamɛ. Lɛnya nlɛ nle mmle kafɔɔ, Yaa kɔnɛɛ niɛta, 25 diekye nse aasi kaamɛ, owe nimafuo ole ee annya suoto lɛyɔɔ? 26 Yaa nta otii wɔ nimbuo nwɔ ni anu ninumbe, lɛsaatofo ku suoto lɛyɔɔ. Kafɔɔ anta kpileblatɛ ɔkpɛ wɔ ninle ni asaa osiisa ku lɛsaawɛ omiɛ ɔtɛ di asaa ntɛkɔ alɛ aayɔ nya ankpee di otii wɔ nimbuo ni Yaa anu nnɛɛ. Nle mmle kafɔɔ lɛbla kasakasa, ɔkpɛ ɔbla owii di kɔfɛɛfɔ kamɛ.