1 Lakple lanyu, ni lanya ninyinkasaa le nimuu baatɔɔbla ni di kufĩ kalɔ nɛ:

Lanya kafɔɔ mba baatoonyinka ni nnumɛɛ-

batawɛ kafɔɔ kɔnɛɛ kaafutu-kpeetɛ;

osie lawɛ di banyinkatɛ lɛma lɛkyɛ-

batawɛ kafɔɔ kɔnɛɛ kaafutu-kpeetɛ.

2 Ni labuɛ nlɛ batii ba nitookpi nii,

batookpi ni kofokofoko

nkpe suoto lɛyɔɔ balenke mba ninkpe ni nkpa,

mba niekple basi ni nkpa.

3 Kafɔɔ dilɛ diɛta mba manadilofo ni

dilenke akyuu ya mmle anyɔ nwu,

manadinya ni akpilesaa

ya bɔɔbla ni di kufĩ kalɔ.

4 Ni lanya kafɔɔ nlɛ ɔkpɛ ɔbla sikitii omuu ku asaa amuu ɔwɛ ntaa ninkye otii sɛsɔfɔwo ɔkpɛ di owo nɔɔ suoto. Nle mmle kafɔɔ lɛbla kasakasa, ɔkpɛ ɔbla owii di kɔfɛɛfɔ kamɛ dile.

5 Buutɛ nkpee nnɛɛ nɔɔ baawo ansiɛ,

ambla suoto nɔɔ kɔká.

6 Dilɛ alɛ faawɛ lɛsaa kafui ku atoko ɔkyɛ ole

ninlenke alɛ faawɛ asaa kpinwu ku otufu-ɔkpa sikitii,

di ɔkpɛ ɔbla owii di kɔfɛɛfɔ kamɛ.

7 Lakple lanya lɛsaa le niabla ni kasakasa di kufĩ kalɔ:

8 Otii onwii lawɛ aasiɛ ni lete nɔɔ;

atawɛ obisuɔtɔbi ee obilɛma-suɔtɔbi.

Kayɛntɛkɔ ditawɛ diata otufu-ɔkpa nɔɔ,

kafɔɔ lɛsaawɛ nɔɔ le aawɛ ni ditabuo nwɔ anu.

Ni aakaalɛ alɛ, "Owe kotufu-nkpa nta,

ni obe oso ninaale nkpa nta suoto nii?"

Nle mmle kafɔɔ nle kasakasa-

lɛkpɛnkuu dile!

9 Banyɔ nlɛ balenke onwii,

diekye man-wɛ lɛsaa biene mankyeko ɔkpɛ lɛma kamɛ:

10 Nse onwii lɛnɔɔ yi,

ɔnyɔɔfa kamafuo nwɔ ɔtakatɛ.

Kafɔɔ yɔɔsa bɔɔta otii wɔ niɛnɔɔ

anaa ni otii kuonwii abatakatɛ nwɔ nii!

11 Diɛkyakaa nii, nse batii banyɔ lesi bate yi, babafilasa bawo.

kafɔɔ lɛ di otii onwii lete kamafuo difila ɔta suoto nɔɔ?

12 Kuntɛ baafuo otii onwii olenkee yi,

batii banyɔ kamafuo oyila kpinkpĩ odiki suoto lɛma.

Ekũ eetiɛ be beefintĩsa ni ninfuo obudi wla.

13 Okosopo piitɛ wɔ niebe ni anu nlɛ alenke ɔnɔɔfo buutɛ wɔ ninle ni ɔka wɔ ninansin-ye ni mmle mannu ni ɔlaa osĩ ɔta. 14 Okosopo kafuo leyo katenkɔ okye ɔwa amale sɛka, ee baafuo nwɔ olofo di dipii kamɛ di sɛkakalekɔ nɔɔ kamɛ. 15 Lanya nlɛ mba bamuu ninsi ni nkpa mankyɛ ni kafɔɔ di kufĩ kalɔ ntikanko okosopo wɔ nimale ni ɔka atesaa. 16 Kalookɔ ditawɛ kaata batii ba bamuu niawɛ ni fiɛ aabawa nii. Kafɔɔ otii wɔ nin-le ni atesaa nwu ditabuo batii ba niawa ni sɛɛmaa anu. Nle mmle kafɔɔ nle kasakasa, ɔkpɛ ɔbla owii di kɔfɛɛfɔ kamɛ dile.