1 Leyooto biene nlɛ dilenke akɔnɔnkɔnɔsaa nwaa,

dikpiyi kafɔɔ nlɛ dilenke lelofoyi.

2 Kakufa ɔkyɛ nlɛ dilenke

alɛ faakyɛ nkpa kalekɔ leyo,

diekye kukpi nkpe kuɔta otii biala;

nioso batii ba ninsi ni nkpa bayɔ nle mmle bakpee di disi kamɛ. 3 Sɛnyaami owi nlɛ dilenke sɛma,

diekye anu ya nikɔkpɛ ni nyaami nlɛ diɛta otu.

4 Banumbentɛ otu n-wɛ di kakufa,

kafɔɔ babuutɛ otu n-wɛ di suoto lɛyɔɔ kanyakɔ.

5 Dilɛ alɛ faanu banumbentɛ ɔlaa osĩ ɔta

ninlenke alɛ faakyɔɔ babuutɛ onu atoko.

6 Fɛ mmle di siwuu ntataa ni kpookpoo di ɔtɔ kamɛ di dibukii kalɔ yi,

nkpo di babuutɛ sɛma nte nɛ.

Nle mmle kafɔɔ lɛbla kasakasa.

7 Batii onyinka nta numbentɛ mabla buutɛ,

ditunu kamɛ asaa ofũ kafɔɔ nlalaasa otu.

8 Ɔlaa kayɛntɛlekɔ nlɛ dilenke kasɔkakyekɔ ninwu,

suoto ɔtɛ kaasɔ kafɔɔ nlɛ dilenke ɔkanta.

9 Tanta ɔblɔ latɔtaka fɔ wlawla di ninwuna lɛfɔ kamɛ,

diekye babuutɛ atĩ suoto di ɔblɔ ntika.

10 Tankaalɛ falɛ, "Obe oso di saa obe lalɛ dialenkee miɛ ayi ya mmle?"

Diekye diele ninumbesaa alɛ faakaalɛ sɛlaa se mmle okle.

11 Ninumbe nle atesaa ya ninle ni lɛsaa nwaa le

ninkyakaako ni mba ninnya ni kufĩ.

12 Ninumbe nle oyududu

fɛ mmle di koto nle ni oyududu,

kafɔɔ lɛsaa le ninlɛ ni di lɛsaatofo kamɛ ninle nle mmle alɛ:

ninumbe kamufũ otii wɔ di nkpa nkpe ni ninklee.

13 Tɛ anu fanyu lɛsaa le di Yaa lɛbla ni:

Owe nimafuo lɛsaa le

di Yaa lebonsa ni oyilasa?

14 Nya suoto lɛyɔɔ, nse asaa kɔlɛ ɔkyɛ di obe owo kamɛ;

kafɔɔ nse asaa diɛlɛ di obe owo kamɛ yi, yɔ ni nkpo:

Yaa niɛbla ni nkpo

fɛ mmle ɛɛbla ni ɔbamba.

Nkpo oso, otii dilɔbafuo

lɛsalɛsaa ɔnya okyeko kayi kamaa nɔɔ suoto.

15 Di kasakasa nkpa nii be mmle kamɛ yi, ntɔɔnya asaa ya mmle anyɔ:

tininitɛ wɔ nikɔwɔɔ ni di ɔsaabla tinini nɔɔ kamɛ,

ku siensietɛ wɔ kafɔɔ ninsi ni nkpa kaanale di asiensie sɛsaabla nɔɔ kamɛ.

16 Tante tinini faawaalɛsa,

ee faabe anu faawaalɛsa-

obe oso fɔɔwɔɔsa suoto lɛfɔ?

17 Tanwɛ disiensie faawaalɛsa,

tanle kafɔɔ buutɛ-

obe oso fabakpi fiɛ di obe lɛfɔ n-wo?

18 Dilɛ alɛ faamufũ ninwii fanklee

alɛ flaadiɛ lɛbamba diyu.

Otii wɔ ninyɛkɛ ni Yaa kamadie di amuu kamɛ.

19 Ninumbe nta numbentɛ onwii n-wɛ osie nwaa

anlenkee batunletɛ lefosi di okpoo kplɛ kamɛ.

20 Otii tinini kuonwii nnaa kaasɔ suoto,

ambla ni lɛsaa le ninlɛ ni, anambla ni okpile diidii.

21 Tankyɔɔ atoko di ɔlaa biala di batii mbuɛ nii,

nse diele nkpo, fabanu mmle di kpɛmblatɛ lɛfɔ kɔkpaani fɔ nii-

22 diekye faye di otu lɛfɔ kamɛ falɛ,

afɔ omu lɛfɔ faakpaani batii bamba.

23 Layɔ ninumbe lasɔ n-ya mmle amuu lanyu nii, labuɛ nlɛ,

"Latɛ nlɛ kɔwɛ ninumbe"-

kafɔɔ nle mmle lalenkee mi nnɛɛ.

24 Lɛsaa lele di ninumbe nle yi,

dikpe kaakyonkɔ, diɛtɛ diekyofo ni kafɔɔ-

Owe nimafuo ni ɔnya?

25 Nioso lamunikĩisa disibu nii lakyɔɔ lɛsɔnu,

nlɛ kobuo kaamɛ nin-wolaa kafɔɔ ninumbe ku sɛlaa kanya didiki

ninnu kafɔɔ dibuu asiensie sɛsaabla

ku abuusaa difiibuo kasɔ.

26 Lɛsaa le ninkpe olo dilenke ni kukpi lanya,

ɔsanko wɔ ninle ni dikyĩ,

nnwɔ otu ninle ni okũ wɔ bɛɛkyɔɔ ni

ku nnwɔ nnɛɛ ninle ni sɛkpɛnkyɛ.

Otii wɔ nimbuo ni Yaa anu kamatoso nwɔ,

kafɔɔ dikyĩ nɔɔ kamamufũ kpileblatɛ nwu.

27 Asaatuotɛ nwu kobuɛ alɛ, "Nyu lo, nnya lɛsaa le lanya ni:

"Layɔ lɛsaa ninwii lakyakaa di lɛbamba suoto nlɛ kowolaa sɛlaa kanya didiki kamɛ-

28 di obe wɔ lanwini latowolaa ni kamɛ,

kafɔɔ ntanya ni yi-

Lawɛ osuɔtɔ onwii wɔ ninte ni tinini di kakpe kamɛ,

kafɔɔ ntawɛ ɔsanko wɔ ninte ni tinini kuonwii di bamuu lɛma kamɛ.

29 Nle mmle lete lanya nlɛ:

Yaa labla otiinyu alɛ aate tinini,

kafɔɔ batii lɛkyɛ boowolaa sɛlaa kanya didiki kpinwu."