1 Obe nkpe diɛta ni lɛsaa biala,

obe kafɔɔ nkpe diɛta ni lɛsaa biala ɔbla di osi kalɔ:

2 lelofoyi obe nkpe, okpibee kafɔɔ nkpe,

alesaa okpeebee nkpe, okutubee kafɔɔ nkpe,

3 otii olobee nkpe, ofiɛ ɔkyabee kafɔɔ nkpe,

obibiɛbee nkpe, otofobee kafɔɔ nkpe,

4 kaku owibee nkpe, ɔmambee kafɔɔ nkpe,

kaku osiɛbee nkpe, otũmbee kafɔɔ nkpe,

5 afuɔ osiisabee nkpe, ɔsamiisa ninya obe kafɔɔ nkpe,

ominikobee nkpe, ɔblábee baawo suoto kafɔɔ nkpe,

6 owolaabee nkpe, nnɛɛ ɔkpabee kafɔɔ nkpe,

asaa ɔtɛbee nkpe, asaa ɔyɔ oyubee kafɔɔ nkpe,

7 asaa ɔbɛbɛɛbee nkpe, ɔkaabee kafɔɔ nkpe,

olò kananabee nkpe, ɔkakatɛbee kafɔɔ nkpe,

8 ɔbɔmbɔbee nkpe, okyidibee kafɔɔ nkpe,

kakpɛ ɔkpɛbee nkpe, atoko ɔkyɛ olebee kafɔɔ nkpe.

9 Obe lɛsaa di kpɛblatɛ n-wɛ ankyeko otufu-ɔkpa nɔɔ kamɛ? 10 Ntɔɔnya atoo ya di Yaa lɛyɔ eetika ni di batii suoto. 11 Aabla lɛsaa biala diɔlɛ ni onyu di obe nini kamɛ. Ɛɛyɔ kafɔɔ obe wɔ ninaa ni kaloo eekpee di batii situ kamɛ; kafɔɔ blɔbafuo lɛsaa le di Yaa labla, diɛyɔ ni di kasɔkakyekɔ diɛlaase ni di kayɛntɛlekɔ kasɔ onu. 12 N-ye nlɛ lɛsaa nwaa kuninwii nnaa diɛta batii dilenkee suoto lɛyɔɔ ku dibiene ɔbla di obe wɔ basi ni nkpa. 13 Alɛ otii biala kale, an-nyi, anle nkpa kafɔɔ di otufu-ɔkpa nɔɔ omuu kamɛ- nle mmle ninle Yaa lɛtasaa nɛ. 14 N-ye nlɛ lɛsaa biala di Yaa lɛbla ni kamawɛ dinaa ni kaloo; blɔbafuo lɛsalɛsaa kuninwii ɔyɔ ɔkyakaa, blɔbadiki lɛsalɛsaa kuninwii kafɔɔ bakyeko ni kamɛ. Yaa lɛbla ni nkpo alɛ batii bamuu kamayɔ dibu mantɔɔ.

15 Lɛsaa lele ninkpe miɛ ntodiwɛ diɛbafe,

lɛsaa le kafɔɔ nimawa ni ntodiwa diɛbafe;

Yaa kamakaalɛ kafɔɔ nkuntaa ankyeko obe wɔ nitɔbafe ni ɔkyɛ.

16 Ni lanya kafɔɔ lɛsaa bamba di kufĩ kalɔ nɛ:

Di nkankɔ yi- asiensie sɛsaabla niawɛ ninfa,

di ntininikɔ yi- asiensie sɛsaabla niawɛ ninfa.

17 Labuɛ di otu nii kamɛ nlɛ,

"Yaa kamakanko

batininitɛ ku basiensietɛ akyuu lɛma nwu anyɔ,

diekye obe kamawɛ ninta ɔsaabla biala,

obe diɛta ni ɔsaabla biala."

18 Labuɛ nwu disi kafɔɔ nlɛ, "Batii mma yi, Yaa nsɔ ma an-nyu di mmle baafuo ni otofo alɛ bate ni fɛle babɔkɛɛ. 19 Lɛsaa le nin-wa ni di otii suoto nte fɛle babɔkɛɛ lele; lɛsaa ninwii nwu nisoko akyuu lɛma nwu anyɔ nɛ. Fɛ mmle di onwii nkpi ni yi, nkpo di ɔbamba nkpi nɛ. Ninwuna ninwii ninkpe ma; otii dielenke bɔkɛɛ. Lɛsaa biala lɛbla kasakasa. 20 Lɛba ninwii di bamuu boofe; kɔtɛ kamɛ di bamuu lekye, kɔtɛ kamɛ kafɔɔ di bamuu kamapɛmankple mansifi. 21 Owe nin-ye nse osi di otii ninwuna ntaka ninsifi ee osoo di bɔkɛɛ ninwuna nsoo ninsifi kasɔ kamɛ?"

22 Nioso lanya nlɛ lɛsaa biene kuninwii nnaa diɛta otii dilenkee alɛ aabla ɔkpɛ nɔɔ anle, diekye nni ninle nwɔ lele nɛ. Diekye owe nimafuo nwɔ ɔkpaa ɔwako alɛ abanyu lɛsaa le nimawa ni di kakpimaa nɔɔ?