1 Tofo lɛkyɛmbi lɛfɔ nse fɛɛkyɛ Yaa leyo. Kyɛ faalaatɛɛtɛɛ faakyɔɔ atoko, dilɛ dilenke alɛ faata babuutɛ oleɔta, mba ninan-ye alɛ bloololaa babla nii.

2 Tampɛko kanya lɛfɔ sɛwa,

tampɛsɛwa di otu lɛfɔ kamɛ

falɛ foobuɛ ɔlaa owo di Yaa anu.

Yaa nkpe di osi

afɔ kafɔɔ fakpe kaasɔ,

nioso ta sɛlaa lɛfɔ sile ɛsɛɛ.

3 Fɛ mmle di kɔlaafɔ ɔsɛ nwa ni nse sɛsaabla kpinwu nkpe ni yi,

nkpo di buutɛ lɛkakatɛ nte nse sɛlaa kpinwu nkpe nɛ.

4 Nse fɛɛka ntam fɛɛta Yaa yi, tankyɛkyɛlɛko ni ɔbla. Anaa suoto lɛyɔɔ kuninwii ɔnya di babuutɛ kamɛ; bla di ntam lɛfɔ kanya. 5 Nse faaka ntam yi, dilɛ dilenke alɛ fɛɛka ntam kafɔɔ faabla nini kanya. 6 Tanta kanya lɛfɔ lakpaa fɔ kaakpee di okpile kamɛ. Tambuɛ kafɔɔ faatɔkɔ olekatakɔ tɔkyɛntɛ falɛ, "Kanya niataa mi di ntam nii ɔka suoto." Obe oso di Yaa kanya ɔblɔ di ɔlaa wɔ feebuɛ ni suoto anwɔɔsa nnɛɛ lɛfɔ kamɛ ɔkpɛ? 7 Alaafɔ kpinwu ɔsɛ ku sɛlaa kpinwu obuɛ nle kasakasa. Nkpo oso yɛkɛ Yaa.

8 Nse fɛɛnya boonyinka bapiitɛ di kale obo owo kamɛ, beesĩ kafɔɔ lɛka tinini ku asaa ya ninle ma ni ale ɔyɔ ɔta yi, tanta diabla fɔ ɔkpɛ di asaa nwu okle suoto; diekye ɔnɔɔfotii wɔ niɛtaka katoo alenke ni anu ntika di ɔnɔɔfotii owo suoto, banɔɔfotii bamba kafɔɔ lekple bakpe bɛɛtaka katoo balenke ni akyuu nwu anyɔ. 9 Bamuu n-wɛ lele mankyeko kasɔ nwu alesaa suoto; ɔka nwu omu n-wɛ lɛsaa ankyeko afe nwu kamɛ.

10 Otii lele nimbɔmbɔ koto yi, koto ninwo nwɔ ole diidii;

otii lele kafɔɔ nimbɔmbɔ lɛsaawɛ yi, lɛsaa le an-wɛ ni nimbuo nwɔ anu diidii.

Nle mmle kafɔɔ nle kasakasa.

11 Fɛ mmle di asaa ntɔɔkpɛ antɔɔkyakaa ni yi,

nkpo di baletɛ kafɔɔ nkpɛ mankyakaa nɛ.

Ni obe lɛsaa di saate n-wɛ ankyeko kamɛ,

diele anu nɔɔ an-yɔ antika nya di suoto?

12 Kpɛntɛ sɛkyɔsĩ n-wɛ ɔmɛnɛfɛ,

kuntɛ eele kafuii ee, kpinwu,

kafɔɔ asaawɛntɛ lɛsaawɛ kpinwu nɔɔ

nintɔɔ osuku aakyɔsĩi.

13 Ntɔɔnya ninyinyisaa dikpilesaa ninwii di kufĩ kalɔ:

beesiisa lɛsaawɛ bɛɛtɛ alɛ diabla saate nini dikpile,

14 ee lɛsaawɛ le nieyu ni diefe ni di sɛlaa kpile otũ sewo kamɛ,

alɛ nse akpe obisuɔtɔbi yi,

lɛsalɛsaa kuninwii dilɔbabu ditɔɔ.

15 Lɛkyɔtɔ di otii ndie ankye ɔya olofofɔtɔ kamɛ,

fɛ mmle ankye anwa ni yi, nkpo kafɔɔ ansifi nɛ.

An-yɔ lɛsalɛsaa kuninwii akyeko ɔkpɛ nɔɔ ɔbla kamɛ

aafuo ni oklee di kɔnɛɛ nɔɔ.

16 Nle mmle kafɔɔ dikpilasaa ninyinyisaa dile:

Fɛ mmle di otii nkye an-wa ni yi, nkpo andie ansifi nɛ.

Obe ninle lɛsaa le an-wɛ ni,

di obe wɔ ootufu-ankpa anta ni kɔfɛɛfɔ?

17 Anle alesaa di ditunũ kamɛ di ayi nɔɔ amuu osiɛ kamɛ,

di kakpɔkpɔtɔ, sɛlaa kpile otũ ku ɔblɔ kamɛ.

18 Ni lanya nlɛ dilɛ, diesiɛko kafɔɔ alɛ otii kale, an-nyi, anle nkpa kafɔɔ di otufu-ɔkpa sɛkpɛ nɔɔ kamɛ di kufĩ kalɔ di nkpa obe kakuu ka di Yaa lɛtɔɔ ni kamɛ- diekye nni ninle nwɔ lele nɛ. 19 Diɛkyakaa ni yi, nse Yaa lɛta otii owo lɛsaawɛ ku akleesaa, ɛɛtɔɔ kafɔɔ osuku alɛ aale nya, anfũ nle ninle nwɔ ni lele, annya kafɔɔ suoto lɛyɔɔ di ɔkpɛ nɔɔ kamɛ yi- ni nle mmle nle Yaa lɛtasaa. 20 Aakyà disi obu sikitii di nkpa nɔɔ ayi suoto, diekye Yaa ntɔɔ antɔɔnya suoto lɛyɔɔ di otu nɔɔ kamɛ.