1 Nioso labu disi di n-ya mmle amuu suoto, ni lanya nlɛ tininitɛ ku numbentɛ asaa ya mambla ni nsi di Yaa nnɛɛ. Kafɔɔ otii kuonwii dieye nse lɛbɔmbɔ ee katiikyidi ninte disoko nwɔ. 2 Lɛsaa ninwii nwu ninkpe bamuu lɛma- tininitɛ ku kpiletɛ, dibiene ku dikpile, klekletɛ ku nnwɔ ninanklekle ni, mba ninta ni seleɔta ku mba ninanta nii.

Fɛ mmle dite dita ni otii biene yi,

nkpo dite dita kpileblatɛ nɛ.

Fɛ mmle dite dita ni mba ninka ni ntam yi,

nkpo kafɔɔ dite dita mba nin-yɛkɛ ni ntam ɔka nɛ.

3 N-ya mmle ninle akpilesaa ya ninsi ni di lɛsaa biala mambla ni di kufĩ kalɔ nɛ: Lɛsaa nwu ninwii nin-wa di bamuu suoto. Diɛkyakaa ni yi, batii situ leyii ku akpilesaa di difĩibuo kafɔɔ leyii ni situ lɛma kamɛ pɔ, di obe wɔ basi ni nkpa, di nni kamaa mankpi. 4 Otii lele ninsi di nkpa basiɛtɛ kamɛ nkpe osuku onyu- bia weewee wɔ ninkpe ni nkpa nlɛ fanfã alenke kyata kpi!

5 Diekye batii ba ninkpe ni nkpa n-ye alɛ babakpi,

kafɔɔ bakpi dieye lɛsalɛsaa;

basinnaa letota kuninwii di dii kaamaa,

bia batooyee, blosinnyuma ma.

6 Lɛbɔmbɔ lɛma, katiikyidi lɛma

ku sɛsɔfɔwo lɛma ɔkpɛ ntɔɔyɛ kofokofoko;

diidii blɔbasinwɛ lɛbla

di lɛsalɛsaa mambla ni di kufĩ kalɔ.

7 Tɔɔkyɛ, le alesaa lɛfɔ ku suoto lɛyɔɔ, faanyi nta lɛfɔ ku suoto lɛyɔɔ otu, diekye mmia nfɛ di Yaa lele ɔsaabla lɛfɔ sibualɛ nɛ. 8 Kpee akpeele fututu obe lele, faafifia kafɔɔ nnɔnyi di disi lɛfɔ obe lele. 9 Le nkpa ku ɔsɔfɔ lɛfɔ, nnwɔ fambɔmbɔ ni, di nkpa be mmle kasakasa obe wɔ di Yaa lɛta fɔ ni di kufĩ kalɔ- di kasakasa obe lɛfɔ omuu kamɛ. Diekye nle mmle ninle fɔ lele di otufu-ɔkpa sikitii lɛfɔ kamɛ di kufĩ kalɔ nɛ. 10 Lɛsaa lele niɛkpanko fɔ kɔnɛɛ falɛ fɔɔbla yi, bla nwu ku osie lɛfɔ omuu. Diekye di ɔkya kamɛ, di nfũ foofe ni yi, ɔkpɛ ɔbla ee disibu ɔbla ee lɛsaatofo ee ninumbe nnaa.

11 Ntɔɔnya lɛsaa bamba di kufĩ kalɔ:

Diele otii wɔ nin-ye ni otoso nwaa ninlenkee obe lele,

ee sientɛ ninlenkee di kakpɛ kamɛ,

ee numbentɛ awɛ alesaa ale

ee lɛsaawɛ diwa dita otii wɔ nin-ye ni lɛsaa

ee sibualɛ ole diwa dita kunyentɛ;

kafɔɔ obe ku osuku ɔsɛkɛtɛ n-wa ninta bamuu lɛma.

12 Diɛkyakaa ni yi, otii kuonwii dieye obe wɔ di obe nɔɔ kamawo nii:

Fɛ mmle di amumu asawu mmufũ ni kɔkpaku,

ee di bakansiɛ mbuo ni okũ yi,

nkpo di batii mbuo di obe kpile

wɔ nin-wa ma ni di suoto di obe wɔ mononyu osuku bata nwu ni nɛ.

13 Lanya kafɔɔ ninumbe ɔtɛ onyu wɔ mmle di kufĩ kalɔ diabla mi ni ɔkpɛ osie kanya: 14 Okpoo kplɛ biibii onwii lawɛ, di batii basɛɛ lete niasiɛ nwu ni kaamɛ. Ni di ɔka siene onwii lataka nwu di suoto, aamana nwu aakyi, ni aapɛ atii abinte aayɔ aayila nwu suoto nɛ. 15 Piitɛ numbentɛ onwii lawɛ di okpoo kplɛ nwu kamɛ, ni aayɔ ninumbe nɔɔ aafũ okpoo kplɛ nwu nkpa nɛ. Kafɔɔ otii kuonwii ditanyuma piitɛ nwu. 16 Nioso labuɛ nlɛ, "Ninumbe nlɛ dilenke osie." Kafɔɔ baanyu piitɛ nwu ninumbe nyakatãa, batasin-yɔ kafɔɔ sɛlaa nɔɔ baablako ɔkpɛ.

17 Dilɛ alɛ baabla di numbentɛ sɛlaa kpinwu buɛɛ obuɛ,

ninlenkee alɛ faabla di babuutɛ tunletɛ afafaa suoto.

18 Ninumbe nlɛ dilenke kakpɛ akpɛsaa,

kafɔɔ kpileblatɛ onwii n-wɔɔsa dibiene kpinwu.