1 Lɔla bwaɔkɔla Itɛnda jaenda ja Yɛsu-Kilisito, Mwǎna wa Bɔsɔmwá, 2 imbɛ bwǎchileka ko ketabo ke Motatoli* Isaya, :

«Meno Bɔsɔmwá nitoma seno motatoli* wanɛ atangole koboso nao

ako lendekele njela*.»

3 «Moto ɔmɔnji ole kojǎngwa* : atɛnda ně jǒki likolo

Lendekela Mɔkɔta njela yande!

Sɛngɔla wětelo bwande*!»

4 Nǒbola Yɔani Welobatiso aola monda ně jǎngwa* li mosomba we Yudɛa. Abɛja aeleja bato tɛ : «Bǎlole bisima byabɔ ka mobange lobatiso lolokwa, balɛkɛ mabe.» 5 Bato be kesé kɛsɛ ke Bayuda nǎbabasɛ be mosomba we Yɛlusalɛma baeja kolende Yɔani. Ka abala bato, baɛngɛla lokwa mo mabe mabɔ, nande Yɔani abalongoja lobatiso molǒje lo Yɔlɔdani.

6 Yɔani awala ngɔmbɛ yatɛlɛka nɛmɔ̌sa menyama yaetaneka ngamia. Ka nɛ mɔkɔma ɔkɛkɔba Kenyama mokebonda. Abɛjaku aja panda ně bǒki bojǎni. 7 Abɛja aeleja ka atɛnda tɛ : «Ola wabejǎ seno kɔmɔngɔ nanɛ alě né lokangwe kɔtɔte meno, ǒsǐ meno tikalela angɔ̌ kolibola melǐye yebilato byande. 8 Meno nimolongoje lobatiso lomǎje, ka ande akamolongoja lobatiso lo Motemá-Mwělɔ.» Yɔani Welobatiso aeleje bato mole Yɛsu

9 Moela pena, Yɛsu atoka ko Mosomba we Najalɛti ye kesé ke Galilaya. Ka Yɔǎni amolongoja lobatiso ko lǒje Yɔlɔdani. 10 Ka aola Yɛsu kolǒje, ayɔyɔala iyolo jaliboka, ka Motema-Mwɛ̌lɔ wamwi kelela imbɛ kelenga. 11 Ka jɔ̌ki jatoka kwǐyolo jatɛnda : «Awɛ ne Ngɔli yanɛ ya konda meno!»

12 Ayɔyɔala, Motema-Mwɛ̌lɔ wamojala Yɛsu ko Jǎngwa,* 13 Okola kojǎngwa* aketa masu makomi mananji ka Kechwanda kyamwɛnya; abɛja ne nyama lijǎni né malaika* ma Bɔsɔmwá mamolongalonga.

14 Asila Yɔǎni kǔseka kɔmɔmunyɔlɔlɔ, Yɛsu ayaka ko kese ke Galilaya. Koeleja bato itɛnda jaenda ja Bɔsɔmwá, 15 Abɛja atɛnda tɛ : «Pena ekoki ka bɔkɔta bwa Bɔsɔmwá buiki sɛsɛ! Mǒbola, Engɛla lokwa ka muimenye itɛnda ja Bɔsɔmwá mo metema yino!»

16 Ka Yɛsu abɛja aěta kwǐpamba li kyatenge ke Galilaya, amɔna balɔbi babele : Andele na Simo waboteka nande, babɛja balɔba bisɔkɔ né makila mabɔ. 17 Yɛsu abasolele : «Njangani meno, ka nimobeke balɔbi be bato.» 18 Ayɔyɔala, balɛka makila mabɔ ka bamojanga.

19 Ka Yɛsu Mokwaka ko koboso, amɔná Jaki na Yakɔbi, bǎna ba Jɛbɛdɛɔ na yɔani waboteka nande, nabɔ babɛja mo wǎto balendeka makila mabɔ. 20 Ayɔyɔala, Yɛsu abaitana. Ka basia Isabɔ Jɛbɛdɛɔ monda ne wǎto ne bǎto bemokambo, ka bamojanga.

21 Kosila ala Yɛsu ně ngelelǎ* jande Bayaka ko mɔsɔmba wekapɛlenaumu. Ka wabɛja né buchu bo Sabato*, Yɛsu aɔtɔla kwǐngela ko ndabo yebichambeko ye bayuda* ka ǐka aeleja bato itɛnda ja Bɔsɔmwá. 22 Aba bamǔkunya kwatɛnda nde babɛja baitoka kwěleja kwande; mokoba tɛ kwelejá kwande akɔmɛja mɛlɔndɔ ye lokwangwa ka kosǐkoba imbɛ baeleji babɔ be kyǎto. 23 Ka Monda ně ndabo ye bichambeko kwabɛja moto ɔmɔnji wabundeka ne bichwanda. Ka ayɔyɔala ǎbana ka atɛnda : 24 «Yɛsu munajalɛti, tolese někě naɔ ? Oběle anu né kotosila bite ? Meno nakojeba seno! Awɛ né Mwɛ̌lɔ!»

25 Yɛsu ǎkǎmokelá olá moyombi ka atɛndá : «kɔ̌ba, ka otoké kǒná moto!» 26 Ka, Kechwanda kyaola kǒlá moto kyamwalaja né lokwangwa kyǎka kyakamoka.

27 Basɛ babɛja ala bǐtoka. Ka bǐka bawejana : «Bike seno ebǐ ? Eli likinɛ iyano lilobese né libele lilokwanga! Mɔkɔsɔna tɛ akɔbɛjɛ angɔ̌ bichwanda ka byamǔkwa!» 28 Ka elila ilɔngɔ ja Yɛsu jǔkunyeka momokeanya ɛsɛ ye Mosomba we Galilaya.

29 Kosila obola, Mokǒla mo ndabo ye kwɛ̌ngɛla Bɔsɔmwá*, ayaka na Jaki ka na Yɔani ko ndabo ya Simoni na Andele. 30 Aolelabɔ okola bamosanga mokilo wa Simɔni abɛja asɛlalala, mɔkɔsɔna tɛ abɛja ne kepopo kya jowa. Ka bamosolela Yɛsu mwělila ibɔngɔka. 31 Ka, Yɛsu aɛsɛnɛna sɛsɛ nande, amwimanekya ne kabɔkɔ. Ayɔyɔala kepopo kyamusila. Ka ola ngǒ ǐka abalendekela bikoja.

32 Mɔkyɔla, bato bamobesejela Yɛsu babɔngɔki basɛ né bebichwanda. 33 Ka bato basɛ bǒla mosomba, bakulumana koboso né mokinda wande. 34 Yɛsu amɔnɛkya bato basɛ mwɛ̌jɔ babɛja né kitanekita limabɔngɔka. Aɔnga bichwanda byabula, ka takonda bichwanda bitɛndɛ, mokoba tɛ byabɛja byamojeba.

35 Mɔkɛsi motǒ buchu bonaliboka, Yɛsu abioka ka aola ayaka akinɛ amena kwɛ̌ngɛla Bɔsɔmwá. 36 Ka Simɔni né binakwande bǐka bamolenga; 37 Ka amɔmɔna bɔ bamosolela tɛ : «Mɔkɔta, bato basɛ balesa bakolenga!»

38 Ka, Yɛsu nande tɛ : «Twake kotokinɛ toja tomokeanya mokoba tɛ nibaeleje kalɛ abɔ itɛnda ja Bɔsɔmwá mɔkɔsɔna tɛ ajɔ né jabelela meno.» 39 Ka Yɛsu ayaka alɛnga mokwěleja bato ko ndambo ye bichambeko* ye ba Yuda komosomba we Galilaya, ka aɔnga bichwanda.

40 Buchu bɔmɔnji moto we bajǎ ayaka kole Yɛsu; ka amǔmbela makɔngɔ isakeleja nande : imbɛ okondi mɔnɛkya mwɛjɔ. 41 Yɛsu amokwelela lokwa. Amosembolela kabɔkɔ, amobunda ka atɛnda : «Ikondi! Mɔnamwɛjɔ.» 42 Ayɔyɔala baja basila, ka amɔna mwɛ̌jɔ. 43 Kosila obola, Yɛsu atɛnda : 44 «Isolela moto ela mɛlɔndɔ! Ka kuilangeje kɔ mɔkɛngwa. Ka ǒje motaelo kwa Bɔsɔmwá mɔkɔmɔna tɛ ɔmɔni mwɛ̌jɔ, kwětela kelao kya chila Musa.»*

45 Ka ola moto ayaka nde ǐka abalanganya ilɔngɔ ko bato basɛ. Mǒbola, Yɛsu taingila kalɛ kokaja bato bamɔmɔna. Ǐka alikana bukɛli motanga né bato. Ka angɔ̌ obola bato babɛja ku bamojanga.