1 Sabato* kosila koeta, Maliya ana Magadala na Salɔmɛ na Maliya ninandé na Yakɔbi basomba malasi mokoba tɛ bayake kochila ko mobele wa Yɛsu. 2 Kwabɛja mɔkɛsi motǒ buchu bo Iyinga, mo jǒba kǒla abala bǎbakali babyǒkela ko manjalo. 3 Mǔngia njela, bǐweja mɔlɛbɔ : «Nani watotokejela elila iwɛ momokinda we majalo ?» 4 Abala bǎbakali alɔlabɔ, bamɔna elila iwɛ lisili koliboka. [Ɔmɔnɛ ka ajɔ jabɛja likolo.] 5 Aba bǎbakali bǎka baingela mo manjalo, bamɔmɔna Iyɛnda limɔnji wa wala ngɔmbɛ yǎma babo, alika né kɔpɔngɔ yǐlome; Amɔmɔnabɔ bǐka ně bɔ̌ba.

6 Ka elila iyɛnda jabasolela : «Motenǎ! Nijebi tɛ mwǎlengase Yɛsu muna Jalɛti, ona walewa ko moté we mǎkwa! Talese kalɛ anu asilise kǔboka. Lɔlani amena abɛjisɛbɔ bamwǎnji. 7 Yakani mobasolele ngelelǎ* jande na Pɛtɛlɛ tɛ abatangolele ko Galilaya. Okola né kwamɔmɔnǎ bine imbɛ bwa mosolela ande.» 8 Ayɔyɔala, abala bǎbakali batoka ala ko manjalo lobelo, mɔkɔsɔna tɛ babɛja basɔka ně bɔ̌ba neko sebalala. Ka tebasolela moto ɔsɛ kɛndɔ, mɔkɔsɔna tɛ babɛja ně bɔ̌ba.

[9 Aǔboka Yɛsu mɔkɛsi buchu bɔ iyinga, ailangeja koboso kole Maliya ana Magadala. Yɛsu né waɔnga meyombi motoba nɔ̌mɔnji ya Maliya. 10 Ola Maliya ayaka kosǒla malɔngɔ ko ngelelǎ* ja Yɛsu, ka moela pena babɛja basɛ kolotoko balela. 11 Ka aukwa abala ngelela* kole Maliya ana Magadala tɛ : «Amɔmɔni Yɛsu! Ka alese kɔmwɛjɔ,» Tebamwimenya.

12 Amɔngɔ nǎla, Yɛsu abaolela ngelela* libele jabɛja jayaka ko siyo. Ala, abɛja mokelongi kekinɛ. 13 Elila ngelela* libele baɔtɔla kosolela binakwabɔ elila ilɔngɔ. Ka abala binakwabɔ tebaimenya.

14 Kosila, Yɛsu abaolela ngelela* jande ikomi nɔ̌mɔnji babɛja amena amɔnja baja. Yɛsu ǐka abaumba mapala mɔkɔsɔna kopeka kwǐmenya kwabɔ ka né konuna metema kwabɔ, mɔkɔsɔna tɛ tebaimenya aba bamɔmɔna amɔngɔ ně kǔboka kwande.

15 Kosila obola, Yɛsu abasolela : «Yakani moloniya lɔsɛ mwěleja ilɔngɔ jaenda ko bato basɛ.» 16 Ka ona wǐmenyǎ neko banga lobatiso atɛ alakoke. Ka ola wǐla kwimenya atɛ akumeka.

17 Ka nǎba bakaimenya bakaketa mesasa ko bokuchu bwa Bɔsɔmwá : «Mo kotokeja meyombi mo lokombo lwanɛ ka batɛnda né mɔlɔsɔmwa lo lobese. 18 Babundě njɔka ǎngɔ̌ basɔli kamɛndɛ né bikinɛ bisɛ bi mabe te byabaketa kɛndɔ. Ka bababekelě babɔngɔki tɔbɔkɔ atɛabɔ bamɔni mwɛjɔ.»

19 Ka moela pena, Mɔkɔta Yɛsu asila nde kobasolela ngelela* jande ela mɛlɔndɔ, asakoleka neko yaka kwiyolo, alikana ko kabɔkɔ kǐlome ka Bɔsɔmwá. 20 Ka abala ngelela* bayaka baeleja itɛnda ja Bɔsɔmwá amena ɛsɛ. Okola kwayakabɔ, Mɔkɔta ailangeja kwabɔ né kobalongoja longwa lokwalika né baketa mesasa né mesasa. Mokolangeja tɛ mɛlɔndɔ ya bɛjande abasolela yabɛja yě kpǎ.]