1 Anu Yɛsu né ngelela* jande, aika bɔ sɛsɛ ně kǒlela ko mosomba we Yɛlusalɛma, ka baolela sɛsɛ né toja to Bɛtɛfagɛ ka né Bɛtania, sɛsɛ né lolo lo Misɛlɛtuni. Ayɔ né atoma nde babele be ngelela jande. 2 Yɛsu abasolela : «Yaka kokaja kale koboso nino ka mǒlele, mwasanga né mwǎna we punda akumeka meliye ǒsǐ tanajala moto.» Mosolola momobeseje kono kwanɛ. 3 Ka moto amoweje «Moketele bikě obola ?» Mosolela tɛ : «Mɔkɔta ne wɛ̌ngɛlɛ ka aɔtɔjana.» 4 Elila ngelela* jayaka, ka jasanga mwǎna wepunda aswekeka kɔnjɛ ně ndábo ka mwipamba li njela, aǐka bɔ bamosolola. 5 Bakinɛ bato bamɔnji babeja baemana ala babaweja bike byaketase bine ǎla ? Ka mwǎsololase ela punda mokě ? 6 Ngelela* jatɛnda wabasolela Yɛsu; ka abɔ babalɛka bayǎka nayɔ.

7 Elila ngelela* bamojalela Yɛsu ola mwǎna wě punda. Bǎnja ngɔmbɛ kuiyolo nǒla mwǎna wě Punda ka Yɛsu anina akanda nayɔ. 8 Bato kǐnge bǎnja ngɔmbɛ jabɔ mɔmɔsɛkɛ moboětelo bwande bakinɛ babeka né bǎnja mabǎbǎ mabuka bɔ komasio. 9 Bato basɛ batangola koboso nǎba babaka kɔmɔngɔ bamojanga Yɛsu bamwěmbela luembo lo wěno :

«Ɔsana!*

Ɔsanaɔsana! Achwaoleke ona wabenjǎ seno ko lokombo lɔ Mɔkɔta!.*»

10 Ka Bɔsɔmwá achwaole bɔkɔta Bwa koko lito Daudi wabejǎ seno.

Bɔsɔmwá asekeke kwiyolo!

11 Yɛsu aolela kó kaja ke Yɛlusalɛma. Aingela mo ndabo ya Bɔsɔmwá*, amɔna byɛndɔ bisɛ kɔmɔna tɛ kwǐki kyɔla ayaka ko Bɛtania né ngelela* jande ikomi né libele.

12 Yɛsu ně ngelela* bochu kokya, babɛja né batoka kobɛtania Yɛsu aukwe njala. 13 Amɔna motanga mote we mutini wabɛja né bisɛsi byabula ayaka kose nawɔ kokanya tɛ asanga né bimuka bikoja ka. Aolela nde sɛsɛ ne mote tamɔna ǎngɔ̌ né kɛ̌ndɔ, asanga ku bisɛsi bito. Mokoba tɛ tɛkwabɛja mokěmo kekǒja bimuka. 14 Ayɔyɔǎla amochambela : «Né boba né boba kǒsǐ okaja bimuka byao!» Ka ngelela* jande baukwa ela mɛlɔndɔ.

15 Kosila kǒlela ko kaja ke Yɛsalɛsama ně ngelela* jande, Yɛsu aingela mo ndábo ya Bɔsɔmwá* ǐka abaɔnga kɔnjɛ bato babɛja basombeja né kosomba byɛndɔ kobalanganya mɛsa jǎbala babɛja ba sombeja imɔna né bichumbe byabala be bilenga. 16 Ka talɛka angɔ̌ né moto ɔmɔnji ajale kɛndɔ kyande mo ndábo ya Bɔsɔmwá*. Yɛsu aɔngi basombeji mo ndábo ya Bɔsɔmwá

17 Kosila Yɛsu ǐka abaeleja ilɔngɔ jaenda ja Bɔsɔmwá ja tɛnda tɛ : «Kwachileka tɛ,

«Ndábo yanɛ ɛkabɛja yǐ taneka ndábo yekwɛ̌ngɛla Bɔsɔmwá, ko bato basɛ.»* Ka, bine : «Mwǐka mwamealola ǐka amena yě ngiba!»*

18 Mɛkɛngwa mekolo* né bilɛmɛsɛ bi kyǎto*, aukwa bɔ obola baǐka balenga bomoliyekya bɔ Yɛsu, ka tebaɔsɔna mɔkɔsɔna tɛ kwabɛja bato kǐnge basebalala ně kwěleja kwande. 19 Ka mɔkyɔla Yɛsu ně ngelela* jande batoka mwakala kaja.

20 Mɔkɛsi motǒ Yɛsu ně ngelela* jande babɛja baeta mo njela bamɔna ola mote we mutini osili kǒma né komeli. 21 Pɛtɛlɛ akanya obola wa chwambela Yɛsu ola mote asolela Yɛsu tɛ : «Ě Mwěleji, lɔla mote we mutini ochwambele seno awɛ ǒmi ɔsɛ.»

22 Anu, Yɛsu asolele ngelela* jande tɛ : «Imenya kole Bɔsɔmwá! 23 Nisoko bɛnɛ nimosolele moto ɔ̌sɛ aɔsɔna kɔtɛndɛla olo lolo tɛ̌ : ‹Joka ka oyake kwǐuasa ko lwalaba.› Ka imbɛ ale aimenya mo motema wande, bisɛ byaɛngɛla se nde atɛ biketeke. 24 Abɔ né bomosolele meno tɛ : Kɛsɛ kyaɛngɛla bine kwa Bɔsɔmwá imbɛ mwǐmenye ko motema jeba tɛ mosili kokebanga.

25 «Ka mɔbɛjɛ̌ mwǎɛngɛla Bɔsɔmwá, mojebe tɛ mole né mɔlɔndɔ né moto ebelelabi. Abɔ né wěbelelǎ isino we kwiyolo mabe mino abobobola. [26 Ka imbɛ temwaba mwaebelela bakinɛ, isino ole kwiyolo ta kaebelela mabe mino.]»

27 Yɛsu ně ngelela* jande baolela kalɛ ko Yɛlusalɛma. Ǐka aenda monda ně ndábo ya Bɔsɔmwá*, mɛkɛngwa* mekolo né bilɛmɛsɛ bi kyato* né mekongo ye Bayuda* bamobelela. 28 Ka bamoweja tɛ : «Wǎketa seno ebibi bisɛ molokwangwa lwa nani ? Ka nani wakolongoja seno lǒsa lo kobiketa ?» 29 Yɛsu atbaɔtɔjɛla tɛ : «Namoweja né keweja kɛmɔnji, imbɛ mosolele ekela keweja atɛ nanɛ nimosolele molokwangwa lwa nani luaketa seno meno ebila bisɛ. 30 Lokangwa lua Yɔani kolongoja bato lobatiso, luatoka né kwa Bɔsɔmwá imbɛ tǒbola ko bato ? Isolelani!»

31 Ka abala bilɛmɛsɛ baǐngela mokakongo abɔbɛnɛ. Bǐka batɛndɛjana tɛ : «Tɔtɛndɛ̌ tɛ olola lokangwa luatoka né kwa Bɔsɔmwá atɛ atoweji tɛ : ‹Ka boni bosǐ bine te mwamwǐmenya seno Yɔani› ? 32 Ka imbɛ tɔmɔ̌tɔjɛlɛ tɛ olola lokangwa lwatoka né ko bato, atɛ bato batosakalele.» Batɛnda obola Mɔkɔsɔna tɛ babɛja né batena bato, mokoba tɛ basɛ bajeba tɛ Yɔani we lobatiso ale né motatoli* wa Bɔsɔmwá. 33 Mǒbola bamɔ̌tɔjɛla Yɛsu tɛ : «Bite tojebe.» Ka Yɛsu abasolela nande tɛ : «Nanɛ tamosolela molokangwa lwa nani lwaketase meno ebi bisɛ.»