1 Mɔkɛsi motǒ, bilɛmɛsɛ bi mɛkɛngwa* mekolo ne mekongo ye bayuda ka ne bilɛmɛsɛ bi kyǎto*, bakulumana kobunda kakongo ke kokuma Yɛsu nekoyaka nande komǔsa kwa Pilatɔ.

2 Pilatɔ amoweja : «Boni, awɛ né mɔkɔta weba Yuda ?» Yɛsu aɔtɔjɛ tɛ : «Awɛ né ɔtɛndi obola!»

3 Bilɛmɛsɛ bimɛkɛngwa* bamositaka mɔmɛlɔndɔ kǐnge. 4 Ka, Pilatɔ amoweja kalɛ Yɛsu : «Boni awɛ twaɔtɔjase kɛndɔ̌, moebi bisɛ byakɔsitaka sé bɔ ?» 5 Ka Yɛsu taɔ̌tɔja kɛndɔ, ka Pilatɔ asebalala.

6 Masu masɛ me mokemba we pasaka*, Pilatɔ abɛja aɛmɛkɛla kobalibolela bato moto ɔmɔnji wa kumeka, ola ɔsɔnabɔ. 7 Ka, kwabɛja moto ɔmɔnjí iyalé waetaneka Balaba wa kumeka ne bina kwande mayale. Mɔkɔsɔna tɛ baliya moto, aketa bɔ moyongo mo kaja. 8 Bato kǐnge bamoyelela Pilatɔ, ne kɔmɔɛngɛla akete waɛmɛkɛla nde koketa. 9 Pilatɔ abaweja : «Boni, mwǎkonda né nimolibolele mɔkɔta weba Yuda ?» 10 Atɛnda ela mɛlɔndɔ mɔkɔsɔna tɛ ajeba wǎli tɛ bilɛmɛsɛ bi mɛkɛngwa mekolo bamolongoja na Yɛsu mɔkɔsɔna bomanda. 11 Ka abala mɛkɛngwa mekolo bapɔya bato baɛngɛlɛ Pilatɔ abalibolele Balaba. 12 Pilatɔ kobaweja kalɛ : «Anu mokondi nimoketele bikě nǒna wětanasé bine mɔkɔta weba Yuda ?» 13 Bato basɛ bǎkamoka kalɛ batɛnda : «Moliyekya kɔmɔkɔmbɛ we moté we mǎkwa!»

14 Ka Pilatɔ abaweja : «Aketise mabe makě ?» Ka abɔ bapapa kalɛ kwǎkamoka batɛnda : «Moliyekya kɔmɔkɔmbɛ ko mote we mǎkwa.»

15 Pilatɔ mokonda kwǐkeleja ola moyongo we bato, abalibolela Balaba. Ka alamoná baumbe Yɛsu fimbɔ, neko mǔsa ko binǐyoko alewe kɔmɔkɔmbɛ.

16 Kosila obola, Binǐyoko bamotomba Yɛsu bamojala ko kewanja ke mɔkɔta mokolo, ka baetana kekumva kɛsɛ ke biniyoko. 17 Bamowaleka Yɛsu ngɔmbɛ ya loloka*, né kolendéka kekombo ke mɛkɛlɛ ka bamobeka ko lokongo. 18 Anu, Bǐka bamosambeja nɛkɔtɛnda : «Samba awɛ, mɔkɔta weba Yuda!» 19 Bamǔmba itɛtɛ mo lokongo, bamǔsela lɔsɔki ka bamǔmbela makɔngɔ ne kɔmɔkɔta mena 20 Ka asilabɔ kɔmɔbɔnda, bamotokeja ela ngɔmbɛ ya loloka ka bamɔ̌tɔjɛla kalɛ ngɔmbɛ jande ne komowalekya. Amɔngɔ nǎla, bamǒja kɔnjɛ alewe.

21 Abɛjabɔ monjela, bakulumana ne moto ɔmɔnji waetaneka Simoni mwene kaja ke kulɛnɛ isande na Alɛkisandi ka na Lufu, watoka ko masio, Binaiyoko bamokakeka jala mote we mǎkwa wa Yɛsu. 22 Amɔngɔ nǎla, abala binaiyoko bamobesa Yɛsu amena yaetaneka Goligɔta né kɔtɛnda tɛ amena ye kapɛlɛkɛsɛ. 23 Bamolongoja mesiba basili kɔsɔbɛkanya né manɛmanɛ.* Ka Yɛsu aila kɔsɔla. 24 Kosila obola, bamɔkɔma ko motɛ we mǎkwa. Ka bǎbanya ngɔmbɛ jande mokoliǔsela mbale, bajebe nǐnde wǎbangǎ bikě. 25 Yabɛjane pena yǐbalanganya mekala ne yalewa Yɛsu ko moté we mǎkwa. 26 Bachila Njɔla mokaǔnda ke lobaǒ mɛlɔndɔ ya moliyela bɔ Yɛsu tɛ : «Mɔkɔta we bayuda.»

27 Yɛsu alewa ko mote we mǎkwa ilɔmba né mayale mabele, ɔmɔnji ko mote we mǎkwa kwǐkali jande okinɛ kwǐlome jande. [28 Kǒbola, itɛnda ja Bɔsɔmwá jalengama bwa tɛndɛkajɔ tɛ : «Abaleka nande mwǐlɔmba li mayale.»]*

29 Bato babɛja baeta ala, bapukusa kongo jabɔ ka nɛkɔmɔbɛnga batɛnda : «hee! Tɛawɛ wabɛja wǎtɛnda tɛ wǎbɛlǎ ndábo ya Bɔsɔmwá ka né komealeka momasu masáto!» 30 Anu anu Ikelela kǒla mote we mǎkwa ka wǐlakole awɛ bɛnɛ.

31 Nabɔ mɛkɛngwa mekolo né baeleji be kyǎto, bǐka bamɔbɔnda Yɛsu batɛndɛjana : «Alakola bakinɛ ka akochwane né kwǐlakola ande bɛnɛ! 32 Imbe ande né Kilisito, Mɔkɔta wǐsalaɛli! Ka aikelele ko mote we mǎkwa tɔmɔnɛ ka tomwimenye!»

Angɔ̌ abala mayale balewa nande, bamɔbɛnga.

33 Mo kelango, kaisi kakoka ne kese kɛsɛ nemopena yǐ komi né lisambele. 34 Mopena ikomi lisambele, Yɛsu ǎkamoka nelokangwa atɛnda : «Elɔïelɔï lama sabakatani» Né kɔtɛnda tɛ : «Bɔsɔmwá wanɛ ɛ Bɔsɔmwá wanɛ boni bɔndɛki awɛ»*?

35 Abala bato babɛja ǎla baemana batɛnda : «tɛkɛlɛja ǐki aetana Eliya.» 36 Ka moto ɔmɔnji asambǎbɔ atomba bisɛ̌sɛ̌ ayaka lobelo kwina ko mesiba ye bogai abeka kwǐtɛtɛ né komosakolela tɛ Yɛsu asɔlɛ, atɛnda : «Lɛkabini tɔmɔnɛ imbɛ Eliya abaka seno komwǐkeleja ko mote we mǎkwa.»

37 Ka Yɛsu ǎkamoka né lokangwa ka abukeka motema.

38 Ngɔmbɛ yabɛja ya liba ko ndábo ya Bɔsɔmwá yǎteka biati bibele kojoka kuiyolo né kose. 39 Ala kwabɛja Kɛlɛmɛsɛ ke bina iyoko ke balɔma wabɛja aemana koboso na Yɛsu. Amonande abukeke motema, atɛnda : «Ona abɛjǐ Mwǎna wa Bɔsɔmwá bɛnɛ!»

40 Ala, kwabɛja bǎbakali bamɔnji nabɔ babɛja balɔla motanga. Mɔlɛbɔ kwabɛja Maliya we kaja ke Magadala na Salɔmɛ na Maliya ninande na Yakɔbɔ Mɔtɔ̌ na wa Yɔsɛ. 41 Aba né bamojanga Yɛsu né masindekeli, komokambela neko Galilaya. Ka Kwabɛja bakinɛ bǎbakali kǐnge banina nande neko Yɛlusalɛma.

42,43 Kwabɛja mɔkyɔla, kwaola moto ɔmɔnji waetaneka Yɔsɛfu. Ona Yɔsɛfu abɛja né bokuchu bwapamba kolobonga lo bayuda. Ka abɛja alenda kobaka kɔ Bɔkɔta bwa Bɔsɔmwa ka mǒbola buchu né kwabɛja buchu bo kwǐlendeka mo kwǎka ko Sabato* ka Yɔsɛfu aliba motema aka kwɛ̌ngɛla ketomba kya Yɛsu ayake kokejeka. 44 Pilatɔ asebalala kǔkwa tɛ Yɛsu asilise kobukeka motema. Né waetana kɛlɛmɛsɛ ke biniyoko mɔkɔsɔna tɛ amoweja; nǎnu abukekende motema kobiki! 45 Pilatɔ kosila kǔkwa jǒki ji munaiyoko tɛ, asili kobukeka motema, asolele Yɔsɛfu ajale ketomba kya Yɛsu.

46 Ala, Yɔsɛfu asomba malɛkani aikeleja ketomba kya Yɛsu, nekomolinga amala malɛkani, ayaka kobeka ketomba kyande ko manjalo ka aliba iwɛ likolo kǒla mokinda. 47 Maliya we kaja magadala ka Maliya ninande na Yɔsɛ bamɔna ala, abeka bɔ mobele wa Yɛsu.