35 Amɔngɔ nǎla, bǎna ba Jɛbɛdɛɔ Yakɔbɔ na Yɔani babaka koboso na Yɛsu ka bamosolela : «Mwěleji bite tokondi ne tɛ otoketele bisɛ byakwɛ̌ngɛlǎ bite.» 36 Yɛsu abaweja : «Mokondi tɛ nimoketele bikě ?» 37 Abɔ bamosolela : «Tobeka ɔmɔnji kwikali jaɔ ka ɔkinɛ kwilome jao aiki awɛ ko bokuchu bwao.» 38 Yɛsu abasolele tɛ : «Temwajeba seno byaɛngɛla se bine. Molenge mwasɔla mokepoma kekolewa keka kɔsɔla meno ? Abangǎ meno Lobatiso lokolewa nino mɔ̌sɔna seno ?» 39 Bamɔ̌tɔjɛla : «Twaɔsɔnana.» Yɛsu abasolela : «Nisoko bɛnɛ mwasɔlǎ kepoma ke kolewa kyasola meno ka lobatiso lokolewa kɔmɔkɔmbɛ nino molobanga seno. 40 Ka Bato ko likana kwilome janɛ kwikali janɛ ela ele mɛlɔndɔ yanɛ ele né kole Bɔsɔmwá kwabala baendele ko bibanga.» 41 Ka aukwa ngelela* bakinɛ ikomi basakalela Yakɔbɔ na Yɔani. 42 Mɔkɔsɔna obola Yɛsu abaitana basɛ ka abasolela : «Mwajeba seno wǎli tɛ ababale mɛkɔta ye kese baemanena bato mo bɔkɔta bwabɔ né nelokangwá. Ka abala bale mo bichumbe babanyɛkanǎ. 43 Ka Mole bine kɔbɛja obola. Mɔkɔsɔna tɛ ona okonda koba mokota mole bine abɛ̌ né mɔkɔbɛ wino basɛ. 44 Ka ona okonda koba koboso mole bine abɛ̌ né mɔkɔbɛ we basɛ. 45 Mokoba tɛ meno mwǎna we moto tabaka kolenga bato bekokambela molemo ka nabakane kokambela bato ka né kolimbeja mwɛjɔ wanɛ mɔkɔsɔna tɛ nilakole bato kǐnge.»
Balatimayo we botongo amɔni mwɛjɔ
(Mat 20.29-34; Luk 18.35-43)