1 Aboso né masu mabele né mokemba we Pasaka ka né mekate ěsǐ ele né bogai biolele. Mɛkɛngwa mekolo né bilɛmɛsɛ bi kyǎto balenga njela ye komobunda Yɛsu mokamǔmǔ ka bamoliye. 2 Ka bǐka batɛnda : «Tomobunda buchu bomokemba mokobatɛ bato imbɛ basakala né kobesa moyongo.»

3 Yɛsu abɛja ko Bɛtania ko ndábo ya Simo we bajǎ. Abɛja aja bikoja, ka kwabaka mwǎmokali ɔmɔnji aǐngela nǐchupa jalendekeka nǐwɛ jaenda. Moelila ichupa kwa bɛja malasi jowasombi. Amala malasi malendekeka né bilɛlɛ bimote naldɔ, Ka tewabɛja wasambekeka nɛkɛkinɛ kɛndɔ. Ka ola mwamokali abɛla lokongo loelila ichupa ne komwitela Yɛsu molokongo. 4 Ka aba bato babɛja ǎlá bamɔnji babɔ basakala, bǐka batɛndɛjana : «Mɔkɔsɔna bikě kɔ̌na ama malasi ? 5 Konaendelene kosombeja né mɛlɔla ye dinali 300,* ka nekolongoja ela mɛlɔla ko balungi!» Bǐka bamɔbɛja né lokangwa ola mwǎmokali.

6 Ka Yɛsu abaweja : «boni bwaɛbɛja sebine ona mwǎmokali ? Mɔlɛkani! Mɔkɔsɔna tɛ aketele mǎli. 7 Mokoba tɛ mwalikanǎ né balungi masu masɛ ka molenge mwabalongoja mopena ekondǎ bine ka meno tikaba nino masu masɛ. 8 Ona mwǎmokali aketi biɔ̌sɛnde; atangoje kochila malasi mokolendeka kojekeka kwanɛ. 9 Nimolele nisoko bɛnɛ koebi biketele ona mwǎmokali kɔsɛ koka tɛndɛkǎ eli itɛnda ja Bɔsɔmwá babɛ̌ bamosumbokeja mo lonia lɔsɛ. Mǒbola, bato basɛ bakaba ku bamokanya.»

10 Yuda sikaliyɔtɛ ɔmɔnji wǎbala ikomi né babele ba Yɛsu. Ayaka ko mɛkɛngwa mekolo mɔkɔsɔna tɛ abalongoje Yɛsu. 11 Ka aukunya mɛkɛngwa mekolo obola bǐsɛkɛja ne komolaela komǒngoja mɛlɔla. Yuda sikaliɔtɛ ika alenga pena yaenda ebalongojande Yɛsu.

12 Buchu bɔ̌kɔlǎ mokemba we mekate ěsǐ ele nebogai yaolela. Mǒbola buchu babɛja baliya mwǎna wemɔgɔgɔ wekoja buchu bo Pasaka*, ngelela* ja Yɛsu bamoweja : «Koni kwakolendekelǎ bite bikoja bi Pasaka* ?»

13 Ka Yɛsu atoma babele mo ngelela* jande abasolela : «Yaka mokaja mwasangané mwǎmolome ɔmɔnji ajali paka yě mǎnje, jangana nandeni. 14 Né mo ndábo yǐngela nde. Ka momosolele mwɛnɛ ndábo tɛ̌ : ‹Mwěleji ne ototomi kwaɔ tolanga kyumba kyande kyalelelande ně ngelela* jande mokemba we Pasaka*.› 15 Ka ande amolangaseno kyumba kekuyolo kyapamba kyalengama ne bisɛ alane atolambela bine ija li Pasaka.»

16 Elila Ngelela* libele bayaka baolela ko kaja. Basanga bisɛ byalendekeka kpǎ bwa tɛnda Yɛsu ka bǐka balamba ija li Pasaka*. 17 Aolela ko pena ye kyɔla Yɛsu ně ngelela* jande ikomi né babelé baolela. 18 Abɛjabɔ baja kebolo, Yɛsu atɛnda : «Nimosolele wǎli tɛ asambǎ bine kole ɔmɔnji wǎngalǎ.» 19 Ngelela* basɛ batena mwělila itɛnda bǐka baiweja ɔmɔnjiɔmɔnji tɛ : «Imbɛ meno ?» 20 Yɛsu abaɔtɔjɛla : «Ɔmɔnji asambǎ bine ola watɛlɛla nanɛ kabɔkɔ komonja ande né wangalǎ. 21 Meno Mwǎna we moto nǎkwana kojangana né bwachileka mwǐtɛnda ja Bɔsɔmwá mole meno. Ka Kole né mochuambelo kǒla moto wangalǎ! Kolombele atɛ tanaboteke!»

22 Pena yekoja Yɛsu atomba mokate aɛngɛla Bɔsɔmwá né kobuka biunda abalongoja ngelela* jande atɛnda : «Tomba onane mobele wanɛ.» 23 Kosila obola, atomba kepoma ke mesiba ya loloka aɛngɛla Bɔsɔmwá, abalongoja ka basɛ basɔla. 24 Yɛsu abasolela : «Onane mosǐ wanɛ, waitekǎ mo kwimanekya ilɔnga ja Bɔsɔmwá né bato. Mosǐ wǐteka ko mabɛ mino.» 25 Nimosolele wǎli tɛ : «tasɔla kalɛ nino kɔmɔjǎ, ela mesiba* akandaa né buchu boka sɔlǎ meno lilobese mɔbɔkɔta bwa Bɔsɔmwá*.»

26 Kosila baemba lwěmbo lo koseka Bɔsɔmwá ka banina ko lolo lo Misɛlɛtuni.*

27 Aolela bɔ okola kololo, Yɛsu asolela ngelela* jande tɛ : «Bine basɛ mwandɛkana. Mɔkɔsɔna kwachileka mwǐtɛnda ja Sokoka tɛ :

«Niliya seno mochungi,

ka mɛgɔgɔ atɛ ebalangane.»*

28 «Ka angɔ̌ obola pena aǔboka meno nǎtangola seno komolenda ko kese ke Galilaya.» 29 Pɛtɛlɛ amosolela : «Ka angɔ̌ bakinɛ basɛ bakɔlɛki, Ka meno takakɔlɛka angɔ̌!»

30 Yɛsu asolele Pɛtɛlɛ : «Nisoko bɛnɛ buchu tewakya kɔkɔ enabelekela mala mabele wǎba né osili kotona mala masato,» 31 Ka aukwa Pɛtɛlɛ obola, akɔkɔmɛnya mɛlɔndɔ nɛ kɔtɛnda tɛ : «Ka imbɛ kwěndele kokwa meno naɔ meno nǐmenye.» Ka abala ngelelǎ* bakinɛ batɛnda ku abobobola.

32 Aolela Yɛsu ně ngelela* jande amena yaetaneka Gɛtɛsɛmani, abasolele : «Likana anu meno nǎlengané kwǎka kɔɛngɛla.» 33 Kosila kɔtɛnda obola, atomba Pɛtɛlɛ na Yakɔbi na Yɔani. Ǐka angwɛli mobele ka nɛbɔtɛtɛ. 34 Abasolela kalɛ : «Nilese nébojoi bwapamba mo motema wanɛ. Mɔkɔsɔna tɛ nǎlenga kokwa likana anu mɔkɛsɛjɛ.» 35 Yɛsu ayaka koboso kachɛchɛ, ka aǔmba makɔngɔ ase aɛngɛla Bɔsɔmwá tɛ : imbɛ kɔ̌sɔnɛkɛ̌ ena pena yekolewa engetele motanga. 36 Atɛnda : «Aba, e Ǎsa, kole awɛ bisɛ byaɔsɔnɛkǎ. Ka ngesejela eke kepoma kekolewa motanga nanɛ. Mɔskɔsɔna tɛ kole kokonda kwanɛ, ka kɔbɛ̌ né kokondǎ kwaɔ.»

37 Kosila, Yɛsu ǎɔtɔla kwǎbala ngelela* jande lisato, abasanga balali. Asolela Pɛtɛlɛ : «Esimɔni olalǐ ? Kǒsǐ angɔ̌ kuija pena ɛmɔnji ? 38 Kɛsɛjani né kwɛngɛla imbɛ mwika mo kwɛ̌nyɛka. Motema olese wa konda ka mobele kǒsǐ kɔ̌sɔna!»

39 Yɛsu abasiya kalɛ aɛngɛla abobǒbola. 40 Ka aɔtɔla kalɛ kwabeja ngelelǎ* jande abasanga basɛ balali. Mɔkɔsɔna tɛ mǐsɔ mabɔ mabɛja manyɛma ne kalɔ. Teba ɔsɔna kɔmɔtɛndɛja.

41 Yɛsu aɔtɔla lwɛndɔ lo masato ko ngelela* jande abasolela : «Moekele seno mwǎlala ně kǒmonyǎ ? Pena yolele! Ka meno Mwǎna we Moto basili kosombeja ko bato be mabe. 42 Emanani twǎke! Mɔkɔsɔna tɛ ona wǎsombeja seno ǐki sɛsɛ!»

43 Yɛsu abɛja atɛnda ayɔyɔala, ɔmɔnji wǐkomi né babele Yuda isikaliɔtɛ abaka, né kekumva ke bato né mbao ka né kɔmɔ. Abala bato batomwa né Bilɛmɛsɛ bi mɛkɛngwa ya Bɔsɔmwá ka ne bilɛmɛsɛ bi kyǎto* ka né mekongo ye bayuda*. 44 Yuda abɛja asili kobalanga kalɛmbɛkɛjɔ kekomojeba Yɛsu abasolela : «Ola waifuteka semeno nande nǒla. Mobunda momojale né kɔmɔlɔla wǎli.»

45 Pɛna yaolela Yuda sɛsɛ na Yɛsu, ayɔyɔala aɛ̌sɛnɛna ka amosolela : «Mwěleji!» Kosila, amofuteka. 46 Kosila obola, abala bato babunda Yɛsu ka bamokuma. 47 Ka ɔmɔnji we ngelela* ja Yɛsu wabɛja ala, ayɔyɔala, aoja kabaɔ mo lopopa, né kobuka ichwe li moto wemolemo we mɔkɛngwa mokolo.

48 Yɛsu abaweja : «Boni bombelele bine komunda ne mbao ne kɔmɔ imbɛ bayelela kobunda ngiba ? 49 Masu masɛ nabɛji ku nino ka na moeleja mo ndábo ya Bɔsɔmwá, temwabaka komunda. Ka mǒbo ebi byolele mokoba tɛ byachileka mwǐtɛnda ja Bɔsɔmwá bilengame.»

50 Ayɔyɔala ngelela* ja Yɛsu basɛ ba mɔlɛka ne kotena. 51 Iyɛnda limɔnji wajanga Yɛsu, ailiba kyǎchi kɛ ngɔmbɛ. Abala bato baɛlɛkɛla komobunda, 52 ka ande abalɛkɛla ekela keati ke ngɔmbɛ ne kotena mataka.

53 Abala bato, bayaka na Yɛsu ko kɛlɛmɛsɛ ke mɛkɛngwa okola kwakulumana abɔ basɛ ne mɛkɛngwa né mekongo mekolo ka ne baeleji be kyǎto. 54 Nande Pɛtɛlɛ amojanga Yɛsu ko motanga, né ko kewaja ke ndábo ye mɔkɛngwa mokolo. Alikana né balendi ǎtala kaya.

55 Abala Mɛkɛngwa mekolo ka né mekongo ye lobonga lɔsɛ lo bayuda bǐka balenga tosǎ tokomositaka Yɛsu, mɔkɔsɔna tɛ bamoliye ka teba banga. 56 Bato kǐnge batɛnda manu mole Yɛsu, ka kwabɛja ně měsanya mole bɔ.

57 Kosila, bamɔnji asambǎbɔ baemana ne Bakinɛ baěmana ne komokangela manu Batɛnda : 58 : «Bite tolese twaikunyenya batɛnda tɛ : ‹Meno nibɛla seno ena ndabo ya Bɔsɔmwá Yǎlekeka ne bato, ka momasu masato nialeka seno ɛkinɛ. Esǐ ele ye mabɔkɔ me bato.› »

59 Ka angɔ̌ obola, mɛlɔndɔ yabɔ yabɛja ně měsanya.

60 Mǒbola, Kɛlɛmɛsɛ ke mɛkɛngwa aemana mǔngiabɔ ka amoweja Yɛsu : «Boni, awɛ twaɔtɔja se kɛndɔ mwǎma masitaki me batǒ ?» 61 Ka Yɛsu aikɔbɛla wande.

Ola mɔkɔta amoweja kalɛ : «awɛ né Kilisito*, mwǎna wa Bɔsɔmwá wǎ sekǎ bite.?» 62 Yɛsu aɔtɔjɛ tɛ : «Meno nǒna!. Ka mwǎmɔna né Meno Mwǎna we Moto nilikane ko kabɔkɔ kǐlome ka Bɔsɔmwá welo kangwa; ka momonaseno nabaka nǐbonge li kuyolo.»

63 Ola, mɔkɛngwa wa Bɔsɔmwá aukwa nde obola, aiyatela ngɔmbɛ jandé ka atɛnda : «Nani ɔkinɛ kalɛ wǎlengǎ bite wasangwa mole ona motǒ ?  64 Bine binɛ mwǐyukunyenye wa bɛnga sende Bɔsɔmwá. Mɔtɛndi boni ?»

Basɛ baɔtɔja kɔmɔ̌njǎ, aendele kokwa.

65 Bamɔnji mɔlɛbɔ bǐka baǔsela Yɛsu lɔsɔki, né komoliba kelongi, ne komǔmba biɛmɛna ka batɛnda : «Tatola nani okǔmbi obola!» Binǐyoko nabɔ bamobunda ně kwǐka bamǔmba biɛmɛna.

66 Pena ya bɛja Pɛtɛlɛ aekele kɔnjɛ, mo kewanja ke mɔkɔta we kwabaka mwǎmokali ɔmɔnji we molemo we mɔkɛngwa mokolo aolela ala abɛja Pɛtɛlɛ. 67 Ola mwǎmokali amɔni Pɛtɛlɛ ǎtala kaya, amɔlɔla wǎli ka atɛnda : «Awɛ naɔ wabɛja na Yɛsu moto we Nasalɛti.» 68 Ka Pɛtɛlɛ atona ka atɛnda : «Meno taǔkwa seno né kojeba ebila biatɛnda seno awɛ ǎla.» Ande Pɛtɛlɛ aola kɔnjɛ ne kewanja né komokinda ayɔyɔala kɔkɔ ya belekela.

69 Ka ola mwǎmokali amɔmɔna kalɛ Pɛtɛlɛ asolela bato babɛja ala, tɛ : «Ona ale ɔmɔnji wabɔ!» 70 Ka Pɛtɛlɛ aotola kotona.

Amɔngɔ nǎla, bakinɛ bato babɛja ala, babaka batɛnda : «Nisoko bɛnɛ olese ɔmɔnji wabɔ, mɔkɔsɔna tɛ olese Mogalilaya.» 71 Pɛtɛlɛ aotola kotona né lokangwa né kolapa atɛnda : «Meno tijebe ona moto wǎ tɛndǎ se bine, Ka imbɛ itɛndi manu Bɔsɔmwá achwambele!»

72 Ayɔyɔala kɔkɔ kobelekela kalɛ ka Pɛtɛlɛ akanya biamosolela Yɛsu tɛ : «Aboso ně kɔkɔ bobelekela mala mabele obaseno osili kotona mala masato.» Pɛtɛlɛ alela.