1 Kosila obola, Yɛsu aǐngele kalɛ monda ně ndábo ye bichwambeko bi Bayuda. Moela ndabo, kwabɛja moto waɔ̌la kabɔkɔ. 2 Abala bato babɛja ala bǐka bamɔsisɔja Yɛsu imbɛ amɔmɔnɛkya ola moto mwɛjɔ buchu bo Sabato*, baketa ebila mokolenga kasǎ kekomositaka.

3 Ka Yɛsu asolela waɔ̌la kabɔkɔ : «Emana ka yaka mǔngia bato.» 4 Kosila obola, Yɛsu abaweja : «Kyǎto kito Kyěndele koketa mǎli buchu bo Sabato* Imbɛ tǒbola koketa mabe ? Kolakola moto imbɛ tǒbola komolia Motǒ ?» Ka basɛ kǒsǐ watɛnda. 5 Mǒbola, Yɛsu abalɔla ně mǐsɔ mekosakala, mɔkɔsɔna tɛ amɔna konuna kwabɔ kometema, ka atɛnda nǒla moto : «Sembola kabɔkɔ kaɔ!» Asembola kabɔkɔ kande, ayɔyɔala ola moto amɔna mwɛjɔ.

6 Kɔmɔna obola, Bafalisayɔ* baola, ka bǎka koketa kakongo nebe kɔpɔngɔ ye Mɔkɔta Hɛlɔdɛ kolenga bo mo kwesekya bɔ Yɛsu.

7 Amɔngɔ nǎla, Yɛsu ayaka ně ngelela* jande, komochili we kyatenge kya Galilaya, ka kekumva kyapamba ke bato Kyamojanga kotoka ko Galilaya né Yudɛa. 8 Ka Nebakinɛ batoka ko Yɛlusalɛma, neko mosomba we Idumɛa neko pɔngɔ ye kese ke Yɔlɔdani bakinɛ mesomba yě Tilɔ né Sidɔna. Abala bato bamoyelela mɔkɔsɔna tɛ baukwe bisɛ byaketande.

9 Ka Yɛsu atɛnda ně ngelela* jande bamobesele wǎto wakɛya kolende imbɛ mokemba we bato wa mopakamekya. 10 Mɔkɔsɔna tɛ abɛja amɔnɛkya bato kǐnge mwɛjɔ, ka basɛ babɛja nǐbɔngɔka baisɔnga mɔlɛbɔ mɔkɔsɔna tɛ bamobunde. 11 Ka bemelimo yabeya amɔmɔnabɔ, bakela makɔngɔ koboso nande, bǎkamoka batɛnda : «Awɛ né olě Mwǎna wa Bɔsɔmwá!» 12 Ka Yɛsu abɛja asimba melimo né lokangwa tɛ bamojebekya ko bato.

13 Kosila obola, Yɛsu anina akanda né lolo. Aetana bato abala bakonda nde, ka bayaka kole nde. 14 Ka ande asɔna molebɔ bato ikomi né babele abaineka ngelela* babɛ̌ kɔmɔ̌njǎ nande abatome bayake baeleja itɛnda ja Bɔsɔmwá. 15 Ka, babɛ̌ né lokangwa lo kɔ̌nga meyombi. 16 Eli né kombo jabɔ Mwǎbala ikomi né babele : Simɔni; (nǒla wǐneka Yɛsu lokombo lwa Pɛtɛlɛ,) 17 Ka Yakɔbi na Yɔani basɛ babele bǎna ba Jɛbɛdɛyɔ, (Yɛsu abainona Bɔanɛlɛgɛ, né kotɛnda tɛ) : «bato bale imbɛ mokungolo» 18 Asɔna Kalɛ Andele na Filipi na Balatɔlɔmayɔ na Matayɔ na Tɔmasi na Yakɔbi wa Alufayɔ na Tadɛɔ na Simɔni, bale mo kekumva Sɛlɔti. 19 Ka asɔna kalɛ Yuda Isikaliɔta. Ona wa mwǎla Yɛsu mo mabɔkɔ me mayale.

20 Kosila, Yɛsu aɔtɔla mondabo. Mokemba wakulumana kalɛ nabɔ tebaɔsɔna angɔ̌ kojá bikoja. 21 Pena yaǔkwa baboteka na Yɛsu elila ilɔngɔ babaka komotomba. Mɔkɔsɔna babɛja batɛnda né tɛ : «Iyɛ̌! Ona ǐki asɔpɔkɛ! Ǐki né baligi!»

22 Bilɛmɛsɛ bi kyǎto* batoka ko Yɛlusalɛma babɛja batɛnda tɛ Yɛsu Abundeke na Bɛlɛsɛbuli!. Ká baǐka batɛnda Bɛlɛsɛbuli* ne kɛlɛmɛsɛ ke meyombi Ka kolokwangwa luande né lwaɔnga seno ande meyombi. 23 Abɔ né wabaitana Yɛsu, ela mɛkɔta yě kyǎto* ka abatɛndela mo mesimo tɛ : «Boni! Kechwanda kelenge kyaiyɔnga ande bukɛli? 24 Imbɛ bato be bɔkɔta bɔmɔnji bwǎbanyeke mole nde bukɛli, né kɔtɛnda tɛ obola bɔkɔta tebwa emana. 25 Ka imbɛ kekanga kyǎbanyeke molende bukɛli, ekela kekanga tekya emana. 26 Ka imbɛ Kechwanda nande aiabanye lokangwa lwande ande bukɛli atɛ lokangwa lwande losili nisoko.

27 «Ka kǒsǐ moto olenge aǐngela monda ně ndábo ye moto we lokangwa, né kobusola imɔna jande kǒsi ko mokuma koboso. Asilě komokuma mwɛnɛ ndábo, né bobusola nde byɛ̌ndɔ bindabo yande.

28 «Yɛsu atɛnda tɛ : Nimosolele kpǎ, Bɔsɔmwá alenge aebelela mabe me bato ka né basɛ be kɔmɔbɛnga. 29 Ka moto ona ɔbɛngǎ Motema-Mɔɛlɔ, Bɔsɔmwá takaebelelǎ mabe mandé ka alě né mabe masu masɛ.» 30 Yɛsu atɛnda obola mokoba tɛ abala baěleji be kyǎto* batɛnda tɛ alese né meyombi.

31 Kosila obola, ninande na Yɛsu né baboteka nande babaka ka baemana kɔnjɛ bamotonena Yɛsu ilɔngɔ tɛ abake. 32 Monda něla ndábo kwabɛja bato babula balikana basɛ bamɔlɛnga Yɛsu ka bamosolela : ‟Lɔla njɔkɔ né baboteka nao balese anu kɔnjɛ bakondase kɔkɔmɔna.ˮ 33 Yɛsu abaɔ̌tɔjɛlɛ : «Nani olě ngǒ, ka nebaboteka nanɛ ?» 34 Ka Yɛsu alɔla bato abala bamɔlɛnga atɛnda : «Lɔla ngǒ né baboteka nanɛ nǎba balé seno anu! 35 Mɔkɔsɔna tɛ, moto ɔ̌sɛ ona waketǎ seno bikondǎ Bɔsɔmwá ande né waboteka nanɛ ka motamba wanɛ ka ngǒ yanɛ.»