1 Ka Yɛsu né ngelela* jande babanda kyatenge ke galilaya baolela kɔkɛsɛ ke ba Gɛlasi. 2 Ka Yɛsu aikelela mo wǎto, ayɔyɔala mwǎmolome ɔmɔnji amolela mo manjalo ka abaka kwande. Olá mwǎmɔlɔmɛ abɛja ne meyombi. 3 Ka boli kaneno wande né komanjalo, ka angɔ̌ né moto wǎɔsɔna kalɛ ko mokuma makɔki. 4 Mokoba tɛ pena lisɛ abɛja akumeka makɔki me munyɔlɔlɔ nělila mbolo, ka abɛja ku amabuka. Kǒsǐ moto wa mɔ̌sɔna. 5 Ola moto abɛja ku kwalɛngɛ mo manjalo buchu ne jǒba, ka né mo ngolo. Ka ǎkamoka ka aiyandǎ pota né mawɛ.

6 Ka amɔna nde Yɛsu motanga, ka ayaka lobelo kole nde amǔmbela makɔngɔ koboso nande. 7 Ka ola moto atɛnda ně jǒki likolo : «Awɛ Yɛsu Mwǎna wa Bɔsɔmwá bikě bile asambǎ meno nao ? Bilibili kolokombo lwa Bɔsɔmwá, iketa bobe!» 8 Ola moto atɛnda obola mokoba tɛ, Yɛsu amotɛndɛla : «Awɛ moyombi toka kǒna moto!»

9 Ka Yɛsu amoweja : «Lokombo lwao nani ?» Amɔ̌tɔjɛla tɛ : «Lokombo lwanɛ né ‹Lɛgiɔni› né kɔtɛnda tɛ tolené babula.*» 10 Ola moto apapa kwǐsakeleja na Yɛsu atɛnda tɛ : «Ǐɔnga ena meyombi motanga ně ke kese.»

11 Mǒlola lolo Kwabɛja kekumva kengolobe Kyabɛja molokaǒ. 12 Ka meyombi ɛsɛ yamosolela tɛ Yɛsu : «Tolamona kwǐngela mwěli ngolobe!» 13 Yɛsu aimenya. Ka meyombi yaola kǒla moto yaingela mwělila ngolobe. Ayɔyɔala elila ngolobe jakɔlɔmɔka komǔku lobelo ka jǎiyǔsa mo kyatenge jamɔta. Jěmba lisɛ jabɛja apeke ngwali libelé lingolobe.Jěmba lingolobe limɔti mo kyatengé 14 Kosila, bachungi bělila ngolobe batena ko kaja né motoja tomekeanya basaola malɔngɔ ko bato byaeteka okola. Bato babaka ka baimɔnɛna byaeteka. 15 Bamo belela Yɛsu ka bamɔna ola moto wabɛja né meyombi, alikana mɔmɔsɛkɛ, abɛja awala ngɔmbɛ ka aiki wǎlǐ. Amɔnabɔ obola bǐka nɛ̌ bɔ̌ba. 16 Abala basɛ baimɔnɛna byɛndɔ bisɛ byaeta kǒla Moto né kongolobe basaola kwǎba babaka kɔmɔngɔ. 17 Mǒbola, bǐka bamɔɛngɛla Yɛsu batɛnda : «Bilibili toka mo kese kito!» 18 Mopena ya nina Yɛsu mo wǎto, ola moto wamɔnamwɛjɔ amosolela Yɛsu : «Ingimenyenya iyake nao.» 19 Ka, Yɛsu taǐmenya, ka amɔsɔlɛla : «Yaka ko ndabo yao, obasolele bisɛ bikoketele Mɔkɔta, mǒbola bɔkɔmɔnɛnɛ nde lokwa.» 20 Ola moto ayaka. Ka ǐka abalanganya malɔngɔ ko toja né mo mosomba we Dɛkapɔli *mɛlɔndɔ ɛ̌sɛ yamoketela Yɛsu. Ka aǔkwa bato obola basɛ basebalala.

21 Kosila obola, Yɛsu abanda kalɛ mo pɔngɔ ye kyatenge ke Galilaya mo wǎto. Aolela nde ala bato babula bamɔlɛnga. 22 Ka ǎla kɛlɛmɛsɛ kɛmɔnji ke ndabo ye bichwambeko* ye Bayuda, lokombo lwande Yailo. Amɔnande Yɛsu, ǎiyǔsa ko bikɛta byande, 23 Ka aisakeleja nande atɛnda : «Moseka wanɛ ǐki mokokwa. Bilibli baka komǔmbele bichwambeko amɔnɛ mwɛjɔ.»

24 Mǒbola, Yɛsu ayaka nande ilɔmba. Ekela kekumva kyapamba ke bato bamojanga Yɛsu ka baikɔka kwande.

25 Mɔlɛbɔ kwabɛja mwǎmokali ɔmɔnji nǐbɔngɔka li kelilo myǎka ikomi né libele. 26 Ola mwǎmokali alewa masu mabula koma bokwa mo mabɔkɔ me menganga yabula ka tamɔna mwɛjɔ. Alimbeja imɔna jande lisɛ, ka ibɔngɔka jaeja ku koboso. 27 Ola mwǎmokali aǔkwa nde batɛnda mole Yɛsu, abaka aifɔfa ko bato ně kwěta kɔmɔngɔ wa Yɛsu ka abunda kɔngɔmbɛ yande. 28 Aketa obola, mokoba tɛ aǐɔmbɔla ko motema wande : «Imbɛ ibundi ku ngɔmbɛ yande nǎmɔna mwɛjɔna.»

29 Ayɔyɔala ola mosǐ wabǔkeka chɛ, ka amɔna mwɛjɔ. 30 Mwěla pena Yɛsu ajeba tɛ lokwangwa luande lomǒli. Ǎloka kokekumva ke bato ka aweja : «Nani omundi mɔngɔmbɛ yanɛ̌ ?» 31 Ngelela* jande jatɛnda : «Awɛ wamɔna moleba we bato ɔkɔlɛngi né boweji awɛ tɛ nani omundi ?» 32 Ka Yɛsu alɔla asambabɔ mo kojeba nani oketi obola. 33 Mǒbola, ola mwǎmokali asɔka ně bɔ̌ba mokoba tɛ ajeba byamǒlelela abaka kuǐyusa kobiketa bya Yɛsu ka amosolela bisɛ kǒsǐ kwǐseka. 34 Ka Yɛsu amosolela : «Moseka wanɛ, kongimenya kwaɔ̌ kɔkɔmɔnɛkyɛ mwɛjɔ. Yaka wǎli ɔmɔnɛ mwɛjɔ lɔsɛ.»

35 Pena yabɛja Yɛsu atɛnda, bato babaka kotoka kole Yailo batɛnda : «E asa ibunda ko motema kǒsǐ kɔmwɛ̌bɛja Mwěleji moseka wao asili kokwa.» 36 Ka Yɛsu aukwa nde elila ilɔngɔ, tabeka motema atɛnda ko kɛlɛmɛsɛ ke ndábo ye kwɛ̌ngɛla Bɔsɔmwá ye Bayuda : «Yǔkwa bɔ̌ba ngimenya kuna.» 37 Ka Yɛsu taimenya angɔ̌ kwaka né moto, akanda na Pɛtɛlɛ na Yakɔbi na Yɔani, waboteka na Yakɔbi.

38 Aolela bɔ ko ndabo ya Yailo Yɛsu aǔkwa moyonga we bato, né kangale né lotoko. 39 Yɛsu aingela mo ndábo ka atɛnda : «Moyongo webike waketa sebine né mekowa yekě ? Ona mwǎna tanakwa seno ka ale seno mɔkalɔ.» 40 Ka abala bato bǐka bamɔsɛka Yɛsu. Ka Yɛsu abaoja kɔnjɛ, aetana baboti be mwǎna ka né ngelelǎ* jande basato, ka baingela mo ndabo kwabɛja mwǎna. 41 Ka Yɛsu amobunda mo kabɔkɔ, atɛnda : «Talita, kumi,» Né kɔtɛnda tɛ : «Moseka, ni kosolele byǒka.»

42 Moseka aimana ayɔyɔala ka ayaka aɛnda abɛja né myǎka ikomi ne bibele. Ka abala bato bamɔna basebalala. 43 Ka Yɛsu abasimba tɛ basolela moto elila ilɔngɔ. Kosila, Yɛsu abasolela molongoja ija alě.