1 Yɛsu atokande okola, ayaka kwabɔ Nasalɛti ka ngelela* jande jamojanga. 2 Aolela buchu bo Sabato* ǐka aeleja mo sinagɔgi* bato kǐnge bamɔ tɛkɛlɛja basebalala né kɔtɛnda : «Ebi bitokele konǐ ? Nani wamolongoja okola kojeba ka né lokangwa lo koketa mesasa ? 3 Tǒna mɔsɛlɛmala mwǎna wa Malia kɛlɛmɛsɛ kwa Yakɔbi na Yɔsɛ na Yuda ka na Simo ? Ka metamba yande tetwalikanǎ nabɔ anuitǒ ?» Mǒbola, te bakonda ko mwǐmenya Yɛsu.

4 Anu, Yɛsu abasolela tɛ : «Motatoli* tapekǎ bokuchu kɔsɛ. Ka, talikanǎ ku né bokuchu mokaja kande ka mo kesele kyande ka mo ndabo yande.»

5 Yɛsu taketa kalɛ mesasa ǎla, akanda né kobekela babɔngɔki bakɛya mabɔkɔ ka abamɔnɛkya mwɛ̌jɔ. 6 Ka Yɛsu asebalala mokopeka ko mwǐmenya kwabɔ.

Amɔngɔ nǎla, Yɛsu ǐka alɛnga mo toja aěleja bato itɛnda ja Bɔsɔmwá. 7 Yɛsu aetana ngelelǎ* jande ikomi né babele abatoma babelebabele. Abalongoja lokangwa lɔkɔ̌nga meyombi. 8,9 Yɛsu ababunda mo machwe atɛnda : «Mɔlwɛndɔ lwino mobunda kɛndɔ angɔ̌ nɛkɛmɔnji : tanda ka kemomo ka mɛlɔla ka ngɔmbɛ ekinɛ. Ka mojala ku mɔkɔma né bilato.» 10 Yɛsu abasolele kalɛ : «Né kɔsɛ kɔmɔbundǎbɔ mabɔkɔ mabele likana ku ǎla nǒbo bwǒlǎ bine mwǎkala kaja. 11 Ka amena asɛ asi bato be kaja tebamobunda mabɔkɔ mabele ka né kopeka ko mǔkwa tokǎlani ka mo kotoka ala siya mopukuse kabobo* kabundise mo bikɛta bino kɔbɛ̌ kwǐchukoja kwǐno.»

12 Abala ngelela* bayaka baeleja bato basɛ tɛ bǎloke ka batoke ko mabe mabɔ. 13 Ka bayaka kalɛ baɔnga meyombi yabula né kochila babɔngɔki makuta ka babamɔnɛkya mwɛ̌jɔ.

14 Moela pena Hɛlɔdɛ aukunya batɛnda mole Yɛsu lo kombo lwande lǔkunyeka kɔsɛ. Bakinɛ babɛja batɛnda né tɛ : ‟Yɔani we Lobatiso né ǔboke. Nakyɔ bolende né lokangwa lo koketa mesasa. 15 Ka bakinɛ batɛnda tɛ : ‟Oná moto alene Eliaˮ Ka bakinɛ tɛ : ‟Ale né Motatoli* wa Bɔsɔmwá imbɛ Batatoli bakinɛ batangiˮ.

16 Ka Ɛlɔdɛ aukwande obola atɛnda : «Ona moto ale né Yɔani we Lobatiso wabukeja meno lokongo, né ǔboke!»

17 Mokoba tɛ Hɛlɔdɛ ande bɛnɛ né wabɛja asili kolamona tɛ Yɔani abundeke bamokume makɔki ka bamǔse kɔmunyɔlɔlɔ. Hɛlɔdɛ aketa obola mɔkɔsɔna tɛ Yɔani né wamosimba tɛ tasɔngɛ Hɛlɔdia mokali wewaboteka nandé Filipi. 18 Ka Yɔani né wabɛja amosolela Hɛlɔdɛ : «Kyǎto kito kyasimba tɛ twendele kotomba mokali wewa boteka naɔ kole né ketao.»

19 Kɔmɔna obola Hɛlɔdia abɛja asili kɔsɔmba Yɔani ǐka alenga njela ye komolyekeja, ka taɔsɔna. 20 Mokoba tɛ Hɛlɔdɛ abɛja atena Yɔani. Ka ajeba tɛ alě moto wě kpǎ ka wasokoka kwa Bɔsɔmwá, mǒbola amo kombesanya Yɔani. Hɛlɔdɛ abɛja akonda kɔtɛkɛlɛja iyano ja Yɔani ka abɛja nɛ̌ kɛ̌lɛ angɔ̌ obola wabɛja yɔ yamɔlɛngɛja lokongo.

21 Ka pena yaenda kole Hɛlɔdia yaolela buchu bomokemba we koboteka kwa Hɛlɔdɛ. Aetana bilɛmɛsɛ byande bi kese né binǐyoko ka né mɛkɔta ye toja tokinɛ to Galilaya.

22 Moseka wa Hɛlɔdia aingela nande ko mokemba ǐka akaja ka makajo mande bato basɛ bǐsɛkɛja namɔ angɔ̌ ande Hɛlɔdɛ. Mɔkɔta asolele moseka : «Ngɛngɛla kɛsɛ ke kondǎ awɛ ka niko longoja seno.» 23 Ǎpeke kalɛ tɛ : «Balɔbɛnɛ kɛsɛ kɛ ngɛngɛla seno awɛ ni kolongoja senó angɔ̌ kǐunda ke bɔkɔta bwanɛ.»

24 Olá moseka ǎola ka ayaka kwa ninande komoweja : «Ngǒ niɛngɛlɛ bikě ?» Ninande atɛndi : «Ɛngɛla ku lokongo lwa Yɔani we lobatiso.» 25 Ayɔyɔala ola moseka aɔtɔla lobelo kole Mɔkɔta ka amosolela : «Mbǎ ku anuanu lokongo lwa Yɔani we lobatiso mo lɔpɛpɛ!» 26 Mɔkɔta aǔkwandé obola mobele wamɔ̌la ka kɔmɔna tɛ aketa balɔbɛnɛ koboso né bato bǐtanande takonda kalɛ komwǐlela mokelaǒ kyande. 27 Ayɔyɔala Mɔkɔta atoma munaiyoko wande ɔmɔnji amobesejele lokongo lwa Yɔani welobatiso. 28 Ka munaiyoko abeseja lokongo kolé moseka ka moseka alongoja ninande.

29 Aǔkwa ngelela* ja Yɔanɛ elila ilɔngɔ jabeya babaka kotomba mobele wande ka ba mojeka.

30 Totomangwa* twa Yɛsu aɔtɔlabɔ kwande bamosolela bisɛ byaketabɔ né byaeleja bɔ bato. 31 Anu bato kǐnge babaka kwande kwǎka ně kɔ̌tɔla Yɛsu ně ngelela* jande te babɛja ně pena ye koja bikoja. Mǒbola Yɛsu abasolela : «Bakakono amena kosǐ kole bato ka moǔmonyebi.» 32 Bǎka mo wǎto abɔbɛnɛ amena asǐ ale né bato.

33 Ka bato kǐnge babamɔna bayaka ka bajeba kwa yakabɔ babajanga né bikɛta ka né bato basɛ be mesomba bayaka lobelo baolela koboso na Yɛsu ně Ngelela* jande. 34 Ka mopena ya olande Yɛsu mo wǎto amɔna kekumva ke bato ka abakwelela lokwa. Mokoba tɛ babɛja bǐki imbɛ mɛgɔgɔ epeki mochungi ka ǐka abaeleja mɛlɔndɔ yabula.

35 Kwabɛja pena yɛkyɔla ngelela* jande jaɛsɛnɛna kwa Yɛsu ka batɛnda tɛ : «Anuamena tekwalikanǎ bato ka buchu bwǐki sɛsɛ ně kwǐla. 36 Ka lamona bato bayake mo masiǒ né motoja tɔkinɛ tomokyanya basombe bikoja.» 37 Yɛsu abasolele ngelela* jandé tɛ : «Balongoja bine bɛnɛ ija!» Ka abɔ tɛ : «Twǎkane ko basombela mekate yě kama libele* ayo né ya balongojǎ bite balě ?»

38 Yɛsu abaweja tɛ : «Mekate enga elese nino ? Yaka kɔlɔlɛ.» Abɔ baɔtojɛ tɛ : «Tolese ku né mekate etano ka né bisɔkɔ bibele.» 39 Ka Yɛsu abasolela tɛ : «Bali kanekye bato mɔ mɔsɛkɛ ko bisɛsi melebameleba.» 40 Ka balikana mo meleba yě kamakama ka neye makomi matanomatano. 41 Kosila, Yɛsu abunda ela mekate etano ka ně bila bisɔkɔ bibele asakola mǐsɔ kwǐyolo aseka Bɔsɔmwá. Ka abuka mekate neko longoja ngelela* jande bǎbanye ko bato basɛ. Ka ebila bisɔkɔ bibele nabyɔ bǎ banyela bato basɛ. 42 Bato basɛ baja ka bǐkota. 43 Ngelela* jatɔla biunda bi mekate né bisɔkɔ byasia bajaja bipaka ikomi né bibele. 44 Abala bǎbalome baja elila ija babɛja ngwali litano li bato.

45 Yɛsu asila nde atoma ngelela* jande banina mo wǎto batangole koboso nande kɔpɔngɔ ye kyatenge ko mosomba o Bɛtɛsaida, kɔmɔna tɛ ande bɛnɛ né wasiya alǎ kekumva. 46 Ka asilande kolǎ kekumva ayaka mo lolo kǔmba bichwambeko kwa Bɔsɔmwá.

47 Kwabɛja mɔkyɔla wǎto we ngelela* wabɛja mǔngia kyatenge ka Yɛsu asiya bukɛli komochili we kwatenge. 48 Amɔna tɛ ngelela* jande balewi né koluwa mokoba tɛ itɛmbɔ jabɛja jabaina ; ka mǔngia buchu ǎka kole bɔ aɛnda akanda ně mǎnje ka alengane tɛ abaete. 49 Ka ngelela* amɔmɔnabɔ aɛnda akanda ně mǎnje, bǎkamoka mokoba bakanya né tɛ isombo. 50 Kɔmɔna tɛ bamɔmɔna basɛ baukwa bɔ̌ba.

Ayɔyɔala Yɛsu abatɛndɛla : «Bǎneka kini ka itenani mojebe wǎli tɛ meno sǒlá!» 51 Ka anina mǒla wǎto wabɛjabɔ ka itɛmbɔ jakɔba.

Ngelela* basebalala, 52 Mokoba tɛ tebajeba mesasa yěla mekate : makani mabɔ mabɛja mǐyeya.

53 Asila Yɛsu ně ngelela* jande kobanda kyatenge baolela ko mosomba we Gɛnajalɛti, ka bakuma wǎto babanda. 54 Aola bɔ mo wǎto ayɔyɔala bato bamojeba Yɛsu. 55 Mǒbola, Bato bějambelo mo kese kɛsɛ ka bamo jalela babɔngɔki né matopo mabɔ masɛ kǔkwabɔ tɛ Yɛsu alese ǎla. 56 Ka kɔsɛ kwaeta Yɛsu monda né mesomba né toja né mobileme bamobesela babɔngɔke ka bǐsakeleja nande bamobunde angɔ̌ mɔtɔnga yě ngɔmbɛ ka basɛ bamobunda mɔtɔnga yě ngɔmbɛ bamɔna mwɛjɔ.