1 Mwěla pena, mokemba wa pamba wabaka kalɛ. Wabɛja kǒsǐ bikoja, Yɛsu aetana ngelela* jande ka abasolela : 2 «Nimɔni lokwa mwǎba bato mokoba tɛ masu masato balese nanɛ ka bale angɔ̌ ne kekoja. 3 Ka imbɛ nibaɔ̌tɔjɛ kwabɔ ikunju wǎse, bakwase monjela, mɔkɔsɔna tɛ kǐnge mɔlɛbɔ batoka motanga.»

4 Ngelelǎ* jande bamɔ̌tɔjɛla : «Amena ǎsǐ ale né bato koni kwabangǎ bite bikoja bikoba lesejǎ ?» 5 Yɛsu abaweja : «Molese ne mekate engǎ ?» Ka bamɔ̌tɔjɛla : «Motoba nɔ̌mɔnji.»

6 Ka, Yɛsu alamona bato be mokemba balikane mɔ mɔsɛkɛ. Ka, abunda ela mekate motoba nɔ̌mɔnji, aɛngɛla Bɔsɔmwa. Ka amebukabuka amelongoja ngelelǎ* jande moko bǎbanyele bato basɛ. Ka ngelela* jande bǎbanyela abala bato. 7 Kwabɛja kalɛ né bisɔkɔ byakɛya. Yɛsu aɛngɛla Bɔsɔmwá mole ebila bisɔkɔ. Ka atɛnda ně ngelelǎ* jande : «Bǎbanyele bato kalɛ.» 8 Bato basɛ bajá ka bǐkota. Menanga yasiya, ngelela* bajala bipaka motoba nɔ̌mɔnji fǎ. 9 Bato baja elila ija, babɛja apeke bato ngwali linanji.

Ka Yɛsu abalǎ. 10 Kosila, Yɛsu anina mo wǎto ně ngelela* jande ka bǎka ko mosomba we Dalamanuta.

11 Bafalisayɔ* ba olela ka bǐka bǎngelana na Yɛsu moko molongela ilonga. Bamwɛngɛla abalangeje kabɛli ke mosasa ye kolangeja imbɛ lokangwa lwande lwatoka kwa Bɔsɔmwa. 12 Yɛsu asakala ko motema wande ka atɛnda : «Bato be mǒbo boni bwakondǎ sɛbɔ kwɛ̌ngɛla mosasa ? Nimolangeje kokpǎ : Bakamɔna angɔ̌ ne mosasa ɔmɔnji!»

13 Ka Yɛsu abasiya anina mo wǎto ka ayaka pɔngɔ ɛkinɛ ye keliba.

14 Ngelela* ba ebelela kojala tanda, ka okola monda ně wǎto babɛja ku né mokate ɔmɔnji. 15 Yɛsu alǎ ngelelǎ* jande atɛnda : «Angɛ! Mɔlɔlɛ wǎli ne tɔsɔngɛkanya to bafalisayɔ* ka nǎkala ba Hɛlɔdɛ.»

16 Anu, ngelela* ja Yɛsu baingele mo meango asambǎ abɔbɛnɛ. Batɛnda obola mɔkɔsɔna tɛ tebabɛja ne mekate.

17 Yɛsu ajeba ela mɛlɔndɔ ya tɛndabɔ ka ande abaweja : «Boni bwǎngelana se bine mo kopeka mekatě ? Bine monajebe kunabola ? Ka monabunde ena mɛlɔndɔ mo metema yino ? Molese ne metema yanuna ? 18 Molese ně mǐsɔ, ka temwa mɔna seno ? Molese né machwe temwaukwa seno ?

«Temwakanya seno  19 Kalɛ tɛ nabuka mekate etano neko leseja mo bato ngwali litano ? Kwasiya bipaka binga bi menanga byajala bine fǎ ?» Baɔtɔja tɛ : «Bipaka ikomi né libele» 20 Yɛsu abaweja kalɛ : «Abuka meno mekate motoba nɔ̌mɔnji mo koleseja bato ngwali linanji ka bǐkota ? Ka bipaka binga bimenanga byajala bine fǎ ?» Bamɔ̌tɔjɛla : «Motoba nɔ̌mɔnji» 21 Ka Yɛsu abaweja : «Nǎnu, monajeba sé kalɛ ?»

22 Pena yaǒlela Yɛsu ně ngelela* jande ko Bɛtɛsaida; ǎla, bamobesela moto we botongo ka bǐsakeleja nande amobunde mɔ bɔngɔki amɔnɛ mwɛjɔ. 23 Yɛsu abundi ola we botongo mo kabɔkɔ ka amɔɛ̌ndɛja kɔnjɛ né kaja. Ka amǔsela lɔsɔki ko mǐsɔ, abeka tɔbɔkɔ molende ka amoweja : «Ɔmɔni kɛndɔ̌ ?» 24 We botongo asakole mǐsɔ atɛnda : «Nimɔni bato, ni bamɔni né imbɛ mete baɛnda.» 25 Yɛsu abeki kalɛ tɔbɔkɔ mo mǐsɔ me we botongo ; we botongo amɔni mwɛjɔ alɔli amɔni wǎli sɛnjɛkɛlɛ. 26 Ka Yɛsu amotoma kwande. Né komolǎ tɛ : «Iyɔtɔla kalɛ mwǎkala kaja.»

27 Kosila obola, Yɛsu ně ngelela* jande bayaka kalɛ lǒsa lotoja to Kaisaliya lo Filipi. Ko njela, Yɛsu abaweja ngelela* jande : «Bato batɛndǎ sé meno nilé nani ?» 28 Bamɔ̌tɔjɛla : «Bamɔnji batɛndǎ seno tɛ olě Yɔani welobatiso ka bakinɛ tɛ olě Eliya, ka bakinɛ kalɛ tɛ olě ɔmɔnji we totomangwa*.»

29 Ka Yɛsu ǎlokele ngelela* jande abaweja : «Ka bine mɔtɛndi meno nile nani ?» Pɛtɛlɛ amɔ̌tɔjɛlɛ tɛ : «Awɛ né Kilisito*.» 30 Ka Yɛsu ababunda ko machwe tɛ basolela moto elila ilɔngɔ.

31 Kosila obola, Yɛsu ǐka aěleja ngelela* jande atɛnda : «Meno Mwǎna we Moto niendele kolewa ka nǎlewane kǐnge; mekongo ye masu, mɛkɛngwa ya Bɔsɔmwa, ka né bilɛmɛsɛ bi kyǎto bangusa seno bandiyekya seno ka komasu masato naubokana.» 32 Ka Yɛsu abasolela ebila bisɛ wǎse.

Ka Pɛtɛlɛ mole ande bɛnɛ ayaka na Yɛsu kwǐpamba, ika amǔmba Yɛsu mapala. 33 Ka Yɛsu, ǎlokela ngelela* jande ka amǔmba Pɛtɛlɛ mapala atɛnda : «Yaka tǒka koboso nanɛ, Kechwanda, mokoba tɛ okanyi makani me bato ka kǒsǐ imbɛ ma Bɔsɔmwá!» 34 Kosila, Yɛsu aětane kekumva ně ngelelǎ* jande ka atɛnda ko basɛ : «Imbɛ moto akondi kobaka kole meno, alɛkɛ kwǐkanya ande bɛnɛ, ajale mote wande we mǎkwa ka anjange. 35 Mokoba tɛ, moto ola okondǎ kolakola mwɛjɔ wande akamo limbeja; ka ola olimbejǎ mwɛjɔ wande mole meno ka mwǐtɛnda ja Bɔsɔmwá aka mobanga kalɛ. 36 Kolě faila mekě moto kobanga imɔna lisɛ li loniya neko limbeja mwɛjɔ wande ? 37 Ka imbɛ tǒbola, olenge walongoja bikě mo kosomba mwɛjɔ we motǒ ?

38 «Mojebe tɛ bato be mǒbo balese be mabe ka tebakondǎ Bɔsɔmwá. Imbɛ moto ale ně sɔni nanɛ ka né mɔmɛlɔndɔ yanɛ mǔngia abala bato, ka meno Mwǎna we Moto, nibase ně sɔni nande akabakǎ meno né bamalaika banɛ baɛlɔ mo bokuchu byisanɛ.»