1 Coríntios 16

Mbúkha̱a̱ rí mi̱tambáñúú ga̱jma̱á xa̱bi̱i Ana̱ꞌlóꞌ

1 Xúge̱ꞌ rí nandoꞌ ma̱tha̱nꞌlaꞌ ga̱jma̱á numuu mbúkha̱a̱ rí mi̱tambáñúú ga̱jma̱á xa̱bi̱i Ana̱ꞌlóꞌ. Gu̱ne̱ máꞌ mangáanꞌlaꞌ xómá ni̱thu̱ún mbámbá kuthuun tsí nanimbu̱únꞌ juyáá Jesús ná numbaa Galásia̱. 2 Mbámbá mbiꞌi ginii rí ndayáa semána̱, mbámbáa gíꞌmaa maríya̱ꞌ jamí mayáxi̱i janíí tháan mbúkha̱a̱ rí maxná, xómá nidaa̱ awúun rí majun mbiꞌi rí ninújngoo máꞌ. Ikhaa jngó ma̱xáꞌne rí ni̱kú ma̱gi̱xi̱i mbúkha̱a̱ ído̱ rí ma̱gánúlo̱ꞌ. 3 Ído̱ gágánú, a̱ꞌkhue̱n ma̱xnu̱ú i̱yi̱i̱ꞌ rí mu̱xna̱xí-mijná ga̱jma̱á tsí ni̱raꞌwíinlaꞌ, jamí ma̱xu̱ꞌmíi̱ꞌ magóo̱ juñúu̱ ná Jerusalén mbúkha̱a̱ rí niwa̱a. 4 Jamí xí ndaꞌyóo rí ma̱ꞌgá mangúúnꞌ rá, magóo̱ ga̱jma̱á nindxu̱ꞌ.

Rí naꞌgí-mina̱ꞌ Páblo̱ ma̱ꞌne

5 Ído̱ rí ma̱ꞌgá gáya̱ꞌlaꞌ, ndaꞌyóo rí ma̱nújngoꞌ ná numbaa Masedónia̱ ginii, nda̱wa̱á a̱ꞌkhue̱n ma̱gánú ná Korínto̱. 6 Á gáꞌne xí ma̱xtáá mbá wátha̱ wáa mbiꞌi ga̱jma̱á nindxa̱ꞌlaꞌ, o á gáꞌne xí mbá jañii go̱nꞌ rí naꞌne ngúwán mbo̱ꞌ, kajngó mu̱xnu̱ꞌlaꞌ rí ndaꞌyóo ma̱ꞌgá-muꞌ asndo náá máꞌ gáꞌgálo̱ꞌ rí nda̱wa̱á. 7 Numuu tsíyoꞌ rí i̱ndo̱ó máꞌ ma̱nújngoꞌ-ra̱ya̱ꞌlaꞌ, rí nandoꞌ ma̱xtáá mba̱ꞌyo̱ꞌ máwáa ga̱jma̱á nindxa̱ꞌlaꞌ, xí numuu rí nandoo Táta̱. 8 I̱ndo̱ó máꞌ numuu rí ma̱xtáá ná xuajen Éfe̱so̱ asndo ndxa̱a̱ Pentekostés. 9 Numuu rí ni̱ma̱ꞌthoo mbá xkrugua mba̱a̱ rí ma̱ne̱ mbá ñajun rí phú na̱gi̱do̱o̱ꞌ, maske máꞌ phú mbaꞌiin tsí nawajún-ꞌthi̱ín.

10 Ído̱ ága̱nú Timotéo̱, a̱gu̱ya̱álaꞌ rí ma̱xtáa̱ mújúu̱n ga̱jma̱á nindxa̱ꞌlaꞌ, numuu rí ikhaa̱ naꞌnii̱ ñajuun Táta̱ xómá rí na̱ne̱ ikhúúnꞌ. 11 Ikhaa jngó, nimbáa ma̱xáꞌñuu̱ asndo xómá rí nda̱a̱ numuu̱. Jamí ído̱ gáꞌkhaa̱, gu̱xnáa̱laꞌ rí mba̱ꞌyóo̱ ná jamba̱a̱ kajngó ma̱ga̱núu̱ mújúu̱n ná xtáá ge̱jyoꞌ, numuu rí gúꞌthu̱u̱nlo̱ꞌ gajmíꞌ i̱ꞌwíin a̱ngia̱nꞌlóꞌ.

12 Xómáꞌ dxájwalóꞌ Apólo̱s, maphú ni̱tha̱n-jáñuu̱ rí ma̱ꞌgee̱ gáꞌyalaꞌ gajmíi̱ i̱ꞌwíin a̱ngia̱nꞌlóꞌ. Maske máꞌ asndo xúge̱ꞌ ra̱khóo̱ gáꞌgee̱, ma̱ꞌgee̱ nda̱wa̱á ído̱ gáyaphaa̱.

Rí nithúún mune̱ xa̱bi̱i Ana̱ꞌlóꞌ ná Korínto̱

13 Ga̱juwalaꞌ xawi. Ga̱wajún-gúkuálaꞌ ná tsu̱du̱u̱ rí nanimba̱ꞌlóꞌ juꞌyáá. Nimbáa ma̱xáꞌne-míñalaꞌ, jamí gu̱xna̱-míjnálaꞌ tsiakhe̱. 14 Gu̱snga̱jmálaꞌ rí nandalaꞌ ju̱ñu̱ú xa̱bo̱ ga̱jma̱á majñu̱u̱ mbá xúgíí rí nu̱ne̱laꞌ.

15 A̱ngui̱nꞌ, ikháanꞌlaꞌ ndu̱ya̱álaꞌ rí mbá guꞌwíin xa̱bi̱i Estéfa̱na̱s ñajúún tsí ginii jayu ninimbu̱únꞌ juyáá Jesús ná numbaa Akáya̱, jamí ikhii̱n ni̱xna̱xí-mijnée̱ rí mune̱-mba̱ꞌwii̱n xa̱bi̱i Ana̱ꞌlóꞌ. 16 Na̱tha̱n-jáñalaꞌ rí gu̱dxawíínlaꞌ rí nuthan xa̱bo̱ tsí jaꞌñúú xómá ikhii̱n, xúꞌkhue̱n máꞌ gu̱ne̱-mbáníílaꞌ rí nuthan xúgíin tsí nu̱mbáñúu̱ jamí nu̱ñajun ga̱jma̱á nindxúu̱n. 17 Maphú nadxu a̱kui̱nꞌ rí ni̱ꞌkha̱ gáꞌyeꞌ Estéfa̱na̱s ga̱jma̱á Fortunáto̱ jamí Akáiko̱. Ikhii̱n nixniꞌ rí tsíyoo mu̱xnu̱ꞌlaꞌ ikháanꞌlaꞌ. 18 Numuu rí ikhii̱n nene̱-gagii̱ a̱kui̱nꞌ, xómá nuni̱i̱ ga̱jma̱á nindxa̱ꞌlaꞌ ikháanꞌlaꞌ. Ikhaa jngó, gu̱ya̱-makúúnlaꞌ xa̱bo̱ tsí jaꞌñúú xómá ikhii̱n.

Tsí na̱gi̱mbíin ná i̱ꞌwá xuajen nu̱ra̱xi̱in tsí na̱gi̱mbíin ná Korínto̱

19 Nu̱ra̱xáa̱nꞌlaꞌ mbámbá kuthuun tsí nanimbu̱únꞌ juyáá Jesús ná numbaa Ásia̱. Xúꞌkhue̱n máꞌ Akíla̱s ga̱jma̱á Prisíla̱, gajmíi̱ tsí nanimbu̱únꞌ juyáá Jesús tsí na̱gi̱mbíin ná guꞌwúu̱n, maphú nu̱ra̱xáa̱nꞌlaꞌ ga̱jma̱á numuu Táta̱. 20 Nu̱ra̱xáa̱nꞌlaꞌ mbá xúgíin a̱ngia̱nꞌlóꞌ. Gu̱ra̱xi̱-mijnáalaꞌ mbá xúgiáanꞌlaꞌ ga̱jma̱á gamaku.

21 Jmínu̱úꞌ ikhúúnꞌ, Páblo̱, na̱tháán ga̱jma̱á ñawúnꞌ rí na̱ra̱xáanꞌlaꞌ.

22 Xí mbáa tsíyoo jaꞌyoo Táta̱ Jesukrísto̱, gi̱ꞌxná-máꞌáa̱n. Xómáꞌ ikhúúnꞌ na̱tha̱nlo̱ꞌ: «¡Aya̱, Tátiáxo̱ꞌ!».*16.22 Ná i̱yi̱i̱ꞌ griégo̱ rí wayuu tima a̱jma̱ ajngáa araméo̱: «Marana tha» rí jayá ju̱ma̱ «Tátiáxo̱ꞌ, aya̱».

23 Táta̱ Jesukrísto̱ gáꞌne-tsakun-rámáaꞌlaꞌ. 24 Ikhúúnꞌ nandoꞌ ja̱ya̱ꞌlaꞌ mbá xúgiáanꞌlaꞌ ga̱jma̱á majñu̱u̱ Krísto̱ Jesús. Xkuaꞌnii gáꞌne.*16.24 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa «Xkuaꞌnii gáꞌne».