1 Rí xúge̱ꞌ rá, a̱ngui̱nꞌ, ríga̱ i̱mba̱ rí nandaxo̱ꞌ mu̱tha̱nꞌlaꞌ: phú nu̱tha̱n-jáñalaꞌxo̱ꞌ jamí nu̱nda̱ꞌa̱ꞌlaꞌxo̱ꞌ ga̱jma̱á numuu Táta̱ Jesús, rí ga̱juwalaꞌ ná inuu Ana̱ꞌlóꞌ xómá jaꞌyoo jamí gu̱ne̱laꞌ rí nandoo̱, xómá rí ni̱ma̱ñalaꞌ ga̱jma̱á majña̱ꞌxo̱ꞌ ikháanꞌxo̱ꞌ. Nu̱ne̱laꞌ máꞌ rúꞌkhue̱n jamí gu̱ne̱laꞌ i̱tha̱án xóó. 2 Numuu rí ikháanꞌlaꞌ nu̱ne̱-nuwiinlaꞌ máꞌ rí ni̱sngálaꞌxo̱ꞌ ga̱jma̱á numuu Táta̱ Jesús. 3 Numuu rí Ana̱ꞌlóꞌ nandoo rí ma̱ꞌne-jaꞌwáanꞌlaꞌ, rí mu̱xúba̱ꞌ gajmiálaꞌ xa̱bo̱ tsí túya̱a̱laꞌ. 4 Mbámbáa tsí ikháanꞌlaꞌ ga̱ma̱ñuu ma̱xtáa jaꞌwu ga̱jma̱á a̱ꞌgui̱i jamí gaya-makuu̱. 5 Ra̱ꞌkhá rí ma̱juwalaꞌ mu̱ne̱laꞌ rí xkawe̱ꞌ mi̱ndaꞌkho nandoo xuyalaꞌ, xómá nune̱ xa̱bo̱ tsí tsíne̱-nuwiin Ana̱ꞌlóꞌ. 6 Jamí nimbáa ma̱xáꞌne-ñawúun ni máꞌ ma̱xáꞌne-nduwaa dxájuu ga̱jma̱á numuu rúꞌkhue̱n. Numuu rí Táta̱ naꞌne rí ma̱grui̱gú mba̱a̱ jamínu̱ꞌ xa̱bo̱ tsí naꞌne aꞌkhán rúꞌkhue̱n, xómá rí ikháanꞌxo̱ꞌ ni̱tha̱nꞌlaꞌ máꞌ mbá jaꞌwu nákhí wapha. 7 Numuu rí tándxaꞌwá-ri̱ñáaꞌlóꞌ Ana̱ꞌlóꞌ rí ma̱juwalóꞌ ná awúun rí xkawe̱ꞌ, rí nindxaꞌwá-ri̱ñáaꞌlóꞌ rí ma̱ꞌga-ra̱gu̱ma-jaꞌwáanꞌlóꞌ. 8 Ikhaa jngó, xa̱bo̱ tsí na̱nguá iyoo gádxawuun gisngáá ríge̱ꞌ, ra̱ꞌkhá máꞌ ajngóo xa̱bo̱ numbaa tsíyoo̱ gádxawuu̱n, rí tsíyoo̱ gádxawuu̱n ajngóo Ana̱ꞌlóꞌ, tsí nixniálóꞌ Xu̱u̱ꞌ kajngó ma̱xtáa ga̱jma̱á nindxa̱ꞌlóꞌ.*

9 Xómáꞌ rí jaꞌyoo rí ma̱galóꞌ juꞌya-mijnálóꞌ rá, tsíꞌyóo máꞌ rí mu̱tháánxo̱ꞌ ga̱jma̱á numuu rúꞌkhue̱n, numuu rí jmína̱a̱ꞌ máꞌ Ana̱ꞌlóꞌ niꞌsngálaꞌ ikháanꞌlaꞌ rí ma̱galaꞌ ju̱ya̱-mijnálaꞌ. 10 Jamí mangaa máꞌ nandalaꞌ ju̱ñu̱ú mbá xúgíin a̱ngia̱nꞌlóꞌ tsí júwa̱ꞌ ná numbaa Masedónia̱ a̱ꞌkhue̱n. I̱ndo̱ó máꞌ numuu rí nu̱tha̱n-jáñalaꞌxo̱ꞌ, a̱ngui̱nꞌ, rí ga̱galaꞌ i̱tha̱án xóó ju̱ñúu̱. 11 Gu̱ne̱laꞌ rí ma̱juwalaꞌ tsímáá gajmiálaꞌ mbá xúgíin xa̱bo̱. Ga̱juwalaꞌ-ru̱ne̱ rí jaꞌyalaꞌ mu̱ne̱, jamí gu̱ñajunlaꞌ ga̱jma̱á ñawánlaꞌ xómá rí ni̱xna̱-ñájwanlaꞌxo̱ꞌ. 12 A̱ꞌkhue̱n rí xa̱bo̱ tsí tsíne̱-nuwiin Ana̱ꞌlóꞌ mbuya-makualaꞌ, jamí ma̱xáꞌyóo rí ma̱mbu̱jmalaꞌ ná inuu nimbáa xa̱bo̱.

13 A̱ngui̱nꞌ, nandaxo̱ꞌ rí ma̱gi̱da̱ꞌ mújúun idxa̱ꞌlaꞌ, dí gáꞌne ga̱jma̱á numúú a̱ngia̱nꞌlóꞌ tsí nijáñúú máꞌ, kajngó ma̱xáꞌdaa a̱kia̱nꞌlaꞌ xómá i̱ꞌwíin xa̱bo̱ tsí na̱nguá guáꞌdáá rí ma̱guáꞌthi̱ín ga̱jma̱á mbá jañii a̱kui̱ín. 14 Numuu rí xómá rí nanimba̱ꞌlóꞌ rí Jesús nijáñuu jamí ndiyáa mbiꞌyuu, xkuaꞌnii máꞌ nanimba̱ꞌlóꞌ rí Ana̱ꞌlóꞌ ma̱ꞌkha̱ jagu̱un ga̱jma̱á nindxu̱u̱ Jesús tsí nanimbu̱únꞌ juyáa̱ nákhí nijáñúú. 15 Ikhaa jngó, ikháanꞌxo̱ꞌ nu̱tha̱nꞌlaꞌ ríge̱ꞌ, mbá rí jmína̱a̱ꞌ máꞌ Táta̱ niꞌthán: Ikháánꞌlóꞌ tsáánꞌ xóó juwa nduꞌyalóꞌ asndo mbiꞌi rí ma̱ꞌkha̱a Táta̱, mu̱xúꞌgua̱ gináálóꞌ gúxkamaa̱lóꞌ, rí ginuu a̱ngia̱nꞌlóꞌ tsí nijáñúú máꞌ magóó gúxkamaa̱. 16 Numuu rí jmína̱a̱ꞌ máꞌ Táta̱ ma̱ga̱taa ná mikhuíí ga̱jma̱á mbá a̱ꞌwá rí naꞌthán-ñájun, ga̱jma̱á a̱ꞌwóo mbáa ánje̱l tsí phú mba̱a̱ ski̱yu̱u̱ꞌ, jamí ga̱jma̱á a̱ꞌwóo e̱ꞌmbi drígo̱o̱ Ana̱ꞌlóꞌ. A̱ꞌkhue̱n rí tsí nanimbu̱únꞌ juyáá Krísto̱ nákhí nijáñúú, mbuya̱a mbiꞌñúú ginuu. 17 A̱ꞌkhue̱n rí tsáánꞌ juwa nduꞌyalóꞌ xóó, mbá nacha̱ ma̱ꞌga jiꞌdáanꞌlóꞌ ná du̱u̱n ga̱jma̱á nindxúu̱n ikhii̱n, kajngó mu̱dríguíilóꞌ Táta̱ ná inuu gíñá. A̱ꞌkhue̱n rí ma̱juwalóꞌ jámuu mbiꞌi ga̱jma̱á nindxu̱u̱ Táta̱. 18 Ikhaa jngó, gu̱xna̱-míjnálaꞌ tsiakhe̱ ga̱jma̱á ajngáa rúꞌkhue̱n.