1 Gúꞌthu̱u̱n rí mu̱ne̱ mba̱a̱ a̱kia̱nꞌlaꞌ ju̱yo̱ꞌ, maske máꞌ asndo xó rí najágu̱nꞌ jaꞌnii. Gu̱ñu̱ꞌlaꞌ mbá rí máján, gu̱ne̱ mba̱a̱ a̱kia̱nꞌlaꞌ ju̱yo̱ꞌ ga̱jma̱á numuu rí ma̱tha̱nꞌlaꞌ. 2 Numuu rí phú naxná-gamiéjunꞌ e̱ne̱laꞌ xómá rí naxná-gamiéjuun Ana̱ꞌlóꞌ e̱ne̱laꞌ. Ikhúúnꞌ gúꞌdáanꞌ nga̱jwáanꞌlaꞌ kajngó mbu̱ya̱a̱laꞌ i̱ndo̱ó máꞌ Krísto̱ rí ma̱ꞌne a̱jmbialaꞌ, jamí ma̱xna̱xáanꞌlaꞌ ná inuu̱ ikhaa̱ xómá mbáa dxáꞌgú tsí xóó máꞌ tábóo ga̱jma̱á nimbáa xa̱bo̱. 3 Xómáꞌ ikhúúnꞌ namíñuꞌ rí ma̱gu̱ma-nduwáanꞌlaꞌ, xómá rí ni̱gu̱ma-nduwaa Éba̱ neꞌne a̱bo̱ꞌ ga̱jma̱á numuu rí phú wiphii̱ rí ma̱ꞌne-nduwee̱. A̱ꞌkhue̱n rí ma̱ꞌkhiáanꞌlaꞌ jamí mu̱ni̱ꞌñáálaꞌ rí mbá jaꞌwu a̱kia̱nꞌlaꞌ nu̱ndxa̱ꞌwa̱-mijnálaꞌ ju̱ya̱á i̱ndo̱ó máꞌ Krísto̱. 4 Numuu rí ikháanꞌlaꞌ phú gagi máꞌ a̱kia̱nꞌlaꞌ nu̱dríguíilaꞌ asndo tsáa máꞌ tsí naꞌthán-ráꞌalaꞌ ga̱jma̱á numuu i̱mba̱a̱ꞌ Jesús, tsí kriꞌkhuii xó rí ikháanꞌxo̱ꞌ ni̱sngálaꞌ. Phú nadxu máꞌ a̱kia̱nꞌlaꞌ xí mbáa naꞌthánlaꞌ rí mu̱dríguíilaꞌ i̱mba̱a̱ꞌ tsí kriꞌkhuii xó rí Xu̱u̱ꞌ Ana̱ꞌlóꞌ tsí ni̱dríguíilaꞌ máꞌ. Jamí phú gagi máꞌ a̱kia̱nꞌlaꞌ nu̱drígúlaꞌ i̱mba̱ ajngáa máján, rí kriꞌkhu xó rí ni̱drígúlaꞌ máꞌ. 5 Xómáꞌ ikhúúnꞌ tsíju̱mu̱ꞌ rí i̱tha̱án gíꞌdoo numúu̱ ikhii̱n xó rí ikhúúnꞌ, «tsí waxúngui̱inꞌ mbo̱ na̱ma̱ñúú mi̱ndaꞌkho» kuaꞌdiinlaꞌ a̱ꞌkhue̱n. 6 Maske máꞌ gakon rí tsíma̱ñuꞌ gátha̱n mújúnꞌ ná inúú xa̱bo̱, ra̱ꞌkhá máꞌ rúꞌkhue̱n iꞌthán rí nda̱a̱ rí i̱ma̱ñuꞌ mangaa. Jamí ikháanꞌlaꞌ ndu̱ya̱á májánlaꞌ mbá xúgíí rúꞌkhue̱n, ga̱jma̱á majñu̱u̱ mbá xúgíí rí ne̱ne̱xo̱ꞌ ná inalaꞌ.

7 Náá rí ra̱máján ne̱ne̱ róꞌ. Ikhúúnꞌ táru̱máaꞌlaꞌ nitháan nákhí ni̱tha̱n-ráꞌalaꞌ ajngáa máján drígo̱o̱ Ana̱ꞌlóꞌ. Ni̱xrígú-mina̱ꞌ kajngó ma̱gi̱ꞌdoo numalaꞌ ikháanꞌlaꞌ. 8 Ni̱rígú-jáꞌñúú mbúkha̱a̱ i̱ꞌwíin kuthuun tsí nanimbu̱únꞌ juyáá Jesús, numuu rí ni̱gruígú rí nune̱ numuꞌ kajngó ma̱xtáá rí ma̱ne̱-mba̱ꞌwáanꞌlaꞌ ikháanꞌlaꞌ. 9 Maske máꞌ ndiꞌyóꞌ rí ma̱xtáá-muꞌ nákhí rí nixtáá ga̱jma̱á nindxa̱ꞌlaꞌ, táne̱-gajmúu asndo nimbáa rí maxníꞌ ne̱. Numuu rí a̱ngia̱nꞌlóꞌ tsí niguwá ná numbaa Masedónia̱ nixniꞌ rí ndiꞌyóꞌ. Ni̱ꞌgí-mina̱ꞌ rí ma̱xáne̱-gajmálaꞌ asndo nitháan, jamí xkuaꞌnii máꞌ na̱ꞌgí-mina̱ꞌ asndo xúge̱ꞌ. 10 Xómá gakon rí ríga̱ ajngóo Krísto̱ ná awúun a̱kui̱nꞌ, xkuaꞌnii máꞌ gakon i̱tha̱nꞌlaꞌ rí asndo nimbáa tsí xtáa ná numbaa Akáya̱ ma̱xárígú-jáꞌyúꞌ gagi ríge̱ꞌ rí gúꞌdo̱ꞌ ga̱jma̱á numuu rí na̱ne̱lo̱ꞌ. 11 Náá numuu kajngó xkuaꞌnii i̱tha̱n róꞌ. Numuu rí tsíyoꞌ ja̱ya̱ꞌlaꞌ ráanꞌ. Ndaꞌyoo Ana̱ꞌlóꞌ rí nandoꞌ ja̱ya̱ꞌlaꞌ.

12 Xómáꞌ ikhúúnꞌ ma̱ne̱ máꞌ xómá rí na̱ne̱ asndo xúge̱ꞌ, kajngó ma̱xágoo rí mune̱-tsiꞌyá xa̱bo̱ tsúꞌkhue̱n, ni máꞌ mu̱xúne̱ mbrígu-mijnée̱ ga̱jma̱á nindxa̱ꞌxo̱ꞌ. 13 Numuu rí xa̱bo̱ tsúꞌkhue̱n nune̱-nduwee̱ rí waxúnguii̱nꞌ neꞌne Krísto̱. Yumbáá tsí nu̱drígú-jáꞌñúú xa̱bo̱ ga̱jma̱á majñu̱u̱ rí mi̱nduwa ñajúu̱n, tsí na̱ka̱ma̱xu̱ún rí waxúngui̱inꞌ neꞌne Krísto̱. 14 Jamí na̱nguá máꞌ gíꞌmaa rí ma̱makualóꞌ gáꞌne rúꞌkhue̱n, numuu rí jmína̱a̱ꞌ máꞌ Satanás naꞌne-mine̱e̱ꞌ xómá ánje̱l tsí nambiꞌi-taꞌaa mangaa̱. 15 Ikhaa jngó, na̱nguá máꞌ gíꞌmaa rí ma̱makualóꞌ xí yumbée̱ nune̱-máján-mijnée̱ mangii̱n xómá xa̱bo̱ tsí nune̱ rí máján. Xómáꞌ ikhii̱n mu̱dríguíi̱ jamínu̱ꞌ xómá jaꞌyoo rí nini̱i̱.

16 Na̱tha̱nꞌlaꞌ mbu̱júꞌ: Asndo nimbáa ma̱xáju̱mu̱u̱ rí najmiyuꞌ. I̱ndo̱ó máꞌ xí na̱ju̱ma̱ꞌlaꞌ rí gakon rí najmiyuꞌ rá mbo̱ꞌ, gu̱ni̱ꞌñúꞌlaꞌ rí ma̱tha̱nꞌlaꞌ xómá xa̱bo̱ tsí najmiyuu xúꞌkhue̱n rá, kajngó ma̱ku̱xí-mina̱ꞌ mbá lájwíin wáa mangúúnꞌ. 17 Ído̱ na̱tha̱nlo̱ꞌ rí phú ríga̱ rí ma̱ku̱xí-mina̱ꞌ ga̱jma̱á numuu mangúúnꞌ, tsítha̱nlo̱ꞌ xómá rí nandoo Táta̱, rí na̱tha̱n xómá mbáa xa̱bo̱ tsí najmiyuu. 18 Numuu rí phú mbaꞌiin xa̱bo̱ na̱ni̱gu̱ún rí mune̱-tsiꞌyá ga̱jma̱á numuu rí nune̱ ná numbaa, ikhaa jngó ma̱goo máꞌ ma̱ne̱-tsiꞌyá mangúúnꞌ. 19 Numuu rí ikháanꞌlaꞌ ñajwanlaꞌ xa̱bo̱ tsí phú na̱ma̱ñúú mi̱ndaꞌkho, ikhaa jngó phú gagi a̱kia̱nꞌlaꞌ nu̱drígúunlaꞌ xa̱bo̱ tsí najmiñúú. 20 Na̱ꞌngo̱o̱ guéño máꞌ a̱kia̱nꞌlaꞌ ju̱ñu̱ú tsí nuxna-ñajwanlaꞌ asndo xómá rí yumbáá tsí waꞌtsi̱in ñajwanlaꞌ, tsí naꞌpho̱-jaꞌyálaꞌ, tsí nune̱-ku̱ꞌwálaꞌ ga̱jma̱á majñu̱u̱ mi̱nduwa, tsí nu̱xu̱xí-mijná ná inalaꞌ, jamí tsí nu̱xpa̱thún inalaꞌ. 21 Phú mate̱ꞌ inuꞌ na̱tha̱nꞌlaꞌ rí ikháanꞌxo̱ꞌ táꞌngo̱o̱ a̱kia̱nꞌxo̱ꞌ rí mu̱ña̱ꞌlaꞌ xkuaꞌnii, numuu rí phú wabáanꞌxo̱ꞌ.

Xí i̱ꞌwíin tsíti̱ñu̱ú rí mune̱-mba̱a̱-mijná, ma̱goo máꞌ ma̱ne̱-mba̱a̱-mina̱ꞌ mangúúnꞌ, maske máꞌ na̱tha̱n xómá xa̱bo̱ tsí najmiyuu. 22 Á xa̱bo̱ ebréo̱ ñajúu̱n ikhii̱n dxe̱ꞌ. Ikhaa máꞌ ñajunꞌ mangúúnꞌ. Á xa̱bi̱i Israél ñajúu̱n ikhii̱n dxe̱ꞌ. Ikhaa máꞌ ñajunꞌ mangúúnꞌ. Á xa̱bo̱ ri̱jyu̱u̱ꞌ Abraám ñajúu̱n ikhii̱n dxe̱ꞌ. Ikhaa máꞌ ñajunꞌ mangúúnꞌ. 23 Á yumbée Krísto̱ ñajúu̱n ikhii̱n dxe̱ꞌ. I̱tha̱án máꞌ yumbée Krísto̱ ñajunꞌ ikhúúnꞌ xó rí ikhii̱n, maske máꞌ xómá eꞌne xa̱bo̱ tsí najmiyuu e̱ne̱ rí na̱tha̱n ríge̱ꞌ. Numuu rí i̱tha̱án máꞌ ni̱ñajun ikhúúnꞌ xó rí ikhii̱n, i̱tha̱án máꞌ mbaꞌa nothon waxpáthúún ikhúúnꞌ, i̱tha̱án máꞌ mbaꞌa nothon nikalo̱ꞌ géjwa̱nꞌ ikhúúnꞌ, jamí phú mbaꞌa nothon inu ma̱ja̱ñúꞌlo̱ꞌ. 24 Witsu nothon ni̱xpa̱thúún mi̱ndaꞌkho xa̱bo̱ judío̱, rí mbá skíñú gu̱wa̱ꞌ-nítsu i̱kho̱ (39) ni̱xpa̱thii̱n tsu̱du̱ꞌ mbámbá miꞌtsú. 25 Atsú nothon nixniꞌ ga̱jma̱á ixe̱. Mbá miꞌtsú waꞌxnúꞌ ga̱jma̱á itsí asndo ma̱ja̱ñúꞌ. Atsú nothon ni̱rmáꞌán jagu̱ún guꞌwá-rguwa. Mbá miꞌtsú nindáti̱gu̱ún mbá mbiꞌi jamí mbá mbroꞌon ná awúun iya a̱pha̱. 26 Phú ningrigo̱ꞌ, ge̱e̱ ñúꞌún nikalo̱ꞌ. Ninújngoꞌ ná ngamí ma̱ꞌga jañúú mañuu, jamí ná ngamí ma̱ngujwíin ku̱ꞌwá inuꞌ. Nixtáá ngamí rí ma̱ja̱ñúꞌ gúne̱ xa̱bo̱ judío̱, jamí xa̱bo̱ tsí ra̱ꞌkháa judío̱ ñajúún. Xúꞌkhue̱n máꞌ nixtáá ngamí rí ma̱ja̱ñúꞌ ná xuajen, ná xanáá, ná awúun iya a̱pha̱, jamí ído̱ rí nixtáá ná majñu̱ú xa̱bo̱ tsí mi̱nduwiin rí xa̱bi̱i Ana̱ꞌlóꞌ ñajúún. 27 Phú gakhe̱ ni̱ñajunlo̱ꞌ jamí phú gakhe̱ nika-ranújngoꞌlo̱ꞌ. Phú mbaꞌa mbroꞌon ni̱xpígaalo̱ꞌ ninu. Phú mbaꞌa nothon ni̱xki̱dxu̱ꞌ jamí nijándawoꞌ. Phú mbaꞌa miꞌtsú tákuéꞌtsólo̱ꞌ, jamí nijrámu̱ꞌ numuu rí nda̱a̱ xtíin ma̱ju̱wúnꞌlo̱ꞌ. 28 Mbáá máꞌ rí nika-ranújngoꞌ mbá xúgíí rúꞌkhue̱n, i̱mba̱ rí naka-ranújngoꞌ xúge̱ꞌ, tsitsíí naxná-gamiéjunꞌ eꞌne mbá xúgíí kuthuun tsí nanimbu̱únꞌ juyáá Jesús. 29 Xí mbáa najáñuu, asndo xó rí ikhúúnꞌ máꞌ najáñuꞌ. Xí mbáa naꞌne rí ma̱ꞌne aꞌkhán dxájuu, phú na̱ti̱yu̱ꞌ jamí phú najiꞌnúú.

30 Xí ndaꞌyóo rí ma̱ku̱xí-mina̱ꞌ, ma̱ku̱xí-mina̱ꞌ ga̱jma̱á numuu rí wabúúnlo̱ꞌ. 31 Ana̱ꞌlóꞌ ndaꞌyoo rí tsíne̱-ndúwalo̱ꞌ. Ikhaa̱ ñajuu̱n Anu̱u̱ Tátiálóꞌ Jesukrísto̱, tsí jámuu mbiꞌi jaꞌyoo rí ma̱gu̱ma-mba̱a̱. 32 Nákhí nika ná Damásko̱, xa̱bo̱ ñajun tsí nithán-ñájwíín eꞌne thúngaa Aréta̱s, nixná-ñájwii̱n rí ma̱wa̱jún xa̱bo̱ tsí juda ajwa̱nꞌ ná xkrugua rawuun xuajen, kajngó ma̱goo mu̱rtuwúu̱n. 33 I̱ndo̱ó máꞌ numuu rí mbá tikhuun xa̱bo̱ ni̱ra̱khúu̱n ná awúun mbá extu, jamí ni̱xrígúu̱n ná iduu xu̱nꞌ rí narugua-maꞌáan xuajen. Xkuaꞌnii nijríñu̱ú ná ñawúun xa̱bo̱ ñajun.