Xa̱bo̱ Galásia̱ 4

4 Jamí ído̱ ni̱ga̱nú mbiꞌi rí niꞌgí Ana̱ꞌlóꞌ rá, a̱ꞌkhue̱n nixuꞌmaa̱ A̱dée̱ ná numbaa ríge̱ꞌ. Ni̱gu̱maa̱ neꞌne mbáa a̱ꞌgo̱, jamí nixtáa̱ xómá rí naꞌthán xtángoo. 5 Ikhaa jngó, ndiyoo neꞌtse̱-ri̱ñáaꞌlóꞌ tsáanꞌ nijuwa-ru̱ꞌne̱-mbáníílóꞌ xtángoo, kajngó maguáanꞌlóꞌ Ana̱ꞌlóꞌ rí ma̱nindxa̱ꞌlóꞌ i̱jii̱n. 6 Rí xúge̱ꞌ rá, i̱ji̱in Ana̱ꞌlóꞌ ñajwanlóꞌ, jamí ikhaa̱ nixuꞌmaa̱ Xu̱u̱ꞌ A̱dée̱ rí ma̱xtáa ná awúun a̱kia̱nꞌlóꞌ. Xe̱ꞌ tsúꞌkhue̱n naꞌne rí mu̱ꞌtháánlóꞌ Ana̱ꞌlóꞌ: «¡Táa, ikháánꞌ ñajwaanꞌ Ana̱ꞌxo̱ꞌ!». 7 Ikhaa jngó, nákha máꞌ yumbáá tsí waꞌtsi̱in ñajwanlaꞌ rí xúge̱ꞌ rá, rí i̱ji̱in Ana̱ꞌlóꞌ ñajwanlaꞌ, jamí mangaa máꞌ tsí mu̱drígúu rí gíꞌdoo Ana̱ꞌlóꞌ ñajwanlaꞌ ga̱jma̱á majñu̱u̱ Krísto̱.*4.7 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «ga̱jma̱á majñu̱u̱ Krísto̱».