1 »Na̱tha̱nꞌlaꞌ mbá xúgíí ríge̱ꞌ kajngó mu̱xúni̱ꞌñáá-ranimba̱ꞌlaꞌ ju̱yo̱ꞌ. 2 Mu̱xkawiáanꞌlaꞌ ná awúun mbámbá guꞌwá rí na̱gi̱mbíin xa̱bo̱ judío̱. Jamí ma̱ga̱nú mbiꞌi rí asndo tsáa máꞌ tsí maxíñáaꞌlaꞌ ma̱ju̱mu̱u̱ rí ñajuun Ana̱ꞌlóꞌ iꞌnii̱. 3 Xkuaꞌnii gúña̱ꞌlaꞌ numuu rí tsíne̱-nuwii̱n Tátéꞌ ni máꞌ ikhúúnꞌ. 4 Wapha máꞌ i̱tha̱nꞌlaꞌ ríge̱ꞌ, kajngó ído̱ gága̱nú mbiꞌi rúꞌkhue̱n ma̱rmáꞌáan a̱kia̱nꞌlaꞌ rí ni̱tha̱nꞌlaꞌ máꞌ rí ma̱ri̱gá. Tátha̱nꞌlaꞌ ríge̱ꞌ nákhí rí ginii, numuu rí ikhúúnꞌ máꞌ xtáá ga̱jma̱á nindxa̱ꞌlaꞌ xúꞌkhue̱n.

5 »Xómáꞌ xúge̱ꞌ rá, naka̱aꞌlo̱ꞌ ná inuu tsí nixúngu̱únꞌlo̱ꞌ, jamí nimbáa tsí ikháanꞌlaꞌ tsíraxu̱ꞌ: "Náá idxo̱ꞌ róꞌ". 6 A̱ꞌkhue̱n gakon, phú mingíná a̱kia̱nꞌlaꞌ neꞌne numuu rí ni̱tha̱nꞌlaꞌ ríge̱ꞌ. 7 Na̱tha̱nꞌ-jmbalaꞌ rí phú i̱tha̱án máján gájuwalaꞌ xí ma̱ꞌgáaꞌlo̱ꞌ. Xí tsíka̱aꞌlo̱ꞌ, ma̱xáꞌkha̱ tsí maꞌthán-mbáá numalaꞌ, jamí xí naka̱aꞌlo̱ꞌ rá, ma̱xu̱ꞌmáa̱ ma̱ꞌkhe̱e̱ ma̱xtáa̱ ga̱jma̱á nindxa̱ꞌlaꞌ. 8 Ído̱ gáꞌkhe̱e̱ ikhaa̱, masngájmee̱ rí na̱ngra̱ꞌiin xa̱bo̱ ga̱jma̱á numuu aꞌkhán, ga̱jma̱á numuu rí máján jamí ga̱jma̱á numuu rí ma̱to̱ꞌo̱o̱ awan numúú xa̱bo̱. 9 Xu̱u̱ꞌ Ana̱ꞌlóꞌ masngájmúú xa̱bo̱ rí ikhii̱n gíꞌmii̱ aꞌkhán, ga̱jma̱á numuu rí tsínimbúu̱n juyeꞌ ikhúúnꞌ. 10 Xúꞌkhue̱n máꞌ ikhaa̱ masngájmee̱ rí na̱ngra̱ꞌiin xa̱bo̱ ga̱jma̱á numuu rí máján, numuu rí ikhúúnꞌ naka̱aꞌlo̱ꞌ ná xtáa Tátéꞌ, jamí náxúyo̱ꞌlaꞌ. 11 Jamí Xu̱u̱ꞌ Ana̱ꞌlóꞌ masngájma rí ma̱to̱ꞌo̱o̱ awan ga̱jma̱á numúú xa̱bo̱, numuu rí Ana̱ꞌlóꞌ nixudaa máꞌ awan ga̱jma̱á numuu tsí naꞌthán-ñájun ná numbaa ríge̱ꞌ.

12 »Phú mbaꞌa xóó rí gúꞌdo̱ꞌ ma̱tha̱nꞌlaꞌ, i̱ndo̱ó máꞌ numuu rí ma̱xáfraꞌa̱ꞌlaꞌ rí xúge̱ꞌ xí ma̱tha̱nꞌlaꞌ ne̱. 13 Ído̱ gáꞌkha̱ Xu̱u̱ꞌ Ana̱ꞌlóꞌ, ikhaa̱ masngájmalaꞌ rí gakon, jamí mbayée̱ ikhalaꞌ kajngó mu̱ne̱-nuwiinlaꞌ mbá xúgíí rí gakon. Numuu rí ma̱xáyée̱ idxu̱u̱ ikhaa̱ rí maꞌthée̱n, rí maꞌthée̱n mbá xúgíí rí nadxawuu̱n jamí ma̱ꞌnii̱ rí mbu̱ya̱álaꞌ rí ma̱ri̱gá nda̱wa̱á. 14 Ikhaa̱ ma̱grui̱guíi̱ rí na̱tha̱nlo̱ꞌ jamí maꞌthán-wíi̱ ne̱ inalaꞌ. Xkuaꞌnii gáꞌnii̱ kajngó mbaya-makuiꞌ. 15 Mbá xúgíí rí gíꞌdoo Tátéꞌ drígo̱ꞌ máꞌ ikhúúnꞌ ñajuun ne̱. Ikhaa numuu rúꞌkhue̱n ni̱tha̱nꞌlaꞌ rí Xu̱u̱ꞌ Ana̱ꞌlóꞌ ma̱grui̱guíi̱ ajngóꞌ, jamí maꞌthán-wíi̱ ne̱ inalaꞌ.

16 »I̱mbá lájwíin xóó xtáá ga̱jma̱á nindxa̱ꞌlaꞌ, a̱ꞌkhue̱n rí náxúyo̱ꞌlaꞌ. Jamí i̱mbá lájwíin nda̱wa̱á, a̱ꞌkhue̱n mbu̱yo̱ꞌlaꞌ mbu̱júꞌ, numuu rí ikhúúnꞌ naka̱aꞌlo̱ꞌ ná xtáa Tátéꞌ.*

17 A̱ꞌkhue̱n ni̱ra̱xe̱-mijná mbá tikhuun tsí naꞌsngúu̱n: «Dí ñajuun iyoo̱ gáꞌthánlóꞌ ga̱jma̱á ríge̱ꞌ róꞌ. Naꞌthánlóꞌ: "I̱mbá lájwíin xóó xtáá ga̱jma̱á nindxa̱ꞌlaꞌ, a̱ꞌkhue̱n rí náxúyo̱ꞌlaꞌ", jamí naꞌthánlóꞌ: "I̱mbá lájwíin nda̱wa̱á, a̱ꞌkhue̱n mbu̱yo̱ꞌlaꞌ mbu̱júꞌ". Xúꞌkhue̱n máꞌ naꞌthánlóꞌ: "Numuu rí ikhúúnꞌ naka̱aꞌlo̱ꞌ ná xtáa Tátéꞌ"». 18 Jamí nu̱ra̱xe̱-mijnée̱ máꞌ xúꞌkhue̱n: «Dí ñajuun iyoo̱ gáꞌthée̱n ga̱jma̱á rí "i̱mbá lájwíin" róꞌ. Tsífraꞌa̱ꞌlóꞌ rí naꞌthée̱n».

19 Jamí Jesús ndiꞌyoo rí nandúu̱n gúra̱xíi̱ ga̱jma̱á numuu ríge̱ꞌ. Ikhaa jngó niraxúu̱n:

—Á nu̱ra̱xe̱-mijnálaꞌ dí iyoꞌ gátha̱n ga̱jma̱á numuu ríge̱ꞌ dxe̱ꞌ: "I̱mbá lájwíin xóó xtáá ga̱jma̱á nindxa̱ꞌlaꞌ, a̱ꞌkhue̱n rí náxúyo̱ꞌlaꞌ", jamí "i̱mbá lájwíin nda̱wa̱á, a̱ꞌkhue̱n mbu̱yo̱ꞌlaꞌ mbu̱júꞌ". 20 Na̱tha̱nꞌ-jmbalaꞌ rí mu̱mbi̱ya̱ꞌlaꞌ jamí ma̱juwa-jínálaꞌ, xómáꞌ xa̱bo̱ numbaa ma̱ju̱wée̱ꞌ gagi. Maske máꞌ ma̱juwa-jínálaꞌ, ikhaa rúꞌkhue̱n ma̱taxi̱i ma̱ꞌne gagi a̱kia̱nꞌlaꞌ. 21 Ído̱ naꞌne xuajen mbáa a̱ꞌgo̱, na̱gi̱ꞌdoo̱ gaꞌkho̱ numuu rí ni̱ga̱nú máꞌ mbiꞌi. Jamí nda̱wa̱á, ído̱ rí ni̱gu̱maa máꞌ ada̱, nambumuu̱ rí phú gakhe̱ niꞌkho̱ numuu nadxuu̱ rí ni̱gu̱maa̱ i̱mba̱a̱ꞌ xa̱bo̱ numbaa. 22 Xkuaꞌnii máꞌ igíꞌníí mangáanꞌlaꞌ: Rí xúge̱ꞌ juwa-jínálaꞌ. Xómáꞌ ikhúúnꞌ mba̱ya̱ꞌlaꞌ mbu̱júꞌ, a̱ꞌkhue̱n rí phú ma̱ꞌdxu a̱kia̱nꞌlaꞌ, jamí ndawa̱a̱ tsí gáꞌngo̱o̱ marígú-jáꞌyálaꞌ gagi rúꞌkhue̱n. 23 Ído̱ gága̱nú mbiꞌi rúꞌkhue̱n náxúra̱xu̱ꞌlaꞌ nimbá. Na̱tha̱nꞌ-jmbalaꞌ rí mbá xúgíí rí mu̱nda̱ꞌa̱álaꞌ Tátéꞌ ga̱jma̱á numuꞌ ikhúúnꞌ, maxnálaꞌ ne̱. 24 Asndo mbiꞌi ríge̱ꞌ nimbá rí xóó túnda̱ꞌa̱laꞌ ga̱jma̱á numuꞌ ikhúúnꞌ. Gu̱nda̱ꞌa̱laꞌ kajngó ma̱janálaꞌ, xkuaꞌnii kajngó ma̱ꞌne jañii rí nadxu a̱kia̱nꞌlaꞌ.

25 »Mbá xúgíí ríge̱ꞌ ni̱tha̱nꞌlaꞌ ga̱jma̱á majñu̱u̱ ajngáa xkri̱da. Jamí ma̱ga̱nú mbiꞌi rí náxátha̱nꞌlaꞌ ga̱jma̱á majñu̱u̱ ajngáa xkri̱da, rí mbá jaꞌwu máꞌ gátha̱nꞌlaꞌ ga̱jma̱á numuu Tátéꞌ. 26 Ído̱ gága̱nú mbiꞌi rúꞌkhue̱n mu̱nda̱ꞌa̱álaꞌ Tátéꞌ ga̱jma̱á numuꞌ ikhúúnꞌ. Jamí na̱tha̱nꞌlaꞌ rí náxáꞌyóo máꞌ rí ikhúúnꞌ ma̱tha̱n-jáñuu Tátéꞌ ga̱jma̱á numalaꞌ, 27 numuu rí jmína̱a̱ꞌ máꞌ Tátéꞌ nandoo jaꞌyalaꞌ. Nandoo̱ jaꞌyalaꞌ numuu rí nandalaꞌ ju̱yo̱ꞌ, jamí ninimba̱ꞌlaꞌ rí Ana̱ꞌlóꞌ nixúngu̱únꞌlo̱ꞌ. 28 Ikhúúnꞌ nigájnuꞌ ná xtáa Tátéꞌ rí ma̱ꞌkha ná numbaa ríge̱ꞌ. Rí xúge̱ꞌ rá, na̱ni̱ꞌñúulo̱ꞌ numbaa jamí naka̱aꞌlo̱ꞌ ná xtáa Tátéꞌ.

29 A̱ꞌkhue̱n nithan tsí naꞌsngúu̱n:

—Xúge̱ꞌ rí narathán-jmbaaꞌ, jamí nánguá máꞌ ijmaaꞌ nimbá ajngáa xkri̱da rá. 30 Xúge̱ꞌ rí ndu̱ya̱áxo̱ꞌ rí nathayáá mbá xúgíí rá, jamí tsíꞌyáaꞌ rí nimbáa xa̱bo̱ maraxa̱a̱ꞌ. Ikhaa numuu rúꞌkhue̱n nanimba̱ꞌxo̱ꞌ rí ná xtáa Ana̱ꞌlóꞌ nigájnaaꞌ nidxa̱ꞌ.

31 A̱ꞌkhue̱n Jesús niriꞌñúu̱:

—Ikhaa jngó nanimba̱ꞌlaꞌ ju̱yo̱ꞌ rí xúge̱ꞌ ráanꞌ. 32 Gu̱dxawíínlaꞌ, ma̱ga̱nú mbiꞌi rí mu̱ga̱yú-raꞌalaꞌ, jamí ikhaa mbiꞌi rúꞌkhue̱n ñajuun xúge̱ꞌ. Mbámbáa ma̱ꞌga̱a guꞌwóo, xómáꞌ ikhúúnꞌ mu̱ni̱ꞌñúꞌlaꞌ mbáwúún. Maske máꞌ mu̱ni̱ꞌñúꞌlaꞌ, na̱nguá xtáá mbáwúúnlo̱ꞌ, numuu rí Tátéꞌ xtáa ga̱jma̱á nindxu̱ꞌlo̱ꞌ. 33 Ikhúúnꞌ ni̱tha̱nꞌlaꞌ mbá xúgíí ríge̱ꞌ numuu nandoꞌ rí mu̱xkamaalaꞌ tsímáá ga̱jma̱á nindxu̱ꞌ ikhúúnꞌ. Maske máꞌ ná numbaa ríge̱ꞌ mu̱míni̱ílaꞌ, ma̱xámíñalaꞌ, rí gu̱xna̱-míjnálaꞌ tsiakhe̱. ¡Ikhúúnꞌ ni̱ꞌngo̱ꞌlo̱ꞌ inuu numbaa!