1 I̱mbá atsú mbiꞌi nda̱wa̱á, a̱ꞌkhue̱n niríga̱ mbá ndxa̱a̱ tsigúún ná xuajen Kaná, rí ꞌgí ná numbaa Galiléa̱. Ikhín ni̱ka̱ nánée Jesús. 2 Waꞌtháán máꞌ Jesús rí ma̱ꞌga mangaa ná ndxa̱a̱ tsigúún gajmíi̱ tsí naꞌsngúu̱n, ikhaa jngó ni̱ke̱e̱ gajmíi̱. 3 Awúun máꞌ rí gachúún xa̱bo̱ ná ndxa̱a̱, wámba̱ iyoo úba̱ rí ni̱ga̱yu̱u̱ꞌ, a̱ꞌkhue̱n niꞌthán nánée Jesús:

—Nánda̱a̱ iyoo úba̱ rí ni̱ga̱yu̱u̱ꞌ ini̱i̱.

4 Xómáꞌ Jesús niriꞌñuu̱ nánée̱:

—Nána̱, dí lá i̱yo̱o̱ ikhúúnꞌ rúꞌkhue̱n rá. Xóó máꞌ tága̱nú mbiꞌi rí ma̱kujma tsáa ñajunꞌlo̱ꞌ.

5 A̱ꞌkhue̱n niꞌthán nánée Jesús, niꞌthúu̱n tsí nune̱-mba̱ꞌwi̱in xa̱bo̱ ná ndxa̱a̱ tsigúún: «Gu̱ne̱laꞌ mbá xúgíí rí maꞌthánlaꞌ ikhaa̱».

6 Ikhín wájun mbá majun daan itsí rí najno̱ꞌ iya jaꞌwu rí najmúú xa̱bo̱ judío̱ rí mune̱-jaꞌwu-mijnáa. Naꞌne máꞌ xí mbá witsu skíñú (100) lítro̱ wáa iya najno̱ꞌ awúun mbámbá daan rúꞌkhue̱n. 7 Xómáꞌ Jesús niꞌthúu̱n tsí nune̱-mba̱ꞌwu̱un xa̱bo̱ ná ndxa̱a̱: «Gu̱ne̱-majni̱ílaꞌ iya awúun mbámbá daan raya».

Jamí tsí nune̱-mba̱ꞌwu̱un xa̱bo̱ nene̱-majníi̱ iya asndo ná rawuun daan raya. 8 A̱ꞌkhue̱n Jesús niꞌthúu̱n tsí nune̱-mba̱ꞌwu̱un xa̱bo̱ ná ndxa̱a̱: «Gu̱ríya̱ꞌlaꞌ tháan iya rúꞌkhue̱n rá, aꞌgua ju̱ya̱ꞌlaꞌ ne̱ ná inuu yumbáá tsí na̱ru̱thuun ñajun ná ndxa̱a̱». Jamí xkuaꞌnii nini̱i̱.

9 Xómáꞌ yumbáá tsí na̱ru̱thuun ñajun ná ndxa̱a̱ niꞌña̱a̱ mbá lájwíin iya rí niꞌni̱i iyoo úba̱ rí ni̱ga̱yu̱u̱ꞌ. Ikhaa̱ táꞌyoo̱ náá nigájnuu ne̱, rí i̱ndo̱ó máꞌ tsí nune̱-mba̱ꞌwu̱un xa̱bo̱ ndiyáá. A̱ꞌkhue̱n rí yumbáá tsí na̱ru̱thuun ñajun nindxaꞌwóo̱ xa̱bo̱ tsí nanigúún, 10 jamí niꞌthúu̱n: «Táta̱, mbá xúgíin xa̱bo̱ nu̱xu̱da̱a̱ꞌ iyoo úba̱ rí ni̱ga̱yu̱u̱ꞌ rí i̱tha̱án máján rí ginii, jamí asndo nda̱wa̱á jayu nu̱xu̱da̱a̱ꞌ rí ngíná máwáa, ído̱ rí niꞌwa̱a̱n guéño máꞌ xa̱bo̱. Xómáꞌ ikháánꞌ rá, nitatsíñáá iyoo úba̱ rí ni̱ga̱yu̱u̱ꞌ rí i̱tha̱án máján asndo nda̱wa̱á jayu».

11 Jesús neꞌne timbá rí phú wáá ríge̱ꞌ ná Kaná, rí ꞌgí ná numbaa Galiléa̱. Xkuaꞌnii nisngájmee̱ rí phú mba̱a̱ tsiakhe̱ gíꞌdoo̱, jamí tsí naꞌsngúu̱n ninimbu̱únꞌ juyáa̱.

12 Nda̱wa̱á a̱ꞌkhue̱n ni̱ka̱ Jesús ná xuajen Kapernaúm ga̱jmáa̱ nánée̱, gajmíi̱ dxíyo̱o̱, jamí tsí naꞌsngúu̱n. Jamí tájúwée̱ꞌ máꞌ mba̱yo̱ꞌ ikhín.

13 Ído̱ nangiyuu máꞌ ndxa̱a̱ Páskua̱ rí nune̱-ri̱ya̱aꞌ xa̱bo̱ judío̱, a̱ꞌkhue̱n nitsimuu Jesús ni̱ka̱ ná Jerusalén. 14 Ná rixo̱o̱ guꞌwá dxákuun ndiꞌñúu̱ tsí nu̱ngu̱jwi̱in xu̱kú: xede̱, xu̱kú mogo̱ jamí rigu. Xúꞌkhue̱n máꞌ ndiꞌñúu̱ tsí nu̱riꞌkhuíí mbúkha̱a̱ trigi̱in ikhín. 15 Ído̱ ndiꞌyoo Jesús rúꞌkhue̱n, a̱ꞌkhue̱n ni̱smi̱go̱o̱ mbá ñuu, nixkawíi̱n mbá xúgíi̱n gajmíi̱ xu̱kú moguíi̱n jamí xidíi̱n. Nistríguíi̱ mbayíí mbúkhu̱ún tsí nu̱riꞌkhuíí mbúkha̱a̱, jamí nirngáxi̱i̱ xapa nakhú drígúu̱n. 16 Xómáꞌ tsí nu̱ngu̱jwi̱in rigu niꞌthúu̱n: «Gu̱rawíinlaꞌ xu̱kú tsúꞌkhue̱n ge̱jyoꞌ. ¡Mu̱xúne̱laꞌ xuáá ná awúun guꞌwóo Tátéꞌ!».

17 A̱ꞌkhue̱n ni̱rmáꞌáan a̱kui̱ín tsí naꞌsngúu̱n rí xkuaꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Ga̱jma̱á numuu rí phú na̱nga̱jo̱ꞌ guꞌwáaꞌ, rúꞌkhue̱n ma̱ꞌne rí ma̱mbúún».*

18 Xómáꞌ xa̱bo̱ ñajun judío̱ ni̱ra̱xíi̱ Jesús:

—Náá rí phú wáá gátha̱ne̱ kajngó mbu̱ya̱áxo̱ꞌ rí ikháánꞌ jaꞌyaaꞌ ma̱tha̱ne̱ rí nithane̱ ge̱jyoꞌ rá.

19 A̱ꞌkhue̱n niriꞌña Jesús:

—Gu̱rngudi̱ilaꞌ guꞌwá dxákuun ríge̱ꞌ, jamí ikhúúnꞌ ma̱ku̱xíi ne̱ mbu̱júꞌ awúun rí atsú mbiꞌi.

20 A̱ꞌkhue̱n nithan xa̱bo̱ ñajun judío̱:

—A̱jma̱ skíñú majun (46) tsigu ni̱gu̱ma guꞌwá dxákuun ríge̱ꞌ, jamí ikháánꞌ ma̱tha̱ni̱i ne̱ awúun rí atsú mbiꞌi ráanꞌ.

21 Xómáꞌ Jesús naꞌthán ga̱jma̱á numuu guꞌwá dxákuun rí ñajuun xuyuu̱ máꞌ ikhaa̱. 22 Ikhaa jngó ído̱ ndiyáa̱ mbiꞌyuu̱, tsí niꞌsngúu̱n ni̱rmáꞌáan a̱kui̱ín rí niꞌthée̱n ríge̱ꞌ. A̱ꞌkhue̱n ninimbúu̱n juyáa̱ i̱yi̱i̱ꞌ ajngóo Ana̱ꞌlóꞌ jamí rí niꞌthán máꞌ Jesús mangaa.

23 Awúun mbiꞌi rí xtáa̱ Jesús ná Jerusalén, nákhí nigájnuu ndxa̱a̱ Páskua̱, maphú mbaꞌiin xa̱bo̱ ninimbu̱únꞌ juyáa̱ ído̱ ndiyáa̱ rí phú wáá rí naꞌnii̱. 24 Xómáꞌ Jesús tsínimbo̱o̱ꞌ jaꞌñúu̱ numuu rí naꞌne-nuwii̱n mbá xúgíin xa̱bo̱. 25 Na̱nguá iꞌyóo̱ rí mi̱ꞌtháa̱n xáne jaꞌñúú xa̱bo̱, numuu rí jmína̱a̱ꞌ máꞌ ndaꞌyoo̱ rí ríga̱ ná awúun a̱kui̱in mbámbáa xa̱bo̱.