1 Nákhí mbiꞌi rí ñúꞌún, nixná-ñájun Augústo̱ Sésa̱r, thúngaa tsí naꞌthán-ñájuun mbá xúgíí numbaa Róma̱, rí ma̱ta̱ꞌa̱a mbiꞌñúú mbá xúgíin xa̱bo̱ ná awúun i̱yi̱i̱ꞌ. 2 Ríge̱ꞌ ñajuun timbá miꞌtsú rí ni̱ta̱ꞌa̱a mbiꞌñúú xa̱bo̱ ná awúun i̱yi̱i̱ꞌ nákhí rí Sirénio̱* ninindxu̱u̱ xa̱bo̱ ñajun ná numbaa Síria̱. 3 Mbámbáa xa̱bo̱ na̱ka̱a ná xuajñuu rí ma̱ta̱ꞌa̱a mbiꞌyuu ná awúun i̱yi̱i̱ꞌ. 4 Ikhaa jngó nigájnuu José ná xuajen rí mbiꞌyuu Nasarét, rí ꞌgí ná numbaa Galiléa̱. Ni̱ke̱e̱ ná xuajen rí mbiꞌyuu Belén, rí ꞌgí ná numbaa Judéa̱, numuu rí ikhín xuajñuu Dabíd, tsí xi̱ꞌñú-egoo máꞌ José. 5 Ni̱ke̱e̱ gáxudaa̱ mbiꞌyuu̱ ná awúun i̱yi̱i̱ꞌ ga̱jmáa̱ María̱, numuu rí niꞌkhu̱u̱ máꞌ rí muda-mijnée̱, jamí jago̱-éda máꞌ María̱. 6 Awúun máꞌ rí júwe̱e̱ꞌ ná Belén, ni̱ga̱nú mbiꞌi rí ma̱ꞌne-xuajen María̱. 7 Ikhín niꞌnii̱ a̱dée̱ dxáma tsí ginii, a̱ꞌkhue̱n nimbráꞌaa̱ ga̱jma̱á xtíin jamí nigíwa̱a̱nꞌ ná napeꞌtso-muꞌúún xu̱kú. Numuu rí na̱nguá gaꞌchú awúun guꞌwá ná nawájun xa̱bo̱ rí ma̱wa̱jwíi̱n ikhii̱n.

8 Ikhín máꞌ ná mijngi Belén a̱ꞌkhue̱n gachúún mbá tikhuun waxtú tsí nu̱ña̱wu̱ún xu̱kuíín xanáá mbroꞌon rúꞌkhue̱n. 9 A̱ꞌkhue̱n nda̱a̱ ajngóo nisngájma-mina̱ꞌ mbáa ánje̱l tsí nixúngua̱a̱ꞌ Táta̱ ná inúu̱, jamí nimbiꞌi-taꞌa aguu Táta̱ mbá nawa̱a̱ ná gatii̱n, jamí phú nimíñúu̱. 10 Xómáꞌ ánje̱l niꞌthúún waxtú: «Ma̱xámíñalaꞌ. Mbá ajngáa máján iꞌkha ja̱yo̱ꞌ inalaꞌ, rí ma̱ꞌne rí ma̱ju̱wá phú gagi mbá xúgíin xa̱bo̱ tsí júwa̱ꞌ ná numbaa. 11 Numuu rí mbroꞌon ríge̱ꞌ ni̱gu̱maa ná xuajñuu Dabíd, mbáa tsí ma̱ꞌne-jríñáaꞌlaꞌ, tsí ñajuun Táta̱ Krísto̱. 12 Ríge̱ꞌ masngájmalaꞌ rí gakon rí na̱tha̱nꞌlaꞌ: Mbu̱ya̱álaꞌ mbáa cháña̱ꞌ jambráꞌaa ga̱jma̱á xtíin jamí kua̱ꞌa̱a̱n ná napeꞌtso-muꞌúún xu̱kú».

13 Jamí nda̱a̱ ajngóo nikujmii mbaꞌiin ánje̱l gajmíí ánje̱l tsí ni̱ꞌkha̱ ginii. Xáꞌnii nuthee̱n rí nune̱-mba̱a̱ Ana̱ꞌlóꞌ:

14 «A̱gu̱ma-mba̱a̱ Ana̱ꞌlóꞌ ná mikhuíí,

xómáꞌ xa̱bo̱ tsí nandoo Ana̱ꞌlóꞌ jaꞌñúú, ga̱ju̱wée̱ꞌ tsímáá ná mbayíí ge̱jyoꞌ».

15 Ído̱ nigúun ánje̱l ná mikhuíí, a̱ꞌkhue̱n nithan-mijná waxtú: «Mu̱ꞌgua̱lóꞌ Belén rámá, mu̱ꞌgua̱ gúꞌyáálóꞌ rí niríga̱, rí niꞌthánlóꞌ Táta̱».

16 Ikhaa jngó, mbá nacha̱ máꞌ nigóo̱, jamí ni̱xkamaa̱ María̱ ga̱jma̱á José. Xómáꞌ ada̱ kua̱ꞌa̱a̱n ná napeꞌtso-muꞌúún xu̱kú. 17 Ído̱ ndiyáa̱ ada̱, a̱ꞌkhue̱n nithee̱n rí waꞌthúu̱n neꞌne ánje̱l ga̱jma̱á numuu ada̱ tsúꞌkhue̱n. 18 Mbá xúgíin xa̱bo̱ tsí ni̱dxawíín rí nithan waxtú, maphú nimakúu̱n. 19 Xómáꞌ María̱ na̱gu̱xi̱i mbá xúgíí ríge̱ꞌ ná awúun a̱kuii̱n jamí nandxaꞌwá-mine̱e̱ꞌ ga̱jma̱á numuu ne̱. 20 A̱ꞌkhue̱n nithangi̱in waxtú, nigúu̱n rune̱-mba̱a̱ Ana̱ꞌlóꞌ ga̱jma̱á numuu mbá xúgíí rí ndiyáa̱ jamí rí waꞌthúu̱n. Numuu rí xómá waꞌthúu̱n, xkuaꞌnii máꞌ ndiyáa̱.

21 Ído̱ nirámuu migiñu mbiꞌi rí ni̱gu̱maa ada̱, a̱ꞌkhue̱n ndiyée̱ tsina jndi, jamí nixna-mbiꞌíi̱ Jesús. Numuu rí xkuaꞌnii máꞌ niꞌthán ánje̱l rí ma̱ꞌne mbiꞌyuu̱ asndo nákhí rí xóó na̱nguá gakhuá-éwáa̱n.

22 Ído̱ nirámuu mbiꞌi rí mune̱-jaꞌwu-mijnée̱ xómá rí naꞌthán xtángawoo Moisés, a̱ꞌkhue̱n nigóo̱ juya̱a̱ ada̱ ná Jerusalén kajngó mu̱xna̱xíi̱ inuu Táta̱. 23 Numuu rí xkuaꞌnii ka̱ma naꞌthán ná xtángawoo Táta̱: «Jámba̱a̱ dxáma tsí na̱gu̱maa ginii, i̱ndo̱ó máꞌ Táta̱ jaꞌyoo̱».* 24 Ikhaa jngó ni̱xna̱xíi̱ tsi̱gi̱jña̱ꞌ xómá rí naꞌthán ná xtángawoo Táta̱: «a̱jmi̱i gúgo̱ o a̱jmi̱i rigu».*

25 Nákhí mbiꞌi rí ñúꞌún xtáa mbáa xa̱bo̱ tsí mbiꞌyuu Simeón ná Jerusalén. Simeón ñajuun mbáa xa̱bo̱ májáan, naꞌne-mba̱a̱ Ana̱ꞌlóꞌ, jamí Xu̱u̱ꞌ Ana̱ꞌlóꞌ xtáa ga̱jma̱á nindxu̱u̱. Gíꞌthu̱u̱n rí ma̱ꞌkha̱ tsí ma̱ꞌne-jáwíin xa̱bo̱ Israél, 26 numuu rí wasngájmáa̱ neꞌne Xu̱u̱ꞌ Ana̱ꞌlóꞌ rí ma̱xájáñuu̱ wapha, asndo mba̱ꞌyoo̱ rí ma̱ꞌkha̱ Krísto̱, tsí maxúngua̱a̱ꞌ Táta̱. 27 Ikhaa máꞌ Xu̱u̱ꞌ Ana̱ꞌlóꞌ neꞌne rí mbiꞌi rúꞌkhue̱n, ma̱ꞌga Simeón ná guꞌwá dxákuun. Awúun máꞌ rúꞌkhue̱n ni̱ꞌkha̱ jiꞌyáa ada̱ neꞌne tátée ga̱jma̱á nánée, kajngó mune̱-mbáníi̱ xómá rí naꞌthán xtángoo. 28 A̱ꞌkhue̱n Simeón ni̱grui̱guíi̱ ada̱ ná ñawúu̱n, jamí neꞌne-mba̱a̱ Ana̱ꞌlóꞌ. Xáꞌnii niꞌthée̱n:

29 «Táta̱, nithane̱-mbáníí máꞌ rí nirathúnꞌ rá.

Xúge̱ꞌ rí ma̱goo máꞌ ma̱ta̱tsi̱ꞌñáá yumbiáaꞌ rí ma̱ja̱ñúu tsímáá rá.

30 Numuu rí ndi̱yo̱o̱ máꞌ tsí nitaxúngua̱a̱ꞌ rí ma̱ꞌne-jáwíin xa̱bo̱ rá,

31 tsí nithaꞌgíi rí mbuyáá mbá xúgíin xa̱bo̱ tsí júwa̱ꞌ ná numbaa.

32 Ikhaa̱ ñajuu̱n xómá agu rí nambiꞌñúú mbá xúgíin tsí ra̱ꞌkháa xa̱bo̱ judío̱ ñajúún.

Ga̱jma̱á numuu̱ ikhaa̱ ma̱tu̱xi̱i gamakúún xa̱bo̱ xuajñaaꞌ Israél».

33 A̱ꞌkhue̱n maphú nimakuu José ga̱jma̱á María̱ rí xkuaꞌnii niꞌthán Simeón ga̱jma̱á numuu ada̱. 34 A̱ꞌkhue̱n Simeón neꞌne-tsakun-rámii̱, jamí xáꞌnii niꞌthúu̱n María̱, nánée ada̱: «Ído̱ gáꞌkhi̱i̱ ada̱ tsíge̱ꞌ ma̱ꞌnii̱ rí mbaꞌiin xa̱bo̱ ma̱ga̱jnúu gamakúún jamí mbaꞌiin xa̱bo̱ ma̱gi̱ꞌdoo numúú ná xuajen Israél. Ikhaa̱ masngájmúu̱ xa̱bo̱ rí gakon ga̱jma̱á numuu Ana̱ꞌlóꞌ, xómáꞌ xa̱bo̱ ma̱xáxúún gúyáa̱, 35 kajngó ma̱kujma rí nu̱ndxa̱ꞌwa̱-mijná xa̱bo̱ ná awúun a̱kuíi̱n. Xómáꞌ ikháánꞌ rá nána̱, rúꞌkhue̱n ma̱ꞌne rí asndo xómá chíde̱ ma̱ru̱wa̱nꞌ-jngaa nímia̱aꞌ».

36 Ikhín máꞌ gída̱ꞌ mbáa a̱ꞌgo̱ tsí mbiꞌyuu Ána̱ mangaa, tsí na̱gu̱wíjnga̱a ajngóo Ana̱ꞌlóꞌ. A̱dée xa̱bo̱ tsí mbiꞌyuu Fanuél, xa̱bo̱ ri̱jyu̱u̱ꞌ máꞌ Asér ñajuun a̱ꞌgo̱ tsúꞌkhue̱n, jamí nikhi̱i̱ guéño máꞌ. Nákhí dxáꞌguíi̱ ninújwíi̱n jamí nixtáa̱ ga̱jmáa̱ a̱jmbaa̱ mbá juwan tsigu. 37 Jamí a̱ꞌgóxuáꞌa tsíge̱ꞌ gíꞌdoo mbá akho̱ skíñú i̱kho̱ (84) tsiguu. Jámba̱ miꞌtsú kra̱ꞌaa̱ ná awúun guꞌwá dxákuun. Mbiꞌíí mbruꞌwíín xtáa̱ ná inuu Ana̱ꞌlóꞌ, naꞌne-miꞌkhíi̱ jamí i̱ndo̱ó máꞌ Ana̱ꞌlóꞌ iꞌthán-jáñuu̱. 38 Awúun máꞌ rí na̱gu̱ma-tsakun-rámaa José ga̱jma̱á María̱, ni̱ga̱níi̱ ikhaa̱ jamí niríguu̱ la gamaku inuu Ana̱ꞌlóꞌ. Jamí niꞌthée̱n ga̱jma̱á numuu ada̱ ná inúú xa̱bo̱ tsí guáꞌthi̱ín rí Ana̱ꞌlóꞌ ma̱ꞌne-jáwíin xa̱bo̱ Jerusalén.

39 Ído̱ wámbo̱o̱ José ga̱jma̱á María̱ nene̱-mbáníi̱ mbá xúgíí rí naꞌthán ná xtángawoo Táta̱, a̱ꞌkhue̱n nigúu̱n ná xuajñúu̱ Nasarét, rí ꞌgí ná numbaa Galiléa̱. 40 Ikhín na̱ka̱-ragaja̱a̱ jamí na̱ka̱-raꞌne gúkuíi ada̱, xúꞌkhue̱n máꞌ na̱ka̱-ra̱ma̱ñuu̱ ma̱ꞌnii̱ rí máján, jamí phú na̱ni̱gu̱u̱ꞌ Ana̱ꞌlóꞌ jaꞌyoo̱.

41 Mbámbá tsigu na̱ka̱ tátée ga̱jma̱á nánée Jesús ná Jerusalén ído̱ nagájnuu ndxa̱a̱ Páskua̱. 42 Ído̱ Jesús ni̱gi̱ꞌdoo gu̱wa̱ꞌ i̱jma̱ (12) tsiguu, a̱ꞌkhue̱n ni̱ke̱e̱ mangaa̱ gajmíi̱ ná Jerusalén xómá rí nuni̱i̱ jayu mbámbá rí nagájnuu ndxa̱a̱. 43 Ído̱ wámba̱-ri̱ga̱a ndxa̱a̱, a̱ꞌkhue̱n ni̱ra̱tuu̱n jamba̱a̱ nigúu̱n guꞌwúu̱n. Xómáꞌ Jesús ninguanúu ná Jerusalén, jamí táꞌyoo José ga̱jma̱á María̱ xáne neꞌne rí ninguanúu̱. 44 Ikhii̱n ni̱ju̱múu̱ rí ná majñu̱ú xa̱bo̱ tsí mbaꞌiin i̱ka̱ Jesús, ikhaa jngó mbá jañii a̱kuíi̱n nigóo̱ jamba̱a̱ mbiꞌi rúꞌkhue̱n. Ído̱ ndiꞌyáa̱ Jesús ná majñu̱ú xa̱bo̱ tsí mijngi juñúu̱ jamí ná majñu̱ú xa̱bo̱ tsí nune̱ꞌnuu̱, 45 na̱nguá ni̱xkamaa̱, ikhaa jngó nithangii̱n ágúꞌyáa̱ ná Jerusalén.

46 Asndo mbiꞌi riatsúu ni̱xkamaa̱ Jesús ná awúun guꞌwá dxákuun, ꞌgíi̱ ná majñu̱ú xa̱bo̱ tsí phú na̱ma̱ñúú nusngáá xtángoo. Nadxawuu̱n rí nuthan jamí naraxúu̱n xa̱bo̱ tsúꞌkhue̱n. 47 Mbá xúgíin xa̱bo̱ tsí nu̱dxawíín rí naꞌthée̱n, phú namakúu̱n rí na̱ma̱ñuu̱ mi̱ndaꞌkho, jamí rí phú máján iriꞌñaa̱ rí nitraxíi̱. 48 Ído̱ rí José ga̱jma̱á María̱ ni̱xkamaa̱ Jesús, maphú nimakúu̱n. A̱ꞌkhue̱n waꞌtháa̱n neꞌne nánée̱:

—Dxáma, náá numuu kajngó xáꞌnii nithaña̱ꞌxo̱ꞌ róꞌ. Ana̱a̱ꞌ jamí ikhúúnꞌ guáꞌdááxo̱ꞌ gaꞌkho̱ ga̱jma̱á numaaꞌ rí ndu̱ꞌñáaꞌxo̱ꞌ.

49 A̱ꞌkhue̱n Jesús niriꞌñúu̱:

—Náá numuu kajngó ndu̱ꞌñúuꞌlaꞌ róꞌ. Á tsíya̱álaꞌ rí jaꞌyoo ma̱xtáá ná guꞌwóo Tátéꞌ dxe̱ꞌ.

50 Xómáꞌ ikhii̱n táfruꞌúu̱n rí waꞌthúu̱n neꞌne Jesús.

51 A̱ꞌkhue̱n nithanga̱a Jesús ni̱ka̱a ga̱jma̱á nindxúu̱n ná Nasarét, naꞌne-mbánuu̱ mbá xúgíí rí nuthee̱n. Xómáꞌ nánée̱, na̱gu̱xi̱i mbá xúgíí ríge̱ꞌ ná awúun a̱kui̱in. 52 Jamí Jesús na̱ka̱-ragaja̱a̱ rí na̱ma̱ñuu̱ naꞌnii̱ rí máján, xúꞌkhue̱n máꞌ na̱ka̱-rakhi̱i̱. Maphú na̱ni̱gu̱u̱ꞌ Ana̱ꞌlóꞌ jiꞌyáa̱, xúꞌkhue̱n máꞌ maphú na̱ni̱gu̱ún xa̱bo̱ iꞌnii̱.