Lucas 5

Jesús naꞌne rí Pédro̱ magu̱un i̱gi̱ꞌ

1 Mbá miꞌtsú rí ngrigo̱o̱ꞌ Jesús ná mijngi rawuun ñañuu a̱pha̱ rí mbiꞌyuu Jenesarét,*5.1 «Ñañuu a̱pha̱ Galiléa̱» ñajuun i̱mba̱ mbiꞌyuu iya ríge̱ꞌ. asndo nu̱rmatsí-mijná xa̱bo̱ inuu̱ rí nandúún gúdxawíín ajngáa rawuun Ana̱ꞌlóꞌ. 2 A̱ꞌkhue̱n ndiꞌyoo Jesús rí ná rawuun ñañuu wájun a̱jma̱ ixe̱-rguwa rí na̱ka̱ inuu iya, jamí xa̱bo̱ tsí nu̱rawíin i̱gi̱ꞌ niguátaan gújñáa amúú. 3 A̱ꞌkhue̱n nitsimuu Jesús ná ixe̱-rguwa drígo̱o̱ Simón jamí ni̱ndo̱ꞌo̱o̱ rí maxuꞌmee̱ ne̱ wáa ná awúun iyáá. A̱ꞌkhue̱n ni̱ge̱ꞌe̱ Jesús ná ixe̱-rguwa jamí nigíꞌdu̱u̱n niꞌsngúu̱n xa̱bo̱. 4 Ído̱ wámbo̱o̱ niꞌsngúu̱n xa̱bo̱, a̱ꞌkhue̱n niꞌthúu̱n Simón:

—Ayu-ꞌcháa ixe̱-rguwa ná me̱jno̱ꞌ wáa ñañuu, ikhín gúxi̱dí-máꞌánlaꞌ amalaꞌ mu̱diinlaꞌ i̱gi̱ꞌ.

5 A̱ꞌkhue̱n rí Simón niꞌthúun Jesús:

—Táta̱, jañii mbroꞌon ndi̱ꞌñíixo̱ꞌ i̱gi̱ꞌ, jamí asndo nimbáa̱ túríya̱a̱ꞌxo̱ꞌ. I̱ndo̱ó máꞌ numuu rí ikháánꞌ irathán, mu̱xi̱dí-máꞌánxo̱ꞌ ama mbu̱júꞌ.

6 Ído̱ ni̱xi̱dí-máꞌée̱n ama, mbaꞌiin mi̱ndaꞌkho i̱gi̱ꞌ ni̱ra̱tuu̱n, asndo inu mu̱thon ama nene̱ i̱gi̱ꞌ. 7 A̱ꞌkhue̱n nini̱i̱ ñawúu̱n rí ma̱guwá a̱nguíi̱n tsí gachúún ná i̱mba̱ ixe̱-rguwa rí ma̱guwá gúmbáñúu̱. Ído̱ niguáꞌníi̱, nájma̱ ixe̱-rguwa nene̱-matíi̱n i̱gi̱ꞌ, jamí asndo inu ma̱rmáꞌán ixe̱-rguwa ná awúun iya. 8 Ído̱ ndiꞌyoo Simón Pédro̱ rí xkuaꞌnii, a̱ꞌkhue̱n nismáti̱go̱o̱ inuu Jesús jamí niꞌthúu̱n:

—Táta̱, athane̱-janíí-mina̱ꞌ inuꞌ, numuu rí xa̱bo̱ aꞌkhán ñajunꞌ.

9 Xkuaꞌnii niꞌthán Simón numuu rí phú nimíñuu̱, xómá rí phú nimíñúú tsí ngrigo̱o̱ꞌ gajmíi̱ mangiin, numuu rí ni̱ra̱tuu̱n mi̱ndaꞌkho i̱gi̱ꞌ. 10 Xkuaꞌnii máꞌ phú nimíñuu Santiágo̱*5.10 Ná i̱yi̱i̱ꞌ griégo̱ rí wayuu naꞌthán «Jakóbo̱», rí nithán «Santiágo̱» ná ajngáa xtílo̱o̱. ga̱jma̱á Juáán mangaa, tsí i̱ji̱in Sebedéo̱, tsí ngrigu̱ún nu̱ñajun gajmíí Simón. A̱ꞌkhue̱n Jesús niꞌthúun Simón:

—Ma̱xámíñaaꞌ, nákha i̱gi̱ꞌ gárawíin rá, rí xa̱bo̱ ma̱ta̱gímbúun rá.

11 Ído̱ ni̱díwíi̱n judúu̱n ixe̱-rguwa ná rawuun iya, ni̱ni̱ꞌñáa̱ mbá xúgíí, jamí nigóo̱ tsu̱du̱u̱ Jesús.