1 Mbá mbiꞌi rí nduya̱a xu̱únꞌ xa̱bo̱ judío̱, na̱ka̱-ranújngoo Jesús ná waꞌdu ixí iña. Xómáꞌ tsí naꞌsngúu̱n nu̱xmajwíi iña, jamí nu̱míndíi̱ ne̱ ga̱jma̱á ñawúu̱n, kajngó mu̱phi̱i̱ tsígoo ne̱. 2 A̱ꞌkhue̱n waꞌthúu̱n nene̱ mbá tikhuun xa̱bo̱ fariséo̱:

—Náá numuu kajngó nu̱ne̱laꞌ mbá ñajun rí ra̱jáꞌyoo mu̱ꞌne̱lóꞌ awúun mbiꞌi rí nduꞌyáa xa̱ꞌlóꞌ róꞌ.

3 Xómáꞌ Jesús niriꞌñúu̱:

—Á túraxnuulaꞌ ná naꞌthán rí neꞌne Dabíd wajyúú, nákhí rí ikhaa̱ ni̱xki̱dxu̱u̱ gajmíi̱ a̱nguii̱n dxe̱ꞌ. 4 Ni̱to̱ꞌo̱o̱ ná awúun guꞌwóo Ana̱ꞌlóꞌ, ni̱grui̱guíi̱ guma rí kixnáxe̱ ná inuu Ana̱ꞌlóꞌ, rí i̱ndo̱ó máꞌ dxakuun jaꞌyoo rí mu̱pho̱. Niꞌkho̱ Dabíd guma rúꞌkhue̱n jamí nixnúu̱ ne̱ a̱nguii̱n mu̱pho̱ mangiin.

5 A̱ꞌkhue̱n Jesús niꞌthúún xóó xa̱bo̱ tsúꞌkhue̱n:

—A̱dée Xa̱bo̱ Numbaa gíꞌdoo tsiakhe̱ rí maꞌthán dí ñajuun ma̱goo ma̱gu̱ma ná awúun mbiꞌi rí nduya̱a xu̱únꞌ xa̱bo̱ mangaa.

6 I̱mba̱ mbiꞌi rí nduya̱a xu̱únꞌ xa̱bo̱ judío̱ ni̱to̱ꞌo̱o̱ Jesús ná guꞌwá rí na̱gi̱mbíi̱n, jamí naꞌsngúu̱n xa̱bo̱. Ikhín gída̱ꞌ mbáa xa̱bo̱ tsí nixtriga̱ ñawún mújúun. 7 Xómáꞌ xa̱bo̱ tsí nusngáá xtángoo gajmíí xa̱bo̱ fariséo̱ nu̱ña̱maa̱ Jesús kajngó mbuyáa̱ xí ma̱ꞌne-thanuu̱ xa̱bo̱ mbiꞌi rí nduyaa̱ xúu̱nꞌ. Numuu rí nandúu̱n mu̱xkamaa̱ xáne muni̱i̱ aꞌkhúun Jesús.

8 Xómáꞌ Jesús ndaꞌyoo máꞌ xáne i̱ndxa̱ꞌwa̱-mijnée̱, ikhaa jngó niꞌthúu̱n xa̱bo̱ tsí nixtriga̱ ñawúun: «A̱tu̱xa̱a̱ꞌ, jamí ariajún ná tikhuíí a̱ꞌkhue̱n». Xómáꞌ xa̱bo̱ tsúꞌkhue̱n ni̱tu̱xu̱u̱ꞌ, jamí ni̱wi̱ji̱i̱. 9 A̱ꞌkhue̱n Jesús niꞌthúún xa̱bo̱: «Ma̱ña̱ꞌlaꞌ mbá graxe̱: Náá rí ma̱goo mu̱ꞌne̱lóꞌ ná awúun mbiꞌi rí nduꞌyáa xa̱ꞌlóꞌ rá. Á mu̱ꞌne̱lóꞌ rí máján o rí ra̱máján dxe̱ꞌ. Á mu̱ꞌne̱-jríya̱aꞌlóꞌ mbáa xa̱bo̱ o mu̱xíya̱a̱lóꞌ dxe̱ꞌ».

10 A̱ꞌkhue̱n Jesús niraꞌa̱ inúú mbá xúgíin xa̱bo̱, jamí niꞌthúu̱n xa̱bo̱ tsí najáñuu: «Atatsriya̱ꞌ ñawáanꞌ». A̱ꞌkhue̱n nitsriya̱ꞌ ñawúun xa̱bo̱ tsúꞌkhue̱n, jamí núkho̱ niꞌni̱i ñawúu̱n. 11 Xómáꞌ xa̱bo̱ tsí nusngáá xtángoo gajmíí xa̱bo̱ fariséo̱, maphú nijiꞌníi̱ jamí nu̱ra̱xe̱-mijnée̱ náá rí ma̱goo muñíi̱ Jesús.

12 Mbá mbiꞌi rí ñúꞌún ni̱ka̱ Jesús inuu júba̱ gáꞌthán-jáñuu Ana̱ꞌlóꞌ, jamí jañii mbroꞌon niꞌthán-jáñuu̱. 13 Ído̱ ni̱mbiꞌi nindxaꞌwúu̱n tsí naꞌsngúu̱n, jamí ná majñu̱ú tsúꞌkhue̱n niraꞌwíi̱n mbá gu̱wa̱ꞌ i̱jmi̱i (12) xa̱bo̱, xúꞌkhue̱n máꞌ niꞌthée̱n rí tsíge̱ꞌ ma̱nindxu̱ún tsí maxúnguii̱nꞌ. 14 Xáꞌnii mbiꞌñúu̱:

Simón, tsí nixná mbiꞌyuu̱ Pédro̱ mangaa,

Andrés, tsí dxíyo̱o̱ máꞌ Simón,

Santiágo̱,*

Juáán,

Felípe̱

Bartolomé,

15 Matéo̱,

Tomás

Santiágo̱, tsí a̱dée Alféo̱,

Simón, tsí neꞌne mbiꞌyuu «Selóte̱»,

16 Júda̱s, tsí a̱dée Santiágo̱,

jamí Júda̱s Iskarióte̱, tsí nixnáxi̱i̱ Jesús nda̱wa̱á ná inúú xa̱bo̱ sia̱nꞌ.

17 A̱ꞌkhue̱n ni̱gata̱a Jesús inuu júba̱ gajmíi̱, jamí niguáꞌníi̱ mbá xkua̱. Mbaꞌiin máꞌ tsí naꞌsngúu̱n gachúún ikhín, xúꞌkhue̱n máꞌ mangaa niguwá mi̱ndaꞌkhúún xa̱bo̱ tsí júwa̱ꞌ ná numbaa Judéa̱, ná Jerusalén, jamí tsí júwa̱ꞌ ná rawuun iya a̱pha̱ rí ꞌgí ná Tíro̱ ga̱jma̱á Sidón. Niguwá xa̱bo̱ tsúꞌkhue̱n rí mu̱dxawíín ajngáa rawuu̱n, jamí rí ma̱gu̱ma-thanúú gáꞌnii̱. 18 Xúꞌkhue̱n máꞌ tsí nu̱míni̱í ene̱ gíñá ꞌguéen, naꞌni̱i a̱kui̱ín iꞌnii̱. 19 Ikhaa jngó mbá xúgíin xa̱bo̱ nune̱ rí mu̱xkajmaa Jesús, numuu rí ikhaa̱ gíꞌdoo̱ tsiakhe̱ jamí naꞌne-thanúu̱ mbá xúgíin xa̱bo̱.

20 A̱ꞌkhue̱n Jesús niyaxúu̱n tsí naꞌsngúu̱n jamí niꞌthúu̱n:

«Gagi juwalaꞌ tsáanꞌ mingínáaꞌlaꞌ,

numuu rí ikháanꞌlaꞌ jaꞌyalaꞌ rí maꞌthán-ñájwanlaꞌ Ana̱ꞌlóꞌ.

21 Gagi juwalaꞌ tsáanꞌ na̱xki̱dxa̱ꞌlaꞌ xúge̱ꞌ,

numuu rí Ana̱ꞌlóꞌ ma̱ꞌne rí ma̱gi̱ꞌmalaꞌ nda̱wa̱á.

Gagi juwalaꞌ tsáanꞌ nu̱mbi̱ya̱ꞌlaꞌ xúge̱ꞌ,

numuu rí ikháanꞌlaꞌ mu̱ndu̱ꞌwa̱laꞌ nda̱wa̱á.

22 »Gagi gájuwalaꞌ ído̱ rí tsíñúú xa̱bo̱ gúyalaꞌ, ído̱ mu̱xkawiáanꞌlaꞌ, ído̱ muthan-xkawi̱i̱ꞌ ga̱jma̱á numalaꞌ, jamí asndo muthan xa̱bo̱ rí ra̱májáanꞌlaꞌ ga̱jma̱á numuu A̱dée Xa̱bo̱ Numbaa. 23 Ga̱ꞌdxalaꞌ mbiꞌi rúꞌkhue̱n, jamí gagi a̱kia̱nꞌlaꞌ gáꞌne, numuu rí phú mba̱a̱ rí ríga̱ ma̱janálaꞌ ná mikhuíí. Numuu rí xkuaꞌnii máꞌ nene̱ anu̱ú xa̱bo̱ tsúꞌkhue̱n wajyúú, nene̱-ngíníi̱ xa̱bo̱ tsí nu̱rawíjnga̱a ajngóo Ana̱ꞌlóꞌ.

24 »Xómáꞌ ikháanꞌlaꞌ tsáanꞌ guáꞌdáálaꞌ guéño, ¡á tháán mingínáaꞌlaꞌ gáꞌne!,

numuu rí nijuwa-májánlaꞌ máꞌ ikháanꞌlaꞌ.

25 ¡Á tháán mingínáaꞌlaꞌ gáꞌne tsáanꞌ tsíndáti̱go̱o̱ rí napholaꞌ xúge̱ꞌ!,

numuu rí ma̱xki̱dxa̱ꞌlaꞌ nda̱wa̱á.

¡Á tháán mingínáaꞌlaꞌ gáꞌne tsáanꞌ nu̱ndu̱ꞌwa̱laꞌ xúge̱ꞌ!,

numuu rí phú mu̱mbi̱ya̱ꞌ-jínálaꞌ.

26 »¡Á tháán mingínáaꞌlaꞌ gáꞌne tsáanꞌ mbá xúgíin xa̱bo̱ nuthan rí máján numalaꞌ xúge̱ꞌ! Numuu rí xkuaꞌnii máꞌ nene̱ anu̱ú xa̱bo̱ tsúꞌkhue̱n wajyúú, nithee̱n rí máján ga̱jma̱á numúú xa̱bo̱ tsí nu̱rawíjnga̱a ajngáa mi̱nduwa.

27 »Xómáꞌ ikhúúnꞌ i̱tha̱nꞌlaꞌ, tsáanꞌ nu̱dxawunꞌlaꞌ: Ga̱galaꞌ ju̱ñu̱ú xa̱bo̱ tsí guáꞌdáanꞌlaꞌ sia̱nꞌ, jamí gu̱ñu̱úlaꞌ rí máján tsí tsíñúú gúyalaꞌ. 28 Gu̱nda̱ꞌa̱álaꞌ Ana̱ꞌlóꞌ rí ma̱ꞌne-tsakun-rámii xa̱bo̱ tsí nuxna-maꞌáanꞌlaꞌ, jamí gu̱tha̱n-jáñíílaꞌ Ana̱ꞌlóꞌ ga̱jma̱á numúú xa̱bo̱ tsí nuthan-xkawia̱ꞌlaꞌ. 29 Xí mbáa xa̱bo̱ naxpáthun inaaꞌ, atartuaꞌán i̱mba̱ mbíꞌthá maxnúu̱. Xí mbáa xa̱bo̱ narígú-jaꞌyáaꞌ xtátsia̱anꞌ, araxnáa̱ kutiáanꞌ mangaa mbayée̱. 30 Asndo tsáa na̱nda̱ꞌa̱a̱ꞌ, araxnáa̱. Xómáꞌ tsí narígú-jaꞌyáaꞌ dríga̱a̱ꞌ, ma̱xára̱tháa̱n rí marthangaa̱ ne̱. 31 Xómá nandalaꞌ rí muña̱ꞌlaꞌ xa̱bo̱, xkuaꞌnii máꞌ gúñúu̱ mangáanꞌlaꞌ.

32 »Á máján e̱ne̱laꞌ xí i̱ndo̱ó máꞌ tsí nandúún juyalaꞌ, nandalaꞌ ju̱ñu̱ú rá. Á ra̱ꞌkhá xkuaꞌnii máꞌ ene̱ xa̱bo̱ tsí nune̱ aꞌkhán mangiin rá. 33 Á máján e̱ne̱laꞌ xí i̱ndo̱ó máꞌ tsí nuña̱ꞌlaꞌ rí máján, i̱ñu̱úlaꞌ rí máján rá. Á ra̱ꞌkhá xkuaꞌnii máꞌ ene̱ xa̱bo̱ tsí nune̱ aꞌkhán mangiin rá. 34 Xí nu̱xna̱tíꞌñúúlaꞌ i̱ndo̱ó máꞌ xa̱bo̱ tsí na̱ꞌngu̱ún nuxnalaꞌ tháan rí guáꞌdáá mangiin, náá lá rí máján e̱ne̱laꞌ rí xkuaꞌnii rá. Numuu rí xkuaꞌnii máꞌ nuxnatiꞌña-mijná xa̱bo̱ tsí nune̱ aꞌkhán mangiin, jamí guáꞌthíi̱n rí mu̱dri̱guíi̱ i̱mbá xó rí ikhii̱n nuxnatiꞌñee̱.

35 »Xómáꞌ ikháanꞌlaꞌ rá, ga̱galaꞌ ju̱ñu̱ú xa̱bo̱ tsí guáꞌdáanꞌlaꞌ sia̱nꞌ. Gu̱ñúu̱laꞌ rí máján. Gu̱xna̱tíꞌñúu̱laꞌ, jamí ma̱xáguáꞌthi̱ínlaꞌ rí ma̱janálaꞌ nitháan ga̱jma̱á numuu ne̱. A̱ꞌkhue̱n mu̱drígúlaꞌ mba̱a̱ gamaku, jamí ma̱ꞌne i̱ji̱in Ana̱ꞌlóꞌ Mikhuíí ñajwanlaꞌ. Numuu rí ikhaa̱ phú májáan a̱kuii̱n jaꞌñúu̱ tsí tsírígu̱u la gamaku ná inuu̱, xúꞌkhue̱n máꞌ tsí nune̱ rí xkawe̱ꞌ. 36 Ikhaa jngó, ga̱ñáwíin a̱kia̱nꞌlaꞌ ju̱ñu̱ú mbá xúgíin xa̱bo̱, xómá rí nañáwíin a̱kui̱in Ana̱ꞌlaꞌ Mikhuíí mangaa.

37 »Mu̱xútha̱nlaꞌ rí ra̱máján ene̱ xa̱bo̱, kajngó Ana̱ꞌlóꞌ ma̱xáxudaa awan ga̱jma̱á numalaꞌ. Mu̱xúrígulaꞌ aꞌkhán tsu̱du̱ún xa̱bo̱, kajngó ma̱xárígu Ana̱ꞌlóꞌ aꞌkhán tsu̱da̱ꞌlaꞌ mangaa. Gu̱ne̱ mba̱a̱ a̱kia̱nꞌlaꞌ ju̱ñu̱ú xa̱bo̱, kajngó Ana̱ꞌlóꞌ ma̱ꞌne mba̱a̱ a̱kui̱in jaꞌyalaꞌ mangaa. 38 Gu̱xnu̱úlaꞌ i̱ꞌwíin xa̱bo̱ rí guáꞌdáálaꞌ, kajngó ma̱janálaꞌ ga̱jma̱á mbá awan máján, gatíí, xa̱ꞌ, jamí asndo na̱ga̱dí-tígúu gáꞌne Ana̱ꞌlóꞌ. Numuu rí ga̱jma̱á máꞌ awan rí nu̱xna̱laꞌ, ikhaa máꞌ awan rúꞌkhue̱n ma̱giewan ga̱jma̱á rí ma̱janálaꞌ».

39 A̱ꞌkhue̱n rí Jesús niꞌthúún xa̱bo̱ mbá ajngáa xkri̱da: «Á ma̱goo rí mbáa xa̱bo̱ tsí tsífrigo̱o̱ꞌ mbayá ikhoo i̱mba̱a̱ꞌ tsí tsífrigo̱o̱ꞌ dxe̱ꞌ. Á ma̱xáduáꞌíi̱n nájmii̱ ná iñá rá. 40 Tsí nisngáá na̱nguá gíꞌdoo numuu̱ i̱tha̱án xó rí xa̱bo̱ tsí naꞌsngóo̱. I̱ndo̱ó máꞌ numuu rí ma̱nindxu̱u̱ xómá jaꞌnii tsí niꞌsngóo̱ ído̱ gámbo̱o̱ ma̱ꞌne-gajma̱a̱ mbá xúgíí.

41 »Náá numuu kajngó natiaxi̱í náska rí gída̱ꞌ ná iduu dxájwaaꞌ, jamí tsítiaxi̱í raxpa rí gída̱ꞌ ná idaaꞌ ikháánꞌ róꞌ. 42 Xí tsítiaxi̱í giníí raxpa rí gída̱ꞌ ná idaaꞌ, ma̱xáxóo ma̱ra̱tha̱án dxájwaaꞌ rí maniñaa̱ꞌ ma̱tríya̱aꞌ náska rí gída̱ꞌ ná iduu̱. ¡Maphú a̱jma̱ inaaꞌ! Atríya̱aꞌ raxpa rí gída̱ꞌ ná idaaꞌ giníí, kajngó ma̱goo ma̱friga̱a̱ꞌ májáanꞌ ma̱tríya̱aꞌ náska rí gída̱ꞌ ná iduu dxájwaaꞌ.

43 »Mbá ixe̱ rí máján ma̱xáxóo maxná xndúu rí xkawe̱ꞌ. Xúꞌkhue̱n máꞌ mangaa, mbá ixe̱ rí xkawe̱ꞌ ma̱xáxóo maxná xndúu rí máján. 44 Numuu rí mbámbá ixe̱ na̱gu̱ma-nuwiin ga̱jma̱á majñu̱u̱ xndúu rí naxná. Tsíjma̱a̱ xndú thawuun ígo̱ eꞌne ixe̱ tsuwan, ni máꞌ tsídrígúlóꞌ úba̱ ná inuu ajma̱a̱ tsuwan. 45 Xa̱bo̱ tsí májáan, máján rí naꞌthée̱n, numuu rí máján rí ríga̱ ná awúun a̱kuii̱n. Xómáꞌ xa̱bo̱ tsí ra̱májáan rá, ra̱máján máꞌ rí naꞌthée̱n, numuu rí ra̱máján rí ríga̱ ná awúun a̱kuii̱n. Numuu rí rawuun xa̱bo̱ naꞌthán rí gatíí ná awúun a̱kuii̱n.

46 »Náá numuu kajngó nu̱thu̱nꞌlaꞌ, "Táta̱, ikháánꞌ narathán-ñájunꞌ", xí tsíne̱-mbáníílaꞌ rí na̱tha̱nꞌlaꞌ róꞌ. 47 Ma̱tha̱nꞌlaꞌ xáne jaꞌnii xa̱bo̱ tsí na̱ꞌkha̱ inuꞌ jamí nadxawuun rí na̱tha̱nlo̱ꞌ, xúꞌkhue̱n máꞌ naꞌne-mbánuu̱ ne̱. 48 Ikhaa̱ jaꞌnii̱ xómá mbáa xa̱bo̱ tsí niꞌndii me̱jno̱ꞌ jamí niꞌgíi̱ nakhúu guꞌwóo ná tsu̱du̱u̱ itsí mba̱ꞌwo̱. Ído̱ ni̱ga̱ti̱ya̱aꞌ iya mbo̱oꞌ, phú gakhe̱ nixpáthuma ne̱ nakhúu guꞌwá, i̱ndo̱ó máꞌ numuu rí táꞌngo̱o̱ ne̱ gáꞌne maꞌba̱a̱n guꞌwá, numuu rí ni̱gu̱ma ne̱ ná tsu̱du̱u̱ itsí.* 49 Xómáꞌ xa̱bo̱ tsí i̱ndo̱ó máꞌ nadxawuun rí na̱tha̱n, jamí tsíꞌne-mbánuu ne̱ rá, ikhaa tsúꞌkhue̱n jaꞌnii xómá xa̱bo̱ tsí nirígujnuu guꞌwóo ná tsu̱du̱u̱ ju̱ba̱ꞌ, jamí táꞌgíi̱ nakhúu ne̱. Ído̱ ni̱ga̱ti̱ya̱aꞌ iya mbo̱oꞌ, maphú gakhe̱ nixpáthuma ne̱ ná tsu̱du̱u̱ guꞌwá, a̱ꞌkhue̱n núkho̱ ni̱ka̱tixa̱ ne̱ jamí wámba̱-ri̱ga̱a ne̱».