1 Ído̱ nangiyuu máꞌ ma̱guáꞌníi̱ ná Jerusalén, niguáꞌníi̱ ná xuajen rí mbiꞌyuu Betfajé ga̱jma̱á Betánia̱, ná kri̱doo júba̱ rí mbiꞌyuu Olíbo̱, a̱ꞌkhue̱n Jesús nixná-ñájúu̱n a̱jmi̱i tsí naꞌsngúu̱n. 2 Xáꞌnii niꞌthúu̱n: «Gaꞌgualaꞌ ná xuajen rí ꞌgí mbíꞌthá. Ído̱ águáꞌnúlaꞌ ikhín, a̱ꞌkhue̱n mbu̱ya̱álaꞌ xtoꞌwóo mbáa xtángidi lájwíin, tsí asndo nimbáa xa̱bo̱ xóó tárigu tsu̱du̱u̱. Gu̱ra̱khuíi̱laꞌ jamí a̱guwa ju̱ya̱a̱laꞌ ge̱jyoꞌ. 3 Jamí xí mbáa xa̱bo̱ gáraxa̱ꞌlaꞌ: "Náá numuu kajngó nu̱ra̱khuíílaꞌ xtángidi lájwíin róꞌ". Xáꞌnii gútháa̱nlaꞌ: "Numuu rí ndaꞌyóo̱ ma̱riguu Táta̱, jamí marthangaa̱ máꞌ ma̱ꞌkha̱a i̱mbégo wáa"».

4 A̱ꞌkhue̱n nigóo̱, ni̱xkamaa̱ a̱ꞌdá-xtángidi xtoꞌwóo ná jamba̱a̱, ná mijngi rawuun mbá guꞌwá, jamí ni̱ra̱khuíi̱. 5 A̱ꞌkhue̱n rí mbá tikhuun xa̱bo̱ tsí wájun máꞌ ikhín niwaꞌthúu̱n nene̱: «Dí e̱ne̱laꞌ rí nu̱ra̱khuíílaꞌ a̱ꞌdá-xtángidi róꞌ». 6 A̱ꞌkhue̱n ikhii̱n ni̱riꞌñúu̱ xómá rí waꞌthúu̱n neꞌne Jesús. A̱ꞌkhue̱n ni̱ni̱ꞌñúu̱ rí magóo̱ juya̱a̱. 7 A̱ꞌkhue̱n niguáꞌnúu̱ juya̱a̱ xtángidi lájwíin ná inuu Jesús, jamí ni̱strámee̱ xtátsíi̱n ná tsu̱du̱u̱. A̱ꞌkhue̱n rí Jesús ni̱riguu̱.

8 Xúꞌkhue̱n máꞌ mangaa mbaꞌiin xa̱bo̱ nagóó-ru̱striga̱ xtátsi̱ín ná jamba̱a̱, jamí i̱ꞌwíin nu̱ro̱thon inúu ixe̱, jamí nu̱strige̱e̱ ne̱ ná jamba̱a̱. 9 Xómáꞌ xa̱bo̱ tsí nagóó ginuu jamí tsí naguwá tsu̱di̱í nu̱ndxa̱ꞌwe̱e̱ xáꞌnii:

«¡A̱gu̱ma-mba̱a̱ Ana̱ꞌlóꞌ!

¡A̱gu̱ma-tsakun-rámaa tsí na̱ꞌkha̱ ga̱jma̱á numuu Táta̱!

10 ¡A̱gu̱ma-tsakun-rámaa tsí na̱ꞌkha̱ gáꞌthán-ñájwanlóꞌ

xómá rí neꞌne xi̱ꞌñálóꞌ Dabíd wajyúú!

¡A̱gu̱ma-mba̱a̱ Ana̱ꞌlóꞌ tsí xtáa mikhuíí!».

11 A̱ꞌkhue̱n ni̱to̱ꞌo̱o̱ Jesús ná Jerusalén, jamí ni̱ke̱e̱ ná guꞌwá dxákuun. Ído̱ wámbo̱o̱ niyaxu̱u̱ mbá xúgíí rí ríga̱ mbá nawa̱a̱, a̱ꞌkhue̱n ni̱kaa̱ ná Betánia̱ gajmíi̱ mbá gu̱wa̱ꞌ i̱jmi̱i (12) tsí naꞌsngúu̱n, numuu rí inu máꞌ na̱ka̱-raꞌne jína.

12 Jamí i̱mba̱ mbiꞌi, ído̱ nagájnáa̱ ná Betánia̱, a̱ꞌkhue̱n ni̱xki̱dxu̱u̱ Jesús. 13 Jamí asndo tsíngua̱ꞌ ndiꞌyoo̱ rí wéje̱ mbá ixu̱u̱ ígo̱ rí gíꞌdoo inúu, a̱ꞌkhue̱n ni̱ke̱e̱ gáꞌyoo̱ xí maxkamaa̱ mbá xndúu ne̱. Ído̱ ni̱ga̱níi̱ ná wéje̱ ne̱, a̱ꞌkhue̱n na̱nguá nixkamaa̱ nimbá xndúu ne̱, rí i̱ndo̱ó máꞌ inúu ne̱ gíꞌdoo, numuu rí ra̱ꞌkháa mbiꞌi rí najma̱a̱ xndúu ne̱ ñajuun mbiꞌi rúꞌkhue̱n. 14 A̱ꞌkhue̱n Jesús niꞌthúun ixu̱u̱ ígo̱: «¡Asndo nimbáa xa̱bo̱ náma̱xékho̱ xndáaꞌ rá!». Xómáꞌ tsí naꞌsngúu̱n ni̱dxawíín rí niꞌthée̱n.

15 Ído̱ niguáꞌníi̱ ná Jerusalén, a̱ꞌkhue̱n Jesús ni̱to̱ꞌo̱o̱ ná guꞌwá dxákuun, nigíꞌdu̱u̱n nixkawíi̱n tsí nu̱ngu̱jwa̱ jamí tsí nutse̱. Nirngáxi̱i̱ xapa nakhú drígu̱ún tsí nu̱riꞌkhuíí mbúkha̱a̱, xúꞌkhue̱n máꞌ xíli̱ín tsí nu̱ngu̱jwi̱in rigu. 16 Jamí asndo nimbáa xa̱bo̱ tsíniñuu̱ rí ma̱nújngoo jagu̱u̱ drígo̱o̱ ná rixo̱o̱ guꞌwá dxákuun, rí ma̱ꞌne ikha jmbu. 17 A̱ꞌkhue̱n nigíꞌdu̱u̱n niꞌsngúu̱n xa̱bo̱ ga̱jma̱á ajngáa ríge̱ꞌ: «Xáꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: "Rí guꞌwóꞌ, guꞌwá ná muthan-jáñuꞌ jámbi̱in xa̱bo̱ numbaa ñajuun ne̱".* Xómáꞌ ikháanꞌlaꞌ rá, ni̱ni̱ilaꞌ ne̱ "iñúu itsí ná gatiin ku̱ꞌwá"».*

18 Ído̱ nidxawíín rúꞌkhue̱n xa̱bo̱ tsí nusngáá xtángoo jamí dxakuun tsí gíꞌdoo numúú, a̱ꞌkhue̱n ni̱gíꞌdíi̱n ndiꞌyée̱ xáne gúni̱i̱ rí mu̱xíya̱a̱ Jesús. Namíñúu̱ juyáa̱, numuu rí mbá xúgíin xa̱bo̱ phú namakúún eꞌne rí naꞌsngáa̱. 19 Ído̱ ni̱ka̱-raꞌne jína, a̱ꞌkhue̱n rí Jesús nigájnuu ná xuajen gajmíi̱ tsí naꞌsngúu̱n.

20 Ído̱ watse rí i̱mba̱ mbiꞌi, naguwá-ranújngáa̱n ná wéje̱ ixu̱u̱ ígo̱, a̱ꞌkhue̱n ndiyáa̱ rí nijndoo asndo ajmu̱u̱ ne̱. 21 A̱ꞌkhue̱n ni̱rmáꞌáan a̱kui̱in Pédro̱, jamí niꞌthúu̱n Jesús:

—Táta̱ naꞌsngáá, atiaxe̱ rí nijndoo ixu̱u̱ ígo̱ rí niraxná-máꞌáan.

22 A̱ꞌkhue̱n niriꞌña Jesús:

—Ga̱nimba̱ꞌlaꞌ ju̱ya̱á Ana̱ꞌlóꞌ. 23 Numuu rí na̱tha̱nꞌ-jmbalaꞌ, asndo tsáa tsí maꞌthúun júba̱ ríge̱ꞌ: "Araxo̱n ge̱jyoꞌ, jamí ayu gáta̱xpa̱tuáꞌán-mina̱ꞌ ná awúun iya a̱pha̱ ñúꞌún", xí tsíꞌne a̱jma̱ a̱kuii̱n, jamí na̱ju̱mu̱u̱ rí ma̱mba̱núu rí naꞌthée̱n, a̱ꞌkhue̱n rí ma̱mba̱núu rí naꞌthée̱n xúꞌkhue̱n rá. 24 Ikhaa jngó na̱tha̱nꞌlaꞌ, asndo náá rí gúnda̱ꞌa̱álaꞌ Ana̱ꞌlóꞌ, ga̱nimba̱ꞌlaꞌ rí ni̱drígúlaꞌ ne̱ máꞌ, a̱ꞌkhue̱n ma̱janálaꞌ ne̱. 25 Jamí ído̱ juwalaꞌ nu̱tha̱n-jáñíílaꞌ Ana̱ꞌlóꞌ, gu̱ne̱ mba̱a̱ a̱kia̱nꞌlaꞌ ju̱ya̱á xa̱bo̱ tsí niꞌñalaꞌ rí ra̱máján, kajngó mangaa Ana̱ꞌlaꞌ tsí xtáa mikhuíí ma̱ꞌne mba̱a̱ a̱kui̱in jaꞌyalaꞌ ga̱jma̱á numuu aꞌkhánlaꞌ. 26 Numuu rí xí ikháanꞌlaꞌ tsíne̱ mba̱a̱ a̱kia̱nꞌlaꞌ ju̱ñu̱ú xa̱bo̱, ni máꞌ Ana̱ꞌlaꞌ tsí xtáa mikhuíí ma̱xáꞌne mba̱a̱ a̱kuii̱n jaꞌyalaꞌ mangaa ga̱jma̱á numuu aꞌkhánlaꞌ.*

27 A̱ꞌkhue̱n niguáꞌnúu̱ mbu̱júꞌ ná Jerusalén. Ngrigo̱o̱ꞌ Jesús ná rixo̱o̱ guꞌwá dxákuun, a̱ꞌkhue̱n ni̱xu̱ꞌma-mijná ná inuu̱ dxakuun tsí gíꞌdoo numúú, xa̱bo̱ tsí nusngáá xtángoo jamí xa̱bo̱ buanuu, 28 a̱ꞌkhue̱n ni̱ra̱xíi̱:

—Náá ndiyá idxa̱a̱ꞌ rí nathane̱ mbá xúgíí ríge̱ꞌ róꞌ. Tsáa niꞌtháanꞌ rí xáꞌnii gátha̱ne̱ róꞌ.

29 A̱ꞌkhue̱n Jesús niriꞌñúu̱:

—Ikhúúnꞌ mangúúnꞌ ma̱ña̱ꞌlaꞌ mbá graxe̱. Xí nu̱ri̱ꞌñuꞌlaꞌ, a̱ꞌkhue̱n ma̱tha̱nꞌlaꞌ náá ndi̱ya̱ idxu̱ꞌ rí na̱ne̱ mbá xúgíí ríge̱ꞌ. 30 Tsáa nixúngua̱a̱ꞌ Juáán rí maxúꞌdu-maꞌíin xa̱bo̱ ná awúun iya róꞌ. Ana̱ꞌlóꞌ, o xa̱bo̱ numbaa dxe̱ꞌ. Gu̱riꞌñuꞌlaꞌ.

31 A̱ꞌkhue̱n ikhii̱n ni̱gíꞌdíi̱n nithan-mijnée̱: «Xí mu̱ꞌthánlóꞌ, "Ana̱ꞌlóꞌ nixúngua̱a̱ꞌ", a̱ꞌkhue̱n ikhaa̱ maꞌthánlóꞌ: "Náá numuu kajngó tánimba̱ꞌlaꞌ ju̱ya̱á rí naꞌthée̱n xúꞌkhue̱n róꞌ". 32 Jamí ma̱xáxóo mu̱ꞌthánlóꞌ rí xa̱bo̱ numbaa nitháa̱n rí ma̱ꞌnii̱ rúꞌkhue̱n». Nuthee̱n rúꞌkhue̱n numuu rí namíñúu̱ juñúu̱ xa̱bo̱ xuajen, numuu rí mbá xúgíin xa̱bo̱ nanimbu̱únꞌ rí Juáán ninindxu̱u̱ mbáa xa̱bo̱ tsí ni̱gu̱wíjnga̱a ajngóo Ana̱ꞌlóꞌ. 33 Ikhaa jngó xáꞌnii ni̱riꞌñáa̱ Jesús:

—Tsíya̱áxo̱ꞌ tsáa nixúngua̱a̱ꞌ Juáán.

Xómáꞌ Jesús niriꞌñúu̱:

—Ni máꞌ ikhúúnꞌ ma̱xátha̱nꞌlaꞌ náá ndi̱ya̱ idxu̱ꞌ rí na̱ne̱ ríge̱ꞌ.