1 Ni̱to̱ꞌo̱o̱ mbu̱júu Jesús ná guꞌwá rí na̱gi̱mbíin xa̱bo̱ judío̱, jamí ikhín kra̱ꞌaa mbáa xa̱bo̱ tsí nixtriga̱ mbá ñawúun. 2 A̱ꞌkhue̱n rí mbá tikhuun xa̱bo̱ nu̱ña̱maa Jesús, kajngó mbuyáa̱ xí ma̱ꞌne-thanuu̱ xa̱bo̱ tsúꞌkhue̱n ná awúun mbiꞌi rí nduya̱a xu̱únꞌ xa̱bo̱, kajngó ma̱goo muni̱i̱ aꞌkhúun.

3 A̱ꞌkhue̱n Jesús niꞌthúun xa̱bo̱ tsí nixtriga̱ ñawúun: «A̱tu̱xa̱a̱ꞌ, ariajún ná tikhuíí ge̱jyoꞌ».

4 A̱ꞌkhue̱n Jesús niꞌthúún mbá xúgíin xa̱bo̱: «Náá rí ma̱goo mu̱ꞌne̱lóꞌ ná awúun mbiꞌi rí nduꞌyáa xa̱ꞌlóꞌ rá. Á mu̱ꞌne̱lóꞌ rí máján o rí ra̱máján dxe̱ꞌ. Á mu̱ꞌne̱-jríya̱aꞌlóꞌ mbáa xa̱bo̱, o mu̱xíya̱a̱lóꞌ dxe̱ꞌ».

Xómáꞌ ikhii̱n wíí neꞌne rawúu̱n. 5 A̱ꞌkhue̱n mbá tuaꞌáan niyaxúu̱n, najiꞌnáa̱ jamí nadaa a̱kuii̱n numuu rí tsíñúu̱ gáfruꞌúu̱n jamí tsíñáwíin a̱kuíi̱n. A̱ꞌkhue̱n niꞌthúu̱n xa̱bo̱ tsí nixtriga̱ ñawúun: «Atatsriya̱ꞌ ñawáanꞌ».

Xómáꞌ ikhaa̱ nitsriye̱e̱ꞌ ñawúu̱n, a̱ꞌkhue̱n niꞌni̱i ne̱. 6 Ído̱ rí nigájna̱á xa̱bo̱ fariséo̱, a̱ꞌkhue̱n rí mbá nacha̱ máꞌ ni̱gíꞌdíi̱n niguáꞌdáa̱ awan gajmíi̱ xa̱bi̱i Eróde̱s, xáne gúni̱i̱ kajngó mu̱xíya̱a̱ Jesús.

7 Xómáꞌ Jesús niríya̱ꞌ-mina̱ꞌ ni̱ka̱ ná rawuun ñañuu a̱pha̱ gajmíí tsí naꞌsngúún, jamí maphú mbaꞌiin xa̱bo̱ numbaa Galiléa̱ nigóó tsu̱du̱u̱. Xúꞌkhue̱n máꞌ niguwá xa̱bo̱ ná numbaa Judéa̱, 8 ná xuajen Jerusalén, ná numbaa Iduméa̱, ga̱jma̱á ná i̱mba̱ kri̱doo matha Jordán, jamí mbá nawa̱a̱ Tíro̱ ga̱jma̱á Sidón. Maphú mbaꞌiin xa̱bo̱ niguwá gúyáá Jesús ído̱ ni̱dxawíín rí maphú wáá rí naꞌnii̱. 9 Ga̱jma̱á numuu rí phú mbaꞌiin xa̱bo̱ na̱ka̱-raꞌne, Jesús niꞌthúún tsí naꞌsngúún rí mu̱guaꞌdáá na̱ma̱ñúú mbá ixe̱-rguwa rí na̱ka̱ inuu iya, kajngó mu̱xúrmatsíi̱ xa̱bo̱. 10 Numuu rí maphú mbaꞌiin máꞌ tsí neꞌne-thanúú Jesús, ikhaa jngó mbá xúgíin tsí najáñúú nu̱rmajngua̱ꞌ-mijná ná inuu̱, numuu rí nandúu̱n mu̱xkajmaa̱.

11 Xómáꞌ gíñá ꞌguéen, ído̱ nduyáa̱ Jesús, nu̱sma̱ti̱gúu̱n inuu, jamí nutháa̱n: «Ikháánꞌ ñajwaanꞌ A̱dée Ana̱ꞌlóꞌ». 12 Xómáꞌ ikhaa̱, naríñúu̱ kajngó mu̱xúthúu̱n xa̱bo̱ tsáa ñajuu̱n ikhaa̱.

13 Nda̱wa̱á a̱ꞌkhue̱n nitsimuu Jesús ná inuu mbá júba̱, jamí nindxaꞌwúu̱n xa̱bo̱ tsí neꞌne a̱kuii̱n rí ma̱ju̱wá ga̱jma̱á nindxu̱u̱. Jamí ikhiin tsúꞌkhue̱n nigóó ga̱jma̱á nindxu̱u̱. 14 A̱ꞌkhue̱n niraꞌwíi̱n mbá gu̱wa̱ꞌ i̱jmi̱i (12) xa̱bo̱*3.14 Ríga̱ mbá tikhu i̱yi̱i̱ꞌ griégo̱ rí wayuu rí naꞌne-ra̱ꞌmáa: «tsí neꞌne mbiꞌñúú tsí waxúngui̱inꞌ». tsí ma̱ju̱wá jayu ga̱jma̱á nindxu̱u̱, xúꞌkhue̱n máꞌ rí maxúnguii̱nꞌ magóó gúthan-raꞌa. 15 Mangaa máꞌ rí maxnúu̱ tsiakhe̱ kajngó mune̱-thanúu̱ xa̱bo̱ tsí najáñúú, xúꞌkhue̱n máꞌ*3.15 Ríga̱ mbá tikhu i̱yi̱i̱ꞌ griégo̱ rí wayuu ná tsíꞌkha̱ ajngáa ríge̱ꞌ: «kajngó mune̱-thanúu̱ xa̱bo̱ tsí najáñúú, xúꞌkhue̱n máꞌ». rí mu̱xkawíi̱n gíñá ꞌguéen tsí traꞌi̱in ná xuñúú xa̱bo̱. 16 A̱ꞌkhue̱n niraꞌwíi̱n mbá gu̱wa̱ꞌ i̱jmi̱i tsíge̱ꞌ:*3.16 Ríga̱ mbá tikhu i̱yi̱i̱ꞌ griégo̱ rí wayuu ná tsíꞌkha̱ ajngáa ríge̱ꞌ: «A̱ꞌkhue̱n niraꞌwíi̱n mbá gu̱wa̱ꞌ i̱jmi̱i tsíge̱ꞌ».

Simón, tsí nixná mbiꞌyuu̱ Pédro̱,

17 Santiágo̱,*3.17 Ná i̱yi̱i̱ꞌ griégo̱ rí wayuu naꞌthán «Jakóbo̱», rí nithán «Santiágo̱» ná ajngáa xtílo̱o̱. tsí a̱dée Sebedéo̱,

Juáán, tsí ge̱ꞌthe̱e máꞌ Santiágo̱, tsí nixnée̱ mbiꞌñúú Boanérje̱s (rí naꞌthán: «Xa̱bo̱ tsí mikoo wáa ene̱»),

18 Andrés,

Felípe̱,

Bartolomé,

Matéo̱,

Tomás,

Santiágo̱, tsí a̱dée Alféo̱,

Tadéo̱,

Simón, tsí nijimaa tsu̱du̱ún xa̱bo̱ kananéo̱, 19 jamí

Júda̱s Iskarióte̱, tsí nixnáxi̱i̱ Jesús nda̱wa̱á.

A̱ꞌkhue̱n Jesús ni̱ꞌkha̱a guꞌwáá, 20 jamí mbu̱júꞌ máꞌ phú mbaꞌiin xa̱bo̱ ni̱gi̱mbúun, rí asndo ni tsíyaphii̱n mu̱phi̱i̱ guma, Jesús gajmíí tsí naꞌsngúún. 21 Ído̱ nidxawíín rúꞌkhue̱n xa̱bo̱ guꞌwóo Jesús, a̱ꞌkhue̱n nigóo̱ ágúyaa̱ numuu rí nuthee̱n rí najmiyuu̱.

22 Xómáꞌ xa̱bo̱ tsí nusngáá xtángoo tsí niguwá ná Jerusalén nuthan: «Xa̱bo̱ tsíge̱ꞌ gíꞌdaa gixa̱a̱,*3.22 Ná i̱yi̱i̱ꞌ griégo̱ naꞌthán «Beelzebú», mbá mbiꞌyuu gixa̱a̱ ene̱ xa̱bo̱ wajyúú. tsí naꞌthán-ñájúún gíñá ꞌguéen. Jamí ski̱yu̱u̱ꞌ máꞌ gixa̱a̱ na̱grui̱guíi̱, ikhaa jngó na̱ꞌngo̱o̱ naxkawíi̱n gíñá ꞌguéen ná xuñúú xa̱bo̱».

23 A̱ꞌkhue̱n Jesús nindxaꞌwúu̱n, jamí niꞌthúu̱n ga̱jma̱á ajngáa xkri̱da ríge̱ꞌ: «Xáne lá gágoo rí Satanás máꞌ maxkriya̱a̱ꞌ Satanás rá. 24 Xí mbá numbaa ná naꞌthán-ñájun mbáa thúngaa, nu̱xpi̱ꞌtha̱-mijná xa̱bo̱, ma̱xáxóo ma̱ri̱gá mba̱yo̱ꞌ numbaa rúꞌkhue̱n. 25 Jamí xí mbá guꞌwíin xa̱bo̱ nu̱xpi̱ꞌtha̱-mijná, ma̱xáxóo ma̱ju̱wée̱ꞌ mba̱yo̱ꞌ mbá guꞌwíi̱n. 26 Xúꞌkhue̱n máꞌ mangaa xí Satanás nagíꞌdu̱u̱n na̱gi̱ꞌda-mina̱ꞌ sia̱nꞌ, jamí maxpíꞌthá-mine̱e̱ꞌ, ma̱xáxóo ma̱xtáa̱ mba̱yo̱ꞌ. A̱ꞌkhue̱n gakon ni̱ga̱nú máꞌ mbiꞌi rí ma̱mbáa̱.

27 »Xí mbáa ku̱ꞌwá nandoo ma̱to̱ꞌo̱o̱ ná guꞌwóo mbáa xa̱bo̱ tsí phú gúkuíi jamí ma̱ꞌne-kúwe̱e̱ꞌ rí gíꞌdoo, ginii ndaꞌyóo rí maroꞌwóo̱ xa̱bo̱ tsúꞌkhue̱n. A̱ꞌkhue̱n rí ma̱goo ma̱ꞌne-kúwe̱e̱ꞌ rí ríga̱ ná guꞌwóo.

28 »Na̱tha̱nꞌ-jmbalaꞌ, rí Ana̱ꞌlóꞌ ma̱ꞌne mba̱a̱ a̱kui̱in jaꞌyoo mbá xúgíí aꞌkhán rí nune̱ xa̱bo̱ numbaa, jamí ma̱ꞌne mba̱a̱ a̱kuii̱n jaꞌyoo̱ asndo náá máꞌ ajngáa rí nuthan-xkawíi̱ꞌ xa̱bo̱. 29 I̱ndo̱ó máꞌ numuu rí asndo tsáa tsí naꞌthán xkawe̱ꞌ ga̱jma̱á numuu Xu̱u̱ꞌ Ana̱ꞌlóꞌ, ninguáná ma̱xáꞌne mba̱a̱ a̱kui̱in Ana̱ꞌlóꞌ jaꞌyoo xa̱bo̱ tsúꞌkhue̱n, rí mbá jámuu gíꞌmaa̱ aꞌkhán rúꞌkhue̱n».

30 Niꞌthán Jesús ajngáa ríge̱ꞌ, numuu rí ikhii̱n nuthee̱n rí ikhaa̱ gíꞌdaa̱ gíñá ꞌguéen.

31 Awúun máꞌ rúꞌkhue̱n ni̱ga̱nú nánée Jesús gajmíí dxíyo̱o̱, i̱ndo̱ó máꞌ numuu rí niwájwii̱n rixa̱á. A̱ꞌkhue̱n ni̱xu̱ꞌmee̱ ajngáa rí ma̱ga̱jnúu Jesús. 32 Xómáꞌ xa̱bo̱ tsí trigi̱in mbá nawa̱a̱ ná inuu̱ nitháa̱n: «Wéje̱ nániáaꞌ gajmíí dxíya̱a̱ꞌ rixa̱á. Nandúu̱n gúyaa̱ꞌ».

33 Jamí Jesús niꞌthúu̱n: «Tsáa ñajuun tsí nánéꞌ jamí tsíin ñajúún tsí dxíyo̱ꞌ róꞌ». 34 A̱ꞌkhue̱n mbá nawa̱a̱ niyaxúu̱n tsí trigi̱in ná inuu̱, jamí niꞌthúu̱n: «Tsíge̱ꞌ ñajúún asndo xómá nánéꞌ jamí dxíyo̱ꞌ. 35 Numuu rí jámba̱a̱ tsí naꞌne rí nandoo Ana̱ꞌlóꞌ, tsúꞌkhue̱n ñajuun dxíyo̱ꞌ, dxáguíꞌ, jamí nánéꞌ».