1 Numuu rí Ana̱ꞌlóꞌ naꞌthán rí nánda̱a̱ aꞌkhánlóꞌ ga̱jma̱á numuu rí wéje̱ a̱kia̱nꞌlóꞌ ná inuu̱, ikhaa jngó juwalóꞌ tsímáá ga̱jma̱á nindxu̱u̱ Ana̱ꞌlóꞌ, ga̱jma̱á numuu rí neꞌne Tátiálóꞌ Jesukrísto̱ ga̱jma̱á numalóꞌ. 2 Xúꞌkhue̱n máꞌ mangaa, ga̱jma̱á majñu̱u̱ Jesús jamí ga̱jma̱á majñu̱u̱ rí wéje̱ a̱kia̱nꞌlóꞌ ná inuu Ana̱ꞌlóꞌ, nandoo najanálóꞌ rí máján ríge̱ꞌ, ná kuajún-gúkuálóꞌ jamí nadxalóꞌ, numuu rí ga̱jma̱á mbá jañii a̱kia̱nꞌlóꞌ guáꞌthi̱ínlóꞌ rí ma̱juwalóꞌ ná phú tsímáá xtáa Ana̱ꞌlóꞌ. 3 Jamí ra̱ꞌkhá i̱ndo̱ó rúꞌkhue̱n, rí mangaa máꞌ nadxu a̱kia̱nꞌlóꞌ ná awúun jamínu̱ꞌ, numuu nduꞌyáálóꞌ rí jamínu̱ꞌ naꞌne rí ma̱ꞌngo̱o̱ a̱kia̱nꞌlóꞌ inuu mbá xúgíí. 4 Jamí xí na̱ꞌngo̱o̱ a̱kia̱nꞌlóꞌ inuu mbá xúgíí rá, nadxu a̱kui̱in Ana̱ꞌlóꞌ e̱ꞌne̱lóꞌ. Jamí xí nadxu a̱kui̱in Ana̱ꞌlóꞌ e̱ꞌne̱lóꞌ, rúꞌkhue̱n naꞌne rí ga̱jma̱á mbá jañii a̱kia̱nꞌlóꞌ mu̱waꞌthi̱ínlóꞌ rí wéje̱ ma̱ri̱gá. 5 Jamí rí ga̱jma̱á mbá jañii a̱kia̱nꞌlóꞌ guáꞌthi̱ínlóꞌ tsíꞌne-matiáanꞌlóꞌ, numuu rí Ana̱ꞌlóꞌ nisngájmee̱ rí phú nandoo̱ jaꞌyalóꞌ ga̱jma̱á majñu̱u̱ Xu̱u̱ꞌ tsí nixniálóꞌ.

6 Numuu nákhí rí ikháánꞌlóꞌ tsíꞌnga̱ꞌlóꞌ gúꞌne̱-jríya̱ꞌ-mijnálóꞌ, jamí ído̱ ni̱ga̱nú mbiꞌi rí niraꞌwíí Ana̱ꞌlóꞌ, Krísto̱ nijáñuu ga̱jma̱á numalóꞌ, tsáanꞌ xa̱bo̱ aꞌkhán ñajwanlóꞌ. 7 Phú mingíjyúu rí mbáa xa̱bo̱ maniña-mina̱ꞌ rí ma̱ja̱ñúu ga̱jma̱á numuu mbáa xa̱bo̱ tsí naꞌne rí máján. O á gáꞌne xí xtáa mbáa tsí maniña-mina̱ꞌ ma̱ja̱ñúu ga̱jma̱á numuu mbáa tsí naꞌne mi̱ndaꞌkho rí máján mbo̱ꞌ. 8 Xómáꞌ Ana̱ꞌlóꞌ, nasngájmee̱ rí phú nandoo̱ jaꞌyalóꞌ, rí nákhí xóó xa̱bo̱ tsí nune̱ aꞌkhán ñajwanlóꞌ, Krísto̱ nijáñuu ga̱jma̱á numalóꞌ.

9 I̱wa̱á lá xúge̱ꞌ rí naꞌthán máꞌ Ana̱ꞌlóꞌ rí nánda̱a̱ aꞌkhánlóꞌ ga̱jma̱á numuu rí nijáñuu Krísto̱ rá, ikhaa̱ naꞌne-jríñáa̱ꞌlóꞌ kajngó mu̱xúdrígúlóꞌ jamínu̱ꞌ ga̱jma̱á numuu rí najiꞌnáa Ana̱ꞌlóꞌ jaꞌyoo aꞌkhán. 10 Xí nákhí xa̱bo̱ sia̱nꞌ ñajwanlóꞌ, nimbáxi̱iꞌlóꞌ ga̱jma̱á nindxu̱u̱ Ana̱ꞌlóꞌ ga̱jma̱á numuu rí nijáñuu A̱dée̱, i̱wa̱á lá xúge̱ꞌ rí nimbáxi̱iꞌlóꞌ ga̱jma̱á nindxu̱u̱, ma̱jáwiáanꞌlóꞌ ga̱jma̱á numuu rí ndiyáa mbiꞌyuu̱. 11 Jamí ra̱ꞌkhá máꞌ i̱ndo̱ó rúꞌkhue̱n, rí asndo phú nadxu a̱kia̱nꞌlóꞌ eꞌne Ana̱ꞌlóꞌ mangaa ga̱jma̱á numuu Tátiálóꞌ Jesukrísto̱, numuu rí ikhaa̱ niꞌnii̱ rí ma̱goo ma̱mba̱xíiꞌlóꞌ ga̱jma̱á nindxu̱u̱ Ana̱ꞌlóꞌ.

12 Ga̱jma̱á numuu mbáwíi xa̱bo̱ ni̱to̱ꞌo̱o̱ aꞌkhán ná numbaa, jamí ga̱jma̱á numuu aꞌkhán ni̱gi̱ꞌdu̱u̱n nijáñúú xa̱bo̱. Xkuaꞌnii máꞌ na̱ka̱-rajáñúú mbá xúgíin xa̱bo̱ asndo xúge̱ꞌ, numuu rí mbá xúgíi̱n nini̱i̱ aꞌkhán. 13 Nákhí rí xóó nda̱a̱ xtángawoo Moisés, ríga̱ máꞌ aꞌkhán ná numbaa. Xómáꞌ ná nda̱a̱ xtángoo rá, na̱nguá máꞌ gíꞌmii aꞌkhán xa̱bo̱. 14 Maske máꞌ xkuaꞌnii, ni̱ka̱-rajáñúú máꞌ xúꞌkhue̱n xa̱bo̱ eꞌne tsiakhe̱ rí na̱gu̱díin xa̱bo̱, asndo nákhí nixtáa Adán asndo mbiꞌi rí nixtáa Moisés. Tsíꞌñuu máꞌ xí túni̱i̱ aꞌkhán xómá neꞌne Adán rí táꞌne-mbánuu mbóó xtángoo. Adán ninindxu̱u̱ xkri̱doo mbáa tsí wéje̱ ma̱ꞌkha̱ nda̱wa̱á.

15 Xómáꞌ aꞌkhán rí neꞌne Adán, na̱nguá mbrígu ne̱ ga̱jma̱á rí máján naxná Ana̱ꞌlóꞌ. Ga̱jma̱á numuu aꞌkhán rí neꞌne mbáwíi xa̱bo̱, mbá xúgíin xa̱bo̱ nijáñúú. Xómáꞌ rí máján naxná Ana̱ꞌlóꞌ rá, rí najanálóꞌ ga̱jma̱á majñu̱u̱ mbáwíi xa̱bo̱, Jesukrísto̱, phú i̱tha̱án mba̱a̱ ne̱ jamí phú mbaꞌiin xa̱bo̱ mambáñúú ne̱. 16 Xúꞌkhue̱n máꞌ, na̱nguá mbrígu rí naxná Ana̱ꞌlóꞌ ga̱jma̱á aꞌkhán rí neꞌne mbáwíi xa̱bo̱. Numuu rí ga̱jma̱á numuu mbóó aꞌkhán, waꞌxná-máꞌíin xa̱bo̱ rí mu̱míni̱í jámuu. Xómá rí naxná Ana̱ꞌlóꞌ rá, ni̱ꞌkha̱ ne̱ ga̱jma̱á numuu mbaꞌa aꞌkhán, kajngó maꞌthán Ana̱ꞌlóꞌ rí nánda̱a̱ aꞌkhúún xa̱bo̱. 17 Gakon máꞌ rí ga̱jma̱á numuu aꞌkhúun mbáwíi xa̱bo̱, Adán, wéje̱ rí ma̱ja̱ñúú mbá xúgíin xa̱bo̱. Xómáꞌ tsí nanújngo-rámuu nu̱drígú rí máján naxná Ana̱ꞌlóꞌ ga̱jma̱á majñu̱u̱ mbáwíi xa̱bo̱ rá, Jesukrísto̱, i̱tha̱án máꞌ ma̱ju̱wée̱ꞌ jámuu, numuu rí naꞌthán Ana̱ꞌlóꞌ rí nánda̱a̱ máꞌ aꞌkhúu̱n.

18 Ikhaa jngó, xómá rí ga̱jma̱á numuu aꞌkhúun mbáwíi xa̱bo̱ waꞌxná-máꞌíin mbá xúgíin xa̱bo̱ rí ma̱ja̱ñúú, xkuaꞌnii máꞌ mangaa, ga̱jma̱á numuu rí máján neꞌne mbáwíi xa̱bo̱, nandoo naꞌthán Ana̱ꞌlóꞌ rí nánda̱a̱ aꞌkhúún mbá xúgíin xa̱bo̱, kajngó ma̱ju̱wée̱ꞌ jámuu. 19 Ga̱jma̱á numuu rí mbáwíi tsí táꞌne-mbánuu, phú mbaꞌiin ninindxu̱ún xa̱bo̱ tsí nune̱ aꞌkhán. Xkuaꞌnii máꞌ mangaa, ga̱jma̱á numuu mbáwíi tsí neꞌne-mbánuu, phú mbaꞌiin ma̱nindxu̱ún xa̱bo̱ tsí nánda̱a̱ aꞌkhúún.

20 Xómáꞌ rí xtángoo rá, ni̱ꞌkha̱ ne̱ kajngó mbuyáá xa̱bo̱ rí phú mba̱a̱ aꞌkhúu̱n. Jamí ído̱ neꞌne mba̱a̱ guéño máꞌ aꞌkhán rá, a̱ꞌkhue̱n phú i̱tha̱án mba̱a̱ rí máján nixná Ana̱ꞌlóꞌ. 21 Xómá rí ni̱gi̱ꞌdoo tsiakhe̱ aꞌkhán rí ma̱ꞌne rí ma̱ja̱ñálóꞌ, xkuaꞌnii máꞌ rí máján naxná Ana̱ꞌlóꞌ mangaa, gíꞌdoo ne̱ tsiakhe̱ rí ma̱ꞌne ne̱ rí ma̱juwalóꞌ jámuu ga̱jma̱á numuu rí naꞌthán Ana̱ꞌlóꞌ rí nánda̱a̱ máꞌ aꞌkhánlóꞌ ga̱jma̱á majñu̱u̱ Tátiálóꞌ Jesukrísto̱.