Mateus 20

1 Xəybışda Paççahiyvalla nişikiy akar? Haane, iyesiy miç’eeqana cune t’ımıllığeeqa işçer t’abal ha’as ı’qqəna. 2 Mana işçeeşika yiğısiys sa nuk’rayn pıl hevlesva yuşanxha, manbı cune t’ımıllığeeqa g’uxoole. 3 Sə’ət yüç’ülle eexheng’a mana meer maydamaqa qığeç’e. Mang’uk’le maa’ab iş dena avxuyn insanar g’ooce. 4 Mang’vee manbışik’le eyhen: «Şunab yizde t’ımılyne bağeeqa işlemişeepxhes havak’ne. Şolqa gyooxhana hək’ib zı qopkuba qevlesda». 5 Manbıb avayk’ananbı. Sə’ət yits’ıq’vəble vooxheng’ayiy sə’ət xheyible vooxheng’a, mana meer qığeç’u man kar ha’an. 6 Sə’ət xhoble vooxheng’a mana meer qığeç’ena. Mang’uk’le maa’ab meeb ulyobzuriyn insanar g’ooce. Mang’vee manbışike qiyghanan: «Nya’a şu yiğ iş dena ulyobzur exha qa’a?» 7 Manbışe «Şavacab şas iş hidevunava» eyhe. Mang’vee manbışik’led «Şunab yizde t’ımılyne bağeeqa işlemişeepxhes havak’neva» eyhe.

8 Exha qexhemee, bağıne iyesee cun işçeer vuk’lek vukkekang’uk’le eyhen: «Gırgın işçer qopt’ul, manbışda hək' qevle. Ts’erra nekke qiyğa abıynbışile giğle. Nekke qiyğab miç’eeb abıynbışda qevle». 9 Sə’ət xhonçul abıyne işçeeşis sa nuk’rayn pıl hele. 10 Ts’eppa abıynbışisqa həməxüd qadayle cos geedme heles. Manbışisıd sa nuk’rayke pıl qele. 11 Manbışe colqa gyooxhana hək' alyapt’ımee, iyesiylena haa’a giviyğal. Manbışe eyhe ıxha: 12 «Nekke qiyğa abıynbışe sa sə’ətna iş hav’u, ğu verığık avub nekke dağamne gahıl işlemişeepxhayn şinayiy manbı sa avqu». 13 İyesee manbışde sang’us inəxdun alidghıniy qele: «Hambaz, zı vas horbı hı’ı deş. Ğu zaka sa nuk’rayne pılıke dişdiy yuşanxha? 14 Vas quvuna hək’ib alyapt’ı hoora. Zasmee nekke qiyğa arıyng’usub vas xhinnenacab hək' qevles vukkan. 15 Nya’a zasse yizde pılıke, yik’es ıkkanan ha’as dəxəyee? Deşxhee, yiğne mıssıne ules, yizda yugvallane qiviykkan?» 16 Həməxübıb nekke qiyğiynbı tseppiynbı vuxhes, tseppiynbıb nekke qiyğiynbı vuxhes.