1 Cine A̱sulazuva a̱ ɓa̱ruyi

Sihiyona a̱tsuma̱ e eleshe o upan!

U vari ta̱ ulobonu wa Isra'ila

diga zuva a̱ tyo e iɗa.

U cuwan nu uzuwata wa ana wa̱ yi shi

a̱tsuma̱ o urana wu upan wa̱ yi.

2 A̱sulazuva o soɗu ta̱

uba̱ta̱ wu nden wa Yakubu suru babu roco iliyali.

A̱tsuma̱ o upan wa̱ yi u varu ta̱

ɓaɓu vu ucira va Yahuda.

U polo ta̱ uba̱ta̱ u tsugono tsa̱ yi

no ozo o tsugono tsa̱ yi e iɗa u tara le ili i ro shi.

3 A̱tsuma̱ o upan u tawa ta̱

ucira wa Isra'ila suru,

u vura̱nu ta̱ ukere u sa'ani wa̱ yi a̱ ka̱mba̱ a̱ca̱pa̱

a̱ ma̱ka̱ka̱n ma n'yuwatan n le.

U kula̱to ta̱ a̱tsuma̱ a Yakubu tsa akina a madala

a na a̱ tsu kula̱to ili i na i ri lo uka̱nda̱ruwu suru.

4 U ni'wa̱n ta̱ utan wa̱ yi tsa ma'yuwatan,

nu ukere u sa'ani wa̱ yi ufoɓu,

a̱vu u kototo

a̱za̱ o ukadu suru.

Woo oco ta̱ upan wa̱ yi tsa akina

o oogodo a ama a̱ Sihiyona.

5 A̱sulazuva o o'wo ta̱ tsa ma'yuwatan,

u soɗu ta̱ Isra'ila.

U soɗu ta̱ kobu tsugono tsa̱ yi suru

a̱vu u kototo ɓaɓu vu ucira va̱ yi suru.

U da̱shi ta̱ ama a Yahuda

a̱tsumola̱ngu na̱ mesun.

6 Woo oco ta̱ A̱a̱'isa̱ a̱ yi tso oogodo,

reve u kototo uba̱ta̱ wu uga'asusan wa̱ yi.

A̱sulazuva a zuwa ta̱ Sihiyona icina na̱ a̱buki a̱ yi a na a zuwai suru

na̱ rana va Ashibi a̱ yi.

A̱tsuma̱ o upan wu usuɗuwu wa̱ yi

u 'yuwan ta̱ mogono na̱ ganu.

7 A̱sulazuva a 'yuwan ta̱ masa'a ma̱ yi,

a̱vu u vari A̱a̱'isa̱ a̱ yi.

U ca ta̱ ma'yuwatan

ɓaɓu vu kobu tsugono tsa̱ Urishelima.

O to oruwuso a̱tsuma̱ o u'wa wa̱ A̱sulazuva

she damma urana wa̱ a̱buki a na a zuwai.

8 A̱sulazuva a zuwa ta̱ okolo a na woo ɓoso

uɓaɓu wa̱ Sihiyona.

Wu ba̱ruwa̱ ta̱ amunga o uritosu wu ukototosu

u ka̱mba̱to ukere wu ucira wa̱ yi wu ukototosu shi,

u zuwa ta̱ atsura na̱ ɓaɓu mesun,

suru a̱ la̱nga̱ ta̱.

9 Na̱ntsu va̱ yi liɓa ta̱ e iɗa,

wu kuɗa ta̱ katsuwata va̱ yi.

Ngono ma̱ yi na azagbain a̱ yi

a̱ pura̱ le ta̱ a̱ tyo a nɗa n ro,

wila̱ wa̱ yi u buwa shi.

Ama̱sula̱ a̱ yi waru a buwa a̱ tsurusa̱

alavu alavu uba̱ta̱ wa̱ A̱sulazuva shi.

10 Mbara ma ama a̱ Sihiyona

a̱ ta̱ nden e iɗa kuci kuci.

A̱ tsun ta̱ ma̱buta̱ a aci e le

e mesun ma̱ a̱tsumola̱ngu,

a̱vu o oto akashamuna.

Esheli a̱ Urishelima

a̱ ka̱ɗa̱to ta̱ aci e le e iɗa.

11 Esu a̱ va̱ a̱ kuna̱ ta̱ na̱ mesun,

a̱a̱tsuma̱ a̱ va̱ a̱ ɗumbura̱ ta̱.

Okolo a̱ va̱ e jeruwe ta̱

adama o ukototosu wa ama a̱ va̱,

adama a na nreɓu na̱ muwun n ta̱ a̱ limusa̱

e re gbain lyuci'i.

12 A̱ ta̱ shoshen nan mma le,

<<Te ilyalya na̱ masayan?>>

Ele a̱ limusa̱ tsa ama a na a amatoyin

e re gbain lyuci'i,

wuma u le o utusa̱

e ekere a nan mma le.

13 Nye maa damma adama a̱ wu?

Na̱ nye maa kurato wu,

a̱vu Urishelima?

Na̱ nye maa kurato wu,

adama n ca wu adanshi,

a̱vu Sihiyona?

A̱ru'un a̱ wuntsu a̱ wu ta̱ tsa̱ a̱ru'un a mala.

Zane ɗa aa gura ka̱mba̱to wu gbaga?

14 Alavu alavu a na ama̱sula̱ a̱ wu e enei

a̱za̱ e epen a ɗa, ili ye pere.

A̱ pa̱lu'wa̱ unusu na waa putsaa

a̱ pura̱ ɗu shi.

Ili i na yaa fara na a dammai

epen a ɗa waru u pusa̱sun u ɗu.

15 Aza a na suru a̱a̱ ka̱ra̱sa̱

a ta yuwusaan wu ulamu,

a lumgbatsusaa

Urishelima aci e le.

<<A̱yi nda a̱yi ɗa lyuci na ee ɗesu

lyuci na la'ai ulobonu,

ma̱za̱nga̱ mo uvaɗi suru shi?>>

16 N'yuwatan ma̱ wu suru

e meɗee wu ta̱ na̱ le,

a ta yuwusaan wu ulamu

waru a macuru na a dammi,

<<Tsu soɗu yi ta̱!

A̱yi nda a̱yi ɗa urana u na tsaa pura,

a̱yi ɗa nda gba u rawai tse ene yi ta̱!>>

17 A̱sulazuva a yuwan ta̱ ili i na u foɓoi,

u shiton ta̱ adanshi a̱ yi

a na u dammai ɗe nu ujumu.

U vari wu ta̱ babu roco iliyali.

U zuwa ta̱ ma'yuwatan ma̱ za̱nga̱na̱ e ekere a̱ wu,

u 'ya̱sa̱n ta̱ ucira wu n'yuwatan ma̱ wu.

18 Okolo a ama

e showen ta̱ A̱sulazuva.

O'o, uɓaɓu wa ama a̱ Sihiyona,

lyawa aɓara a̱ wu e yene tsu uɗolu

urana na ayin.

She vo o'woto aciya̱wu fa̱a̱n wan,

she vu ca esu a̱ wu wivuwun wan.

19 'Yon vu shon ayin ma̱ɓula̱,

vu damma ili i na i ri okolo a̱ wu,

vu za̱za̱la̱ okolo a̱ wu tsa̱ mini

a̱ ma̱ka̱ka̱n ma̱ A̱sulazuva.

'Ya̱sa̱n ekere a̱ wu zuva a̱ tyo ya̱'a̱ yi

adama a wuma u muwun ma̱ wu,

aza a na a̱ lima̱i o ure biti

adama a ambulu.

20 <<A̱sulazuva, ka̱lyuwa̱ ve ene,

zane ɗa vu yuwain ɗe na̱ a̱yi ne tsunda?

U lobono ta̱ a̱ma̱ci a tama muwun n le,

muwun n na a kungwatoi?

U lobono ta̱ o una nan ganu na ama̱sula̱

a̱tsuma̱ a̱ A̱a̱'isa̱ a̱ A̱sulazuva?

21 <<Muwun mo olobo na̱ mbara

n von ta̱ a̱ ma̱buta̱ me re gbain.

Esheli a̱ va̱ no olobo a̱ va̱

a̱ kuwa̱ ta̱ a matsun me pe'eni.

Vu una le ta̱ a̱tsuma̱ o urana wu upan wa̱ wu,

vu paɗa le ta̱ babu roco iliyali.

22 <<Vu banu ta̱ n'yuwatan a ca mu wovon e eɓele biti,

cine a̱ tsu banu ama o urana wa̱ a̱buki.

O urana wu upan wa̱ A̱sulazuva

ko za la'a ko pasa shi.

Aza a na n ka̱lyuwa̱i n kungwatoi

n'yuwatan n kototo le ta̱.>>