1 A̱sulazuva, cuwan ni ili i na i cina ntsu!

Ka̱lyuwa̱ ve ene ili i wono i na i cina ntsu.

2 A tara ta̱ agadu a̱ tsu a ca omocin,

'wa tsu a ca ama o ro.

3 Tso o'wo ta̱ mkpa'an.

Nan mma tsu o o'wo ta̱ tsu nruna̱.

4 Tsu ciga tsu 'yuwan tsu tsula mini ma na tsoo sowo,

ɗanga vu mpondo she tsu tsula.

5 Aza a na aa saɓusa tsu

o to tono tsu ana ana,

tsu kuna̱ ta̱,

agba tsu tsura̱ wivuwun shi.

6 Tsu ca ta̱ aciya̱tsu e ekere a Masar na̱ Asuriya

adama tsu tsura̱ ilyalya i na yaa rawa tsu.

7 Nkaya n tsu n yuwan ta̱ unusu agba a buwa shi,

gogo tsu to sowuso oforo o unusu u le.

8 Aza a na a̱ ri tsa agbashi a ɗa

aa yuwusan tsugbain a aci a̱ tsu,

agba za lo na waa wawa tsu diga e ekere e le shi.

9 A̱tsuma̱ e meleshe ma wuma u tsu u ɗa tsa̱a̱ tsurusa̱ ilyalya,

adama a̱za̱ o uvon a na a̱ ri uka̱nda̱ruwu na̱ lyuci.

10 Ukwan u lipu tsu u suɗuwa ta̱ tsa wuwan

adama o usuɗuwu wa ambulu.

11 O to vosun na̱ a̱ma̱ci nu ucira a̱tsuma̱ a̱ Sihiyona,

ne esheli waru a̱tsuma̱ a̱ mulyuci ma Yahuda.

12 A̱ sa̱ga̱do ta̱ azagbain a̱ tsu ne ekere e le,

a ca mbara tsugbain shi.

13 A zuwa ta̱ olobo ulinga nu ucira uba̱ta̱ u yira.

Muwun n ta̱ takalyuwusa za̱la̱ nu ume wa̱ a̱gba̱la̱.

14 Mbara m buwa a̱ da̱nusu o una̱ntsu u lyuci shi,

olobo waru a lyawa ta̱ yiwa'ishi i le.

15 Ma̱za̱nga̱ ma kasa ta̱ no okolo a̱ tsu,

uje'en u tsu u ka̱mba̱ ta̱ mesun ma̱ a̱tsumola̱ngu.

16 Okokolo a tsugbain a̱ riya̱ ta̱ diga a aci a̱ tsu.

A̱tsuma̱lima̱ a cina tsu ta̱ adama a na tsu yuwan ta̱ unusu.

17 Adama o ndolo okolo a̱ tsu a kuɗa ta̱,

adama e ili i nda esu a̱ tsu a̱ da̱mba̱lya̱ ta̱,

18 adama a Masasan ma̱ Sihiyona za na o'woi ofoli,

na̱ musa̱n mu una a agara pe.

19 A̱sulazuva, tsugbain tsa̱ wu tsa̱ ri nu ukotu shi,

otogu o tsugono tsa̱ wu tsa vara ta̱ diga mantsa a̱tyo mantsa.

20 Adama a̱ nye vi icinai na̱ a̱tsu kuci?

Adama a̱ nye vu vari ntsu nu ujumu tsunda?

21 A̱sulazuva, ka̱mba̱to tsu uba̱ta̱ wa̱ wu adama tsu ka̱mba̱.

Ka̱mba̱to rana tsu usa'avu tsu ufaru.

22 She de na̱ wo o'wo vu vari tsu ta̱ suru suru,

reve vu reme upan na̱ a̱tsu babu a̱tyo.